Read Ma'anyan WAHYU 3 Bible Online

WAHYU 3 - Ma'anyan bible

WAHYU 3

¹“Ma malekat ungkup hang Sardis, surat kalayiti: Iti pesen teka hanye sa kaampun kapitu roh teka Alatalla anri kapitu wawahiang yiru. Aku karasa inun sa naulah naun. Naun naantuh welum, padahal naun matei!

²Daya yiru, amuan palus ampikansing inun sa pagun naan hang naun katimpulu yiru huan matei. Daya aku kasasat inun sa naulah naun, huan uweng sunah isa saparuna hang hadapan Alatalla.

³Jari, itung kamulek inun sa haut naajarku ma naun dahulu hie nelang inun sa haut rengei naun. Tampalus yiru nelang ware naun batobat teka kawan dosa naun. Amun naun puang batobat, aku sagar hawi nunung naun kala erang kaulun maling; nelang naun puang karasa hantamian wayah nelang tawukni aku hawi.

⁴Kude hang penah-penah naun hang Sardis pagun naan ulun sa nyaga nampan pakaianni tatap barasis. Here yiru sagar takia sinrah aku makai pakaian mahilak, daya here patut kalayiru.

⁵Ma here sa manang sagar natamu jubah mahilak. Ngaran here puang sagar napuhut teka Buku Ulun Welum. Nelang hang hadapan Ambahku anri kawan malekatni aku sagar mangaku here yiru ulun watku.

⁶Hie sa tau karengei, ware hanye mantaru inun sa naeau daya roh Alatalla ma kawan ungkup!”

⁷“Ma malekat ungkup hang Filadelfia, surat kalayiti: Iti pesen teka hanye sa barasis nelang sajati. Hanye sa negei kunsi wat Dawid; amun hanye nguka, puang uweng sunah erang kaulun sa tau nutupni, nelang amun hanye nutupni puang uweng sunah erang kaulun sa kaiyuh ngukani.

⁸Aku karasa inun sa naulah naun. Aku karasa himat naun puang hampe mansing; naun haut ngalut ajaranku nelang satia ma aku. Ma naun haut nauka isa wanawang sa puang tau natutup daya hie-hie.

⁹Itung yiti: Kawan ulun sa jari ulun wat Iblis yiru, uras mapusu sa mangaku diri here ulun Yahudi padahal puang, aku sagar ngulah here hampe here hawi ileku hang hadapan naun. Nelang here sagar karasa aku sinta naun.

¹⁰Daya naun haut nuu parentahku nampan utul, aku pada sagar nyalindung naun teka wayah kasusahen sa sagar meat litar dunia yiti. Hal yiru sagar jari pakai mansuba katuluh ulun hang ambau tane.

¹¹Aku hinang hawi! Jaga mamaeh inun sa naan hang naun, nampan puang uweng sunah erang kaulun hanrampas kadiah kamanangen teka naun.

¹²Ma ulun sa manang, aku sagar ngulah here jari ari hang lewu barasis wat Alatallaku, nelang hanye sagar muneng hang lewu yiru palus ma kalalawahni. Ngaran Alatallaku, anri ngaran tumpuk Alatallaku-hanyeyiru Yerusalem wau sa sagar minau teka surga, teka Alatallaku-sagar nasuratku pada hang diri ulun yiru. Kalayiru pada ngaranku sa wau sagar nasuratku hang dirini.

¹³Hie sa tau karengei, ware hanye mantaru inun sa naeau daya roh Alatalla ma kawan ungkup!”

¹⁴“Ma malekat ungkup hang Laodikia, surat kalayiti: Iti pesen teka sa mulia Amen, saksi sa satia nelang bujur, putut ala katantuluh sa naulah daya Alatalla.

¹⁵Aku karasa inun sa naulah naun; aku karasa naun puang marisak nelang puang pada malaing. Sabujurni naun isa teka yiru marisak atawa malaing!

¹⁶Kude naun hangat kuku; malaing puang, marisak sika puang. Daya sabab yiru naun sagar naluaku kaluar teka wuang wawaku.

¹⁷Naun kaeau, ‘Kami tatau nelang saraba sukup; kami puang uweng kakurangen inun heneng.’ Kude naun puang karasa tuu leha susah nelang tuu ngampi hanang atei kawangunen naun! Naun paua, naun tabentur nelang pehe.

¹⁸Daya yiru aku ngami patataan ma naun nampan midi amas teka aku, hanyeyiru amas sa maeh, nampan naun tatau. Widi pada pakaian mahilak teka aku nampan naun bapakaian palus nutup kawangunen naun sa tabentur nelang ngamangan. Widi pada tatamba neu napalit hang matei naun nampan naun tau kadinung.

¹⁹Kawan ulun sa nasintaku, here yiru sa natagur nelang nahambat dayaku. Daya yiru ware naun basamangat, palus batobat teka kawan dosa naun.

²⁰Dinung! Aku minri hang hadapan wanawang nelang nalitik. Amun naan ulun sa karengei lenganku, palus nguka wanawang, aku sagar suluk manalu hanye; aku sagar kuman baya hanye nelang hanye kuman baya aku.

²¹Here sa manang, sagar aku ilewa maharung hang padudusanku baya aku, sameh kala aku pada haut manang nelang itati maharung baya Ambahku hang padudusanni.

²²Hie sa tau karengei, ware hanye mantaru inun sa naeau daya Roh Alatalla ma kawan ungkup!”