Read Ma'anyan WAHYU 7 Bible Online

WAHYU 7 - Ma'anyan bible

WAHYU 7

¹Udi yiru, aku kadinung epat kaulun malekat minri hang kaepat pusing dunia. Here nahan kaepat riwut hang dunia nampan ada naan riwut gaguwur hang pampang atawa hang laut, atawa nampuh kawan kayu-kaya.

²Balalu aku kadinung erang kaulun malekat sa lain hawi teka tiba timur. Hanye nginsing segel teka Alatalla sa welum. Anri lengan mehet malekat yiru nerau kaepat malekat sa haut kaiyuh kuasa teka Alatalla nampan nanrusak pampang atawa laut.

³Malekat yiru kaeau, “Ada hinang nanrusak pampang atawa laut, atawa kawan kayu-kaya amun kami huan ngami siri segel hang rai kawan walah Alatalla takam.”

⁴Balalu ma aku nawara, naan 144.000 kaulun sa naami siri segel teka Alatalla hang rai here. Kawan ulun yiru naalap teka kaduawalas suku bangsa Israel;

⁵teka tiap suku 12.000 kaulun. Hanyeyiru teka suku: Yehuda, Ruben, Gad,

⁶Asyer, Naftali, Manasye,

⁷Simeon, Lewi, Isakhar,

⁸Zebulon, Yosef, anri Beyamin.

⁹Udiyiru aku nantau lagi, balalu kadinung lautan murunsia sa luar biasa ramani. Puang uweng sunah erang kaulun kaiyuh hanreken jumalahni. Here hanyeyiru kawan ulun teka tiap bangsa, suku, negara, nelang basa. Here yiru makai jubah mahilak nelang negei palapa korma hang tangan here, ulun rama yiru minri hang hadapan padudusan nelang hang hadapan Anak Babiri yiru.

¹⁰Balalu anri lengan mehet here nanterau, “Salamat takam hawini teka Alatalla takam, sa maharung hang ambau padudusan nelang teka Anak Babiri yiru!”

¹¹Katuluh malekat minri ngaliling padudusan anri kawan pamimpin baya kaepat mahluk yiru. Kawan malekat yiru ileku hang hadapan padudusan balalu nyambah Alatalla.

¹²Anri lengan mehet here kaeau: “Amen! Tawat ma Alatalla takam sa mulia nelang bijaksana, syukur nelang hormat ma hanye. Hanye sa bakuasa nelang mansing palus ma kalalawahni! Amen.”

¹³Erang kaulun teka kawan pamimpin yiru nunti ma aku, “Hie nelang teka awe kawan ulun sa bajubah mahilak yiru hawi?”

¹⁴“Tuan, aku puang karasa. Tuan raerai sa karasa,” tuingku. Balalu hanye kaeau ma aku, “Here yiru hanyeyiru kawan ulun sa haut salamat mitah wayah kahanangen sa tamam. Here haut nuhun jubah here makai ira Anak Babiri hampe jari mahilak.

¹⁵Yiru sababni here minri hang hadapan padudusan Alatalla nelang sumbayang ma hanye kaanrau kamalem hawuang Lewu Alatalla. Nelang hanye sa maharung hang ambau padudusan yiru sagar hawi muneng baya here nampan nyalindung here.

¹⁶Here puang lagi kaingkam kajuju atawa malah. Mate anrau atawa laing kai puang lagi sagar wuah here,

¹⁷daya Anak Babiri sa maharung hang penah padudusan yiru sagar jari pakatik here. Hanye sagar nganyak here ma matei ranu sa ngami pamelum. Nelang Alatalla sagar muhut katuluh riu matei teka matei here.”