Read Ma'anyan WAHYU 8 Bible Online

WAHYU 8 - Ma'anyan bible

WAHYU 8

¹Tawuk Anak Babiri yiru nguka segel sa kapitu, surga balalu suni suwung leu satengah jam lawahni,

²balalu aku kadinung kapitu malekat sa minri hang hadapan Alatalla, nelang ma here naami pitu kawua tarompet.

³Erang kaulun malekat sa lain, nginsing isa dadupa amas, hawi palus minri hang hadapan mezbah. Ma hanye naami wahai tatuu kamanyan neu nawuwur hang kawan doa katuluh ulun wat Alatalla nelang neu pangamian nasarah hang mesbah amas sa naan hang hadapan padudusan Alatalla yiru.

⁴Sinrah anri kawan doa ulun wat Alatalla, atuk dadupa sa rahat malelap yiru ikangkewul mambai ma ambau teka tangan malekat sa minri hang hadapan Alatalla yiru.

⁵Udiyiru malekat yiru ngalap dadupa yiru palus nuwe apui teka mezbah mawuang dadupa yiru, balalu nawut dadupa yiru ma ambau tane. Balalu nanyu laligur nelang kelat wawereu maaru-maati, sinrah naan gempa bumi.

⁶Udiyiru, kapitu malekat sa negei pitu tarompet basadia neu ngampeau tarompet yiru.

⁷Dami malekat sa palanungkai ngampeau tarompetni, balalu hang tawuk yiru uran es nelang apui basampur ira lawu anri daras ma ambau tane. Sapertiga tane galis rakit; kalayiru pada sapertiga kawan kakau kayu anri kawan rikut sa kakuring rakit.

⁸Dami malekat sa karueh ngampeau tarompetni, balalu hang tawuk yiru naan banda sa hante sa nadinung yalah gunung sa malelap natawut mawuang laut. Sapertiga teka laut baubah jari ira.

⁹nelang sapertiga pada mahluk sa naan hang laut matei; kalayiru pada wawai sapertiga kawan kapal.

¹⁰Udiyiru malekat sa katelu ngampeau tarompetni, balalu isa wawahiang sa hante, malelap yalah suluh, lawu teka langit wuah sapertiga teka kawan hungei anri kawan matei ranu.

¹¹(Ngaran wawahiang yiru, hanyeyiru Apsintus isa aratini: Mapait.) Balalu sapertiga teka kawan ranu mapait nelang rama ulun matei daya nguut ranu mapait yiru.

¹²Malekat sa kaepat ngampeau tarompetni, balalu sapertiga teka mate anrau, sapertiga teka wulan nelang sapertiga teka kawan wawahiang tatutup, hampe sapertiga kakuaten sahaya here balalu wawai. Kalayiru pada sapertiga anrau puang maraai nelang sapertiga pada malem.

¹³Aku balalu ninung, aku karengei erang kaukui wurung rajawali rahat samiding ambau hang awan, anri lengan mehet hanye kaeau: “Silaka! Silaka! Silaka katuluh ulun sa muneng hang ambau tane amun naan karengei katelu malekat sa lainni ngampeau tarompet here!”