Read Ma'anyan WAHYU 9 Bible Online

WAHYU 9 - Ma'anyan bible

WAHYU 9

¹Balalu malekat sa kadime ngampeau tarompetni, palus aku kadinung naan isa wawahiang lawu teka langit ma ambau tane. ma wawahiang yiru naami kunsi labak pampatei.

²Balalu wawahiang yiru nguka labak pampatei, atuk ikangkewul kaluar teka wuangni yalah atuk sa kaluar teka wuang dapur hante. Mate anrau anri rakun maieng dudup daya atuk teka wuang labak yiru.

³Balalu teka wuang atuk yiru kaluar kawan angkalap sa minau ma ambau tane. Kawan angkalap yiru naami kuasa sameh kala sa naami ma kawan alimangu.

⁴Here nauring nanrusak rikut atawa kawan kayu atawa kawan amulean lainni. Here ekat iyuh manyarang kawan ulun sa puang uweng sirri segel hang raini teka Alatalla.

⁵Kawan angkalap yiru puang nalewa munu kawan ulun yiru, malengkan ekat nyiksa here dime wulan lawahni. Hanang daya gana siksaan kawan angkalap yiru sameh hanangni kala wuah henget alimangu.

⁶Salawah dime wulan yiru, kawan ulun yiru ngakali nampan hinang matei, kude here puang tau matei; here sindi matei, kude pampatei lawit teka here.

⁷Wangun kawan angkalap yiru kala kuda sa sadia neu paparangan. Hang ulu here naan banda sa dinung kala mahkota teka amas. Uruwawa here kala uruwawa murunsia.

⁸Wulu here kala wulu ulun wawei nelang dipen here kala dipen singa.

⁹Dada here natutup anri banda sa kala baju jatang. Lengan elat here kala lengan kawan kareta natarik daya kuda sa rama, rahat nempat nuju unengan paparangan.

¹⁰Here naan ukui anri pakai nenget kala alimangu. Nelang hang ukui yiru naan kakuaten here pakai nyiksa murunsia salawah dime wulan.

¹¹Here naan raja sa marentah here, nelang raja yiru hanyeyiru malekat sa batanggung jawab hang labak pampatei. Ngaranni hang wuang basa Ibrani hanyeyiru Abadon; nelang hawuang basa Yunani Apolion (sa aratini: “Tukang Tanrusak”).

¹²Silaka sa palanungkai haut taitah. Udiyiru harus naan lagi rueh silaka.

¹³Udiyiru malekat sa kaenem ngampeau tarompetni. Balalu aku karengei lengan sa hawi teka kaepat pusing mezbah amas sa naan hang hadapan Alatalla.

¹⁴Lengan yiru kaeau ma malekat sa kaenem yiru, “Sanepah kaepat malekat sa nahuruk hang Hungei Efrat yiru!”

¹⁵Kaepat malekat yiru balalu nasanepah. Here haut nasadia hulung ma jam, anrau, wulan nelang taun yiru nampan munu sapertiga teka katuluh ulun murunsia.

¹⁶Ma aku nawara jumalah kawan pasukan bakuda yiru, hanyeyiru rueh jatuh juta ramani.

¹⁷Nelang hawuang paninungan aku kadinung kawan kuda yiru anri kawan ulun sa nungkangni. Kawan ulun yiru makai baju jatang sa warnani mariang marede, biru yalah watu nilam anri madintang kala balerang. Ulu kawan kuda yiru kala ulu singa, nelang teka wawani kaluar apui, atuk anri balerang.

¹⁸Sapertiga ulun murunsia matei daya katelu gagudan yiru, hanyeyiru daya apui, atuk anri belerang sa kaluar teka wawa kawan kuda yiru.

¹⁹Kakuaten kawan kuda yiru naan hang wawani anri hang ukuini. Ukui here kala anipe, naan ulu. Makai ukuini yiru, kawan kuda yiru nyiksa murunsia.

²⁰Kude kawan lee ulun murunsia sa puang matei daya gagudan yiru, pada puang nanan kawan ulahan tangan here. Here puang tarie nyambah kawan roh jahat anri kawan barhala amas, perak tamaga, watu anri kayu sa puang tau kadinung atawa karengei.

²¹Here puang pada nanan kawan ulahan here sa jahat, hanyeyiru munu ulun, kawan alimu gaib, idapa ibela nelang ngalat-ngerut.