Read Maasai Bible – Biblia Sinyati Enkiterunoto 1 Bible Online

Enkiterunoto 1 - Maasai Bible – Biblia Sinyati bible

Enkiterunoto 1

¹Ore apa te nkiterunoto, neitaa Enkai keper o enkop.

²Ore apa enkop nemeeta shoto[1], nemetii toki naa enaimin natii oriong o enguton. Ore Enkiyang'et e Nkai nelo tioriong inkariak.

³Nejo Enkai; inchoo metijing'a ewang'an, nejing ewang'an.

⁴Nedol Enkai ajo aisidai ewang'an. Nerishu Enkai ewang'an aitung'uaa enaimin.

⁵Neipot Enkai ewang'an ajo endama, neipot enaimin ajo enkewarie. Neaku keetae enteipa o entadekenya enkolong e dukuya.

⁶Nejo Enkai; “Inchoo metaa ketii oloing'ang'e erishata oo nkariak, naa inchoo metirisha inkariak o nkariak.”

⁷Neitayu Enkai oloing'ang'e nerish inkariak natii abori oloing'ang'e o nkariak naatii shumata oloing'ang'e, neaku neijia.

⁸Neipot Enkai oloing'ang'e ajo Keper. Neaku teipa neaku tadekenya enkolong e are.

⁹Nejo Enkai: “Inchoo inkariak naatii abori e keper eiturrurrokino pooki nebo, naa inchoo enkop natoyio eibalayu.” Neaku neijia.

¹⁰Neipot Enkai enkop natoyio ajo Enkop, ore inkariak naaiturrurro tenebo neipot ajo inaaiposha. Nedol Enkai ajo aisidai.

¹¹Nejo Enkai: “Inchoo enkop metoiu inkaitubulu, inkaitubulu naaiu ilanterera, neiu ilkeek loo lng'anayio ilanterera too mpukunot enye te nkop.” Neaku neijia.

¹²Neiu enkop inkaitubulu enyena, o nkaitubulu naaiu ilanterera te risioroto oo mpukunot enye, o lkeek ooiu ilng'anayio too lanterera lenye anaa empukunoto enye. Nedol Enkai ajo ai sidai.

¹³Neaku keetae enteipa neetae entadekenya enkolong e uni.

¹⁴Nejo Enkai “Inchoo metaa keetae ewang'an to loing'ang'e le keper peyie erishu endama te nkewarie, neaku sii ilooitodolu ilmonek too nkatitin oo nkolong'i o larin.

¹⁵Inchoo sii metaa ketii ewang'an oloing'ang'e le keper peyie eisho ewang'an enkop.” Neaku neijia.

¹⁶Neitayu Enkai ilkilang'ilang'eta aare sapuki, ore ina wang'an sapuk neitore endama, ore ewang'an kiti neitore enkewarie. Neitayu sii ilakir.

¹⁷Nepik ninche oloing'ang'e le keper peyie eisho ewang'an enkop neitore endama o enkewarie.

¹⁸Nerishu sii ewang'an tiatua enaimin, nedol Enkai ajo aisidai.

¹⁹Neaku teipa neaku tadekenya enkolong e ong'uan.

²⁰Nejo Enkai, “Inchoo metijing'a inkariak ntokitin naaishu, inchoo sii imotonyi meshomo to loing'ang'e le keper aaing'at enkop.”

²¹Metaa eitaa Enkai ing'uesi sapuki oo naaiposha o ntokitin naaishu pooki o naaiserpepiari naatii atua enaiposha too mpukunot enye, o pooki motonyi te risioroto e mpukunoto enye, nedol Enkai ajo aisidai.

²²Nemayian Enkai ninche ajo, “Entoisho niponariri aaiput inkariak oo naaiposha, naa nchoo sii imotonyi o loing'ang'e metubula te nkop.”

²³Neaku teipa neaku tadekenya, enkolong e imiet.

²⁴Nejo Enkai, “Inchoo enkop meitayu ing'uesi naaishu te risioroto oo mpukunot enye; inkishu o ng'uesi naaiserpepiari te nkop o ng'uesi e nkop te risioroto oo mpukunot enye.” Neaku neijia.

²⁵Neitayu Enkai ing'uesi e nkop te risioroto oo mpukunot enye o nkishu te risioroto oo mpukunot enye, o pooki toki naiserpepiari te nkop te risioroto empukunoto enye. Nedol Enkai ajo aisidai.

²⁶Nejo Enkai; “Emaitobira tung'ani te nkitanyaanyukoto ang onyaanyukie iyiook, nikincho ninche meitoria isinkir le naiposha, o motonyi oloing'ang'e, o nkishu o enkop pooki o pooki toki naiserpepiari te nkop.”

²⁷Metaa eitayio Enkai oltung'ani te nkitanyaanyukoto enye makewan. Te nkitanyaanyukoto Enkai eitayio ninye ninche, olee o eng'oruoi.

²⁸Nemayian Enkai ninche, nejoki “Entoisho, entoponari, emputa enkop nintorere. Entoria sii isinkir le naiposha o motonyi o loing'ang'e, o pooki toki ake ninye naishu naiseuseu te nkop.”

²⁹Nejo Enkai; “Ng'ura ajo aaishoo iyie pooki aitubului naiu ilanterera natii oriong enkop, o pooki shani oata ilng'anayio ilanterera intaa endaa.

³⁰O pooki ng'ues e nkop o pooki motonyi o loing'ang'e o pooki toki naiserpepiari te nkop o pooki toki naata enkiyang'et e nkishui, aaishoo enkaitubului pooki nanyori peyie intaa endaa.” Neaku neijia.

³¹Nedol Enkai pooki toki naitobirua ajo aisidai katukul. Neaku teipa neaku tadekenya enkolong e ile.