Read Maasai Bible – Biblia Sinyati Enkiterunoto 12 Bible Online

Enkiterunoto 12 - Maasai Bible – Biblia Sinyati bible

Enkiterunoto 12

¹“Nejoki Olaitoriani Abram, ‘Tupuku shomo tung'uai enkop ino o ltung'ana linono le sotua, o enkaji e papaai lino, shomo enkop naautaki.

²Naa kaaitainye iyie olosho sapuk, naa kaamayian iyie, naitaa enkarna ino kitok metaa iaku emayianata.

³Ekamayian lelo likimayian, ore ilo likidek naa kadek. Te iyie emayiani ilmarei pooki le nkop.’ ”

⁴Neaku eshomo apa Abram anaa enatiaaka Olaitoriani ninye, neiriamariyie Lot ninye, eshomo Abram aing'uaa Haran aa oloo larin ntomoni naapishana o imiet.

⁵Nerik Abram enkitok enye Sarai, o Lot olayioni lo lalashe lenye, o masaa pooki enye naatasotutuo, o ltung'ana oonoto te Haran, nepuku aapuo enkop e Kanaan. Ore peyie ebau enkop e Kanaan,

⁶nedung Abram atua enkop o meshomo ewueji e Shekem o metabaiki enetii oji olchani onyaanyukie olng'aboli te More. Ore ina rishata naa Lkanaan oomanya ina kop.

⁷Neipang'aki Olaitoriani Abram nejoki, “Ekaisho eishoi ino ena kop.” Metaa eteshetaka Abram Enkai teine olperere lo lasar, ilo Aitoriani oipang'aka ninye.

⁸Neidur teine nelo oldoinyo le nkalo oloosaen te Betel, neun olng'obor lenye. Etii Betel enkalo e Moikuape, netii Ai oloosaen. Neshetaki Abram teine olaitoriani olperere lo lasar neipot ninye enkarna o Laitoriani.

⁹Neitoki Abram aidur teine neito alo enkalo e Negeb.

¹⁰Netijing'a apa enkop e Kanaan olameyu oleng. Nedou Abram alotu enkop e Misiri, aparan, amu etagolo olameyu asapuku te nkop.

¹¹Ore pee eaku kebau Misiri, nejoki Sarai enkitok enye, “Kayiolo ajo aira enkitok sidai te neing'ori,

¹²naa tinikidol Ilmisiri, naa kejo, enkitok ele tung'ani ena. Naa kaar nanu matua nikipal iyie inchu.

¹³Tejo ira enkanashe ai peyie atum eseriani te nkaraki iyie, netum enkishui ai atumunyana te iyie.”

¹⁴Ore peyie ejing Abram Misiri, nedol Ilmisiri aajo aisidai ina kitok oleng.

¹⁵Nedol ilkituaak le Farao Sarai, neisisaki Farao, neriki ninye enkaji e Farao.

¹⁶Ore te nkaraki Sarai, eitaasaki Abram isupati, neishori intare o lmong'i o nkishu o sirkon o laisiaayiak, o nkaisiaayiak o sirkon lipong'a o ntamesin.

¹⁷Kake eitamio Olaitoriani Farao o enkaji enye to lmeitai kitok te nkaraki Sarai enkitok e Abram.

¹⁸Neipot Farao Abram nejoki, “Kainyoo ena nikintaasa nanu? Kainyoo peyie eitu kiliki ajoki enkitok ino Sarai?

¹⁹Kainyoo iyie pee itejo, enkanashe ino ninye,” metaa aawa ninye ayam aitaa enkitok ai? Ore naa iyie, nena enkitok ino toriko enchom.

²⁰Neishoru Farao inkitanapat aisho iltung'ana te nkaraki Abram; neisho ninye meshomo, tenebo o enkitok enye, o pooki toki naata.