Read Maasai Bible – Biblia Sinyati Enkiterunoto 13 Bible Online

Enkiterunoto 13 - Maasai Bible – Biblia Sinyati bible

Enkiterunoto 13

¹Metaa eilepa Abram alo aing'uaa Misiri, ninye o enkitok enye, o pooki toki naata, tenebo Lot aapuo enkop e Negeb.

²Naa karsis oleng Abram too nkishu o te nkosholai, o te saabu.

³Neidur ninye aing'uaa Negeb ometabaiki Betel ewueji apa netii olng'obor lenye te nkiterunoto aa erishata e Betel o Ai.

⁴Ewueji apa netang'asa aitobirie olperere lo lasar. Neipot Abram teine enkarna o Laitoriani.

⁵Ore sii ninye Lot oiriamunore Abram eboitare ninye, neeta sii ninye inkishu, o ntare, o lng'oborri,

⁶metaa meishaa enkop pokira aare te nemanya, amu aikumok imasaa e pokira.

⁷Nejing enchankar ilchekuti loo nkishu e Abram o lchekuti loo nkishu e Lot. Ore apa ina kata, eton emanya Ilkanaan o Lperisi enkop.

⁸Nejoki Abram Lot, “Meishiaakino sii ake nejing erishata ang enchankar anaa ejing erishata oo lchekuti linono o lchekuti laainei amu aikira emudong[4] nabo.

⁹Aimetii enkop pooki dukuya iyie? Toorori te nanu. Teniito iyie enkaina e kedianye, naito ene tatene naa tiniito iyie ene tatene, naito nanu ene kedianye.”

¹⁰Neraposhu Lot inkonyek enyena, nedol ajo ore oyerata le Yordan keeta inkariak te pooki wueji, anaa enkurma o Laitoriani, anaa enkop e Misiri te nkalo e Soar, ina kata eton eitu eidaikie Olaitoriani Sodom o Gomorra.

¹¹Metaa negelaki Lot kewan oyerata pooki le Yordan, nelo ninye oloosaen. Neoro o Abram teine.

¹²Nemany Abram enkop e Kanaan, nemany Lot inkanas oyarata, neidurrie olng'obor lenye ometabaiki Sodom.

¹³Ore apa iltung'ana le Sodom naa kaarruok, naa ilaing'okok oleng te dukuya Olaitoriani.

¹⁴Nejoki Olaitoriani Abram, eidipa atoorori Lot aing'uaa ninye, “Taraposhu inkonyek inono ing'ura aiteru teine nitii, moikuap, o kopikop o loosaen o oloo ntoluo.

¹⁵Ore ina kop pooki nidolita, naa kaaisho iyie tenebo o eishoi ino ntarasi.

¹⁶Kaitaba eishoi ino anaa enterit e nkop; metaa te neidimayu meikeni enterit enkop, neidimayu sii meikeni eishoi ino.

¹⁷Tudumunye, shomo tudung'o eneba enkadori o endapasho enkop, amu aaishoo iyie.”

¹⁸Neaku eidurrie Abram olng'obor lenye nelotu abik too lkeek oonyaanyukie ilng'abolo le Mamre otii Hebron. Ore teine Neshetaki Abram Olaitoriani olperere lo lasar.