Read Maasai Bible – Biblia Sinyati Enkiterunoto 14 Bible Online

Enkiterunoto 14 - Maasai Bible – Biblia Sinyati bible

Enkiterunoto 14

¹Ore too nkolong'i e Amrefel olaiguanani le Shina, Ariok olaiguanani le Elisar, Kedorloamer olaiguanani le Elam o Tidal olaiguanani le Gooim,

²neipiru kulo aiguanak olarrabal aarare Bera olaiguanani le Sodom, o Birsha olaiguanani le Gomora, o Shinab olaiguanani le Adma. O Shemeber olaiguanani le Sibooiim, olaiguanani le Bela (aa ninye Soar.)

³Neitushulu kulo pooki enjore aitaa nabo to erata le Siddim (aa taa enaiposha e munyan).

⁴Neisiaai Kederlaomer ilarin tomon aare, ore to lari le tomon oo kuni negolong'u ninche.

⁵Ore to lari le tomon oong'uan nelotu Kederlaomer, o laiguanak otii tenebo ninye aar Ilrefai te Ashterot-Karnaim, o Susim te Ham, o Emin te Sharekiriatiam

⁶o Lhori to ldoinyo lenye le Seir, ometabaiki Elparan olpolosie liong'ota.

⁷Neshukunye aapuo En-mishapat (aa ninye Kadesh) near enkop pooki oo Lmaleki, near sii Ilamori lelo oomanya Hasason tamar.

⁸Ore olaiguanani le Sodom o laiguanani le Adma o Seboiim o Bela (aa ninye Soar), neipang aapuo aajing olarrabal to erata le sidim

⁹aashetaki tenebo Kederlaomer olaiguanani le Elam, olaiguanani Tidal le Gooim, o Amrefel olaiguanani le Shinar o Ariok olaiguanani le Elisar. Ilaiguanak oong'uan egilunore ilaiguanak imiet.

¹⁰Nebore oerata le Siddim ingumot naatuturunyeki laam. Ore eilanyisho ilaiguanak le Sodom o Gomora, etusulakinote kulikae nena gumot, ore olkulikae nesaru oldoinyo.

¹¹Metaa ewaita ilmang'ati imasaa e Sodom o Gomorra o ndaiki enye pooki nepuo.

¹²Ewaita sii ninye Lot, olayioni lo lalashe le Abram omanya Sodom tenebo o masaa enyena nepuo.

¹³Ore obo oilanyishe, nelotu ainosaki Abram Olheburaniai omanya ina kata embata oo lkeek oonyaanyukie ilng'abolo te Mamre oo Lamori, olalashe le Eshkol o Aner, laa ilootoning'ore ninche Abram.

¹⁴Ore peyie ening Abram inchere ewaki oltung'ani le mudong enye eyararoto, nerik iltung'ana ooyiolo olarrabal laa iinot le nkaji enye, iltung'ana oora esiana iip uni o tomon o isiet, nelo asujaa ninche ometabaiki Dan.

¹⁵Neor ninye iltimito lenyena agilunore ninche kewarie. Etii sii ninye o ilaisiaayiak lenyena olarrabal, metaa ore ninye tenebo ilaisiaayiak lenyena, etudumutua ninche lelo mang'ati nemiraa ometabaiki Hoba natii moikuape e Dameski.

¹⁶Nerrinyu ninye imasaa pooki naawaki tenebo sii oltung'ani lenye le mudong Lot o masaa enyena o nkituaak o ltung'ana.

¹⁷Ore peyie eidip Abram atushukunye eisulie olarrabal le Kedorloamer tenebo ilaiguanak ooboitare, nepuku olaiguanani le Sodom alo anang'are to erata le Shafe, (aa ninye oerata lo laiguanani.)

¹⁸Neyau Melkisedek, olaiguanani le Salem emukate o enaisho oo sabibu: ore apa ninye naa olapolosani le Nkai natii shumata aisul.

¹⁹Nemayian ninye ejo; “Metamayiana Enkai natii shumata aisul Abram, ilo oitobira keper o enkop.

²⁰Metamayiana Enkai natii shumata aisul, ilo otipika ilmang'ati linono inkaik inono.” Neisho Abram Melkisedek ematua e tomon e pooki toki.

²¹Nejoki olaiguanani le Sodom Abram, “Inchooki olorere ake, ore imasaa niya aitaa ininono.”

²²Kake etiaaka Abram olaiguanani le Sodom, “Ainosa olmumai to Laitoriani Enkai natii shumata aisul, oitobira keper o enkop,

²³inchere maya hoo pito ebaiki enkeene enamuke, anaa toki ino pooki, peyie mijo ake aitaa nanu Abram karsis.

²⁴Meeta toki naya nanu meteleku entoki nainosa ilbarnot laainei o ematua oo ltung'ana laaturubare, aa Aner o Eshkol o Mamre neya sii ninche erubata enye.”