Read Maasai Bible – Biblia Sinyati Enkiterunoto 15 Bible Online

Enkiterunoto 15 - Maasai Bible – Biblia Sinyati bible

Enkiterunoto 15

¹Ore te siadi e kuna baa, nelotu ororei lo Laitoriani enetii Abram te nduaata ejo, “Miureishoyu Abram, kara nanu elong'o ino, kesapuku oleng enkishooroto nikinchori iyie.”

²Kake newaliki Abram, “Olaitoriani Enkai, kainyoo doi kincho, kadolita ajo keloito enkishon dukuya maata enkerai, ore olajung'oni le nkaji ai naa Elieser le Dameski?”

³Neitoki ake Abram ajo, “Kesipa eitu kincho nanu eishoi, ore osinka otoiwuoki te nkaji ai ninye oyooki aaku olajung'oni lai.”

⁴Ng'ura, neirorie Olaitoriani ninye ajoki, “Ore ele tung'ani meaku olajung'oni lino, olayioni loo nkiri inono ninye likijung.”

⁵Neipang'unye ninye boo nejoki, “Ng'ura sii iyie keper, ninken ilakir tenaa aindim atipika esiana.” Neitoki ake ajoki, “Metaa neijia ebayu eishoi ino.”

⁶Neiruk Abram Olaitoriani, neikenakini ninye aajo oloitashe too sipat.

⁷Nejoki Olaitoriani ninye, “Kara Olaitoriani likintayio te Uri oo lkadayo peyie aaisho iyie ena kop intaa enino.”

⁸Kake etejo Abram, “Oi Olaitoriani Enkai, kaji aiko tenayiolou ajo keaku enaai?”

⁹Nejoki Enkai ninye, “Iyakaki entawuo oo larin okuni o enkine oo larin okuni o lmeregesh loo larin okuni o enturkuluo o emotonyi kinyi.”

¹⁰Neyaki Abram Enkai kuna tokitin pooki nesash ninche maare neiteleiki enkiperrati nabo aishiaakinye enkae; kake eitu edung nena motonyi asash.

¹¹Ore pee edoiki ilkurragoso nena popoki, neiture Abram aitalamaa.

¹²Ore etaa kedoyio enkolong, netir injio naairoshi Abram; nejing oloputukunyi kitok le naimin kitok shumata ninye.

¹³Nejoki Olaitoriani Abram, “Tayiolo miata olng'ash ajo keaku eishoi ino ilomon te nkop neme enenye, neaku sii irrindiki teine, naa keibookini enkop too larin iip ong'uan;

¹⁴kake kayau endung'okinoto enkiguana olosho oisiaaita, ore te siadi, nepuku ninche teinakop etudupote.

¹⁵Ore iyie, ilo enetii iloo papaai lino to sotua nikinukari itaa olpayian kitok oiputakinote ilarin.

¹⁶Naa keshukunye eishoi ino ene te ishoi e ong'uan, amu eton eitu elulung'ayu ing'ok oo Lamori.”

¹⁷Ore peyie edoyio enkolong etomisimiso enkop neliooyu emoti napuru o lang'at le nkima elo te rishata e nena sashat.

¹⁸Ore teina olong, neitobir Olaitoriani osotua o Abram nejoki, “Ore iishoritin inono ekaisho ena kop, eiteru to lkeju le Misiri o metabaiki olkeju sapuk ilo keju le Frati.

¹⁹Enkop oo Lkanaan o Lkeniti o Lkenisi o Lkadmoni

²⁰o Lhiti o Lperisi o lrafai

²¹o Lamori o Lkanaani o Lgirgashi o Lyebusi.”