Read Maasai Bible – Biblia Sinyati Enkiterunoto 17 Bible Online

Enkiterunoto 17 - Maasai Bible – Biblia Sinyati bible

Enkiterunoto 17

¹Ore pee eaku Abram oloo larin intomoni naaudo o naaudo neipang'aki Olaitoriani ninye nejoki, “Kara nanu Enkai Magilani, toning'oki nanu nias isupati,

²naa kaitobir osotua lai lo lning'o te rishata ai o iyie, naa kaponaa eishoi ino.”

³Nebatata Abram te nkomom enye, neirorie Enkai ninye ajoki,

⁴“Ing'ura etii osotua lai tenebo iyie, naa iyaku menye loo loshon kumok.

⁵Mikintokini aajo enkarna Abram, kake keaku aikiji enkarna ino Abraham[7] amu kaaitaa iyie menye loo lororani too loshon.

⁶Naa kaaitubulaa oleng, naa kaitayu iloshon tiatua iyie, naa kepuku ilaiguanak tiatua iyie.

⁷Naa kaitasheyie nanu osotua lai te rishata ai o iyie o eishoi ino indipa iyie atulusoi tiatua iishoritin enye olning'o lo sotua lai loo ntarasi. Naa kaaku Enkai te iyie o tenebo eishoi ino nikisuju.

⁸Naa kaaisho iyie tenebo o eishoi ino nikisuju enkop nitaayie omoni o enkop pooki e Kanaan metaa enino o ntarasi naa kaaku Enkai enye.”

⁹Neitoki Enkai ajoki Abraham, “Ore iyie imbung'a olning'o lai, lo sotua iyie o eishoi ino too iishoritin pooki naapuonu te siadi iyie.

¹⁰Osotua lai ele, limbung iyie, te rishata ai o iyie o eishoi nikisuju iyie: ore pooki lee tiatua intae, naa kemurati.

¹¹Kemurati intae isuaten oo seseni linyi, naa keaku ina olmonekie lo sotua te rishata ai o ntae.

¹²Ore pooki ng'ae oitabayie inkolong'i isiet naa kemurati, pooki lee tiatua iishoritin pooki, oloba anaa olotoiwuoki te nkaji ino, anaa oloinyang'uaki too mpisai inono te pooki omoni leme oinoti linyi.

¹³Ore ilo oino te nkaji ino o ilo oinyang'uno too mpisai, nemurati pokira. Metaa ketii osotua lai atua iseseni linyi anaa osotua loo ntarasi

¹⁴Ore pooki lee lememurata esuate o sesen lenye, nedung'ori aaiwuang'ie tiatua iltung'ana lenyena amu etigila osotua lai.”

¹⁵Nejoki Enkai Abraham, “Ore Sarai enkitok ino, mintoki aipot ninye ajo Sarai, kake keaku keji enkarna enye Sara.

¹⁶Naa kamayian nanu ninye, ore sii naa kaaisho iyie enkayioni te ninye. Naa kamayian nanu ninye neaku ninye ng'otonye oo loshon, kepukunye ninye ilaiguanak loo loreren.”

¹⁷Nebatata Abraham te nkomom enye nekueni eirorie kewan nejo; “Keikini enkerai olpayian kitok oitabayie ilarin iip nabo? Keidim Sara naitabayie ilarin ntomoni naudo atoiu enkerai?”

¹⁸Nejoki Abraham Enkai, “Oi incho ina kisiligata metaa Ishmael eipirare.”

¹⁹Nejo Enkai, “A'a, kesipa eikiiki enkitok ino Sara enkayioni, naa impot enkarna enye ajo Isaak, naa kaitasheyie osotua lai o ninye, metaa osotua loo ntarasi o too iishoritin naapuonu te siadi ninye.

²⁰Ore too naipirta Ishmael, aatoning'o iyie, idol ajo kamayian nanu ninye naitubulaa naponaa oleng. Naa keaku ninye menye ilaiguanak tomon aare, naa kaitaa ninye olosho sapuk.

²¹Kake kaitasheyie nanu osotua lai te Isaak, aikiiki Sara iyie te rishata naaijo ena, telde ari olotu.”

²²Ore peyie eidip airorie ninye, nelo Enkai aing'uaa Abraham.

²³Neya Abraham olayioni lenye o tenebo irrindiki pooki ootoiwuoki te nkaji enye anaa iloinyang'uaki too mpisai enyena o pooki lee otii atua ilewa le nkaji e Abraham, nemurat pooki isuaten oo seseni lenye ina olong, anaa enaitanapa Enkai ninye.

²⁴Ore apa Abraham naa oloo larin intomoni naudo o naudo ina kata peyie emurati esuate osesen lenye.

²⁵Ore Ishmael olayioni lenye naa oloo larin tomon oo kuni peyie emurati esuate osesen lenye.

²⁶Ore teina olong ake nemurati Abraham tenebo olayioni lenye Ishmael.

²⁷O lelo lewa pooki le nkaji enye, inot le nkaji enye, o lelo ooinyang'uaki too mpisai too lomon, nemurati pooki tenebo ninye.