Read Maasai Bible – Biblia Sinyati Enkiterunoto 2 Bible Online

Enkiterunoto 2 - Maasai Bible – Biblia Sinyati bible

Enkiterunoto 2

¹Metaa eidipaki keper o enkop o ntokitin pooki naatii.

²Ore te nkolong e naapishana neidip Enkai ina siaai enye nataasa. Neyeng'iyeng'a te nkolong e naapishana te siaai enye pooki nataasa.

³Metaa etamayiana Enkai enkolong e naapishana neitisiny, amu teina olong apa eyeng'iyeng'e ninye te siaai enye pooki nataasa e nkitobirare.

⁴Kuna ninche iishoritin e keper o enkop ina kata pee eitobiri. Ore te nkolong apa naitobirua Olaitoriani Enkai enkop o keper,

⁵eton meetae hoo ilkeek te nkop anaa inkaitubulu naabulu ti ong'ata eton eitu eisho Olaitoriani Enkai enkop menoto enchan, nemeetae sii apa oltung'ani otur enkop.

⁶Kake enkinuku ake nadumunye te nkop aitashal oriong e nkop, pooki.

⁷Neitoki Olaitoriani Enkai aitobiru oltung'ani te nterit e nkop. Nekutaki inkumeishin enyena entooma e nkishui, neaku oltung'ani oloata enkishui.

⁸Neun Olaitoriani Enkai enkurma, te Eden te nkalo oloosaen. Nepik ilo tung'ani oitobira atua.

⁹Neitubulu te nkop Olaitoriani Enkai ilkeek pooki oitiship inkonyek naa sidain sii te ndaa. Keuno sii apa olchani le nkishui te mpolos enkurma. Netii sii olchani le eng'eno oo supati o ntorrok.

¹⁰Kerukunye sii apa olkeju oing'uaa Eden opik enkurma enkare. Neoro ilo keju teine aaku ilkejek oong'uan.

¹¹Ore enkarna olkeju le dukuya naa keji Pishon, naa ninye ilo oruko aman enkop pooki e Hafila, ine netii saabu.

¹²Naa ore saabu eina kop aisidai. Ketii isoito oimerlel te sidano.

¹³Ore olkeju li are naa Gihon; naa ninye oshi oman enkop pooki e Kush.

¹⁴Ore olkeju liokuni naa Tigris, nerukokino enkalo oloosaen te Asiria. Ore olkeju liong'uan naa Frati.

¹⁵Neya Olaitoriani Enkai ilo tung'ani apik ninye enkurma e Eden peyie etur neramat sii.

¹⁶Neitanap Olaitoriani Enkai oltung'ani ajoki, “Ore pooki shani otii atua enkurma indim ainosa,

¹⁷kake ore olchani le ng'eno oo supati o ntorrok minya ake, amu ore kenya enkolong ninya, meeta inchere pee miye.”

¹⁸Nejo Olaitoriani Enkai, “Meishiaakino neton olee aa ninye ake, ekaitaiki enkaretoni naishiakino ninye.”

¹⁹Metaa neitayu Olaitoriani Enkai pooki ng'ues e ong'ata o motonyi pooki o loing'ang'e neyau ninche enetii oltung'ani, pee edol eneiko teneisho ninche inkarn, naa ore enkarna ake ninye naba anaa enaishoo pooki toki neaku ina.

²⁰Neisho ilo tung'ani inkarn inkishu pooki, o nena motonyi o loing'ang'e o pooki ng'ues e ong'ata; kake ore ilo tung'ani eitu etumi enkaretoni naishiaakino ninye.

²¹Metaa etipika Olaitoriani Enkai injio naairoshi ilo tung'ani meirurayu. Ore eirura, neitayu olarasi obo lenye nenuk ine wueji too nkiri.

²²Ore ilo arasi oitayio Olaitoriani Enkai te ilo tung'ani neitaa enkitok, nerikoki ninye ilo tung'ani.

²³Nejo ilo tung'ani, “Kesipa ele taata oloito loo loik laainei, naa eoroti osesen lai. Ekeipoti ninye aajo enkitok amu eitayioki ninye tiatua olee.”

²⁴Ina paa keorore olee menye o ng'otonye, neibung'are enkitok enye neaku pokira are osesen obo.

²⁵Ore apa ilo olee o enkitok enye meeta apa entoki naishopito nemedol enkurruna.