Read Maasai Bible – Biblia Sinyati Enkiterunoto 23 Bible Online

Enkiterunoto 23 - Maasai Bible – Biblia Sinyati bible

Enkiterunoto 23

¹Eishua apa Sara ilarin iip o tikitam o pishana, lelo apa ilarin le nkishui e Sara.

²Neye Sara te Keriath-arba (aa ninye Hebron), te nkop e Kanaan. Nelotu Abraham aishiraki to sina Sara, neishir oleng.

³Neinyototo Abraham te dukuya ina tang'atang'a enye, nejoki lelo Hiti,

⁴“Kara olomoni o lalotoni tiatua intae, enchooki ewueji tiatua intae metaa ewueji enkurare pee atum atuturoi entang'atang'a ai aiwuang'ie too nkonyek aainei.”

⁵Newaliki Ilhiti Abraham aajoki,

⁶“Toning'o iyiook olkitok lang, ira iyie olkitok magilani tiatua iyiook. Tuturoi entang'atang'a ino te nkurare naba anaa enigelu too nkuraren ang, meetae hoo obo lang Likimitiki enkurare enye anaa kimitiki eniturorie entang'atang'a ino.”

⁷Neinyototo Abraham neirrugo te dukuya lelo Hiti oopeny enkop.

⁸Nejoki ninche, “Tiniyieuu nanukaa entang'atang'a ai aiwuang'ie too nkonyek aainei, entoning enajo, entoomonokoki te Efron olayioni le Sohar,

⁹peyie aaisho enkapune e Makpela naata to lpijata lo lokeri lenye. Inchoo maaishoo te nkinyang'a enye pooki idolitata metaa ewueji ai oo nkuraren.”

¹⁰Netonita sii apa ninye Efron tiatua Lhiti. Newaliki Efron, ilo Hiti Abraham ening'ito ilhiti o pooki oimita kishomi e nkanasa, ajo:

¹¹“A'a, olkitok lai, toning'o enajo, ekaisho olokeri tenebo enkapune natii atua, te dukuya ilayiok pooki lo lorere lai, aaishoo iyie tunukarie entang'atang'a ino.”

¹²Neirugo Abraham te dukuya olorere le ina kop.

¹³Nejoki Efron ening'ito olorere le ina kop, “Kake tenaa aikining, aatasayia inchooki matalaa iropiyiani o lokeri, tang'amai elaata te nanu peyie atum atuturoi entang'atang'a ai teine.”

¹⁴Newaliki Efron Abraham ajoki,

¹⁵“Olkitok lai, toning'oki: amaa eoroti e nkop nanya shekeli iip ong'uan e nkosholai, kainyoo ina te rishata ai o iyie? Tuturoi entang'atang'a ino.”

¹⁶Nening'okino Abraham o Efron ina laata. Neikenaki Abraham Efron inkoshola naaipotuo ening'ito Lhiti, shekeli iip ong'uan e nkosholai anaa enkinyiang'a oo lamirak.

¹⁷Metaa eishooki Abraham olokeri le Efron otii Makpela natii oloosaen le Mamre olokeri oata enkapune tiatua o lkeek ootii olokeri,

¹⁸eishooki Abraham metaa enenye te dukuya Ilhiti, o lelo pooki ooim enkishomi ejing enkanasa.

¹⁹Ore peyie eidipayu ina neturoo Abraham Sara enkitok enye te nkapune o lokeri le Makpela natii oloosaen le Mamre (aa ninye Hebron) te nkop oo Lkanaan.

²⁰Ore olokeri tenebo enkapune natii atua eishooitie Lhiti aaisho Abraham metaa ewueji e nkurare oo ltung'ana lenyena.