Read Maasai Bible – Biblia Sinyati Enkiterunoto 24 Bible Online

Enkiterunoto 24 - Maasai Bible – Biblia Sinyati bible

Enkiterunoto 24

¹Etaa apa Abraham olpayian kitok otobikoyie ilarin kumok oleng, netamayiana Olaitoriani ninye te pooki toki.

²Nejoki Abraham osinka lenye otobiko oleng te nkaji laa ninye oitasheiki imasaa enyena pooki, “Tipika enkaina kirrisha nkupesir aainei,

³naa kaainosie iyie olmumai to Laitoriani, te Nkai e keper o enkop, inchere miyamaki olayioni lai enkitok too ntoyie oo Lkanaan laa ninche amanya atua.

⁴Kake ilo enkop ai o lgilata lai, nirikoki olayioni lai Isaak enkitok.”

⁵Nejoki olaisiaayiani ninye, “Keidimayu pee eany enkitok aasuju alotu ena kop, karik olayioni lino arriny ina kop apa ning'uaa?”

⁶Nejoki Abraham ninye, “Toduaa ake mirriny olayioni lai ine.

⁷Ore Olaitoriani Enkai e keper laaitayio nanu te nkaji e papaai lai o te nkop apa naatoinyieki, laairorie naainosie olmumai naajoki, ‘Iishoritin inono aisho ena kop.’ Ekeirriwaa olmalaika lenye te dukuya iyie, naa ilo iyie arikoki olayioni lai entito teine.

⁸Naa tenemeyieu enkitok nikisuju iyie, nimikintoki olmumai lai aibung: kake mirrinyoki ake olayioni lai ine.”

⁹Metaa nepik osinka enkaina enye kirrisha enkupes e Abraham olkitok lenye, nenya olmumai te nkaraki ina bae.

¹⁰Nereu osinka intamesin tomon o lkitok lenye nelo eeta nkishoorot kumok oo mpukunot pooki to lkitok lenye nedumunye alo Mesopotamia, enkanasa e Nahor.

¹¹Neitigil intamesin kung tiauluo enkanasa te mbata enchorro etaa teipa erishata napuonu inkituaak aaoku enkare.

¹²Nejo ninye, “Oi Olaitoriani Enkai o lkitok lai Abraham, inchooki ena olong dupoto aatoomono iyie, nintodolu enyorrata ino nauno to olkitok lai Abraham.

¹³Lele nanu oitashe te mbata enchorro e nkare, ore intoyie oo ltung'ana lena anasa egira aapuku aaipang'u aoku enkare.

¹⁴Inchoo metaa ore entito najoki, aatoomono intadou emoti ino matooko enkare, naajoki tooko, naa kaokoki sii intamesin inono inchoo metaa ninye itegelaka osinka lino Isaak. Teina ayiolou ajo intodolua enyorrata nauno to olkitok lai.”

¹⁵Ore eton eitu eishu inkirorot, nemaniki Rabeka entito e Betuel olayioni le Milka, enkitok e Nahor olalashe le Abraham elotu eeta emoti to loililai lenye.

¹⁶Naa entito sidai oleng tining'or, eselenkei neitu aikata aboitare olee, nedoiki enchorro, neiput emoti enye enkare, neilepu.

¹⁷Nekuet osinka anang'are ninye nejoki, “Aatoomono inchooki enkiti are naok te moti ino.”

¹⁸Nejo ninye, “Tooko olkitok lai,” nesiokisioki aitadou emoti te nkaina enye neisho ninye metooko.

¹⁹Ore peyie eidip aishoo ninye metooko nejoki, “Ekaokoki sii intamesin inono o metaba anaa neraposho.”

²⁰Metaa eijililiaka emoti enye empeut neipirri arrinyo enchorro aoku omeitaraposho intamesin enyena pooki.

²¹Neing'or osinka ninye aitirring'a meiro, ajurru tenaa keitudupo Olaitoriani elotunoto enye anaa keitu.

²²Ore peyie eidip intamesin aatookisho, neitayu oltung'ani olgisoi le saabu laa eoroti nabo e shekel te nkiroishi o lkataarri aare loo nkaik enyena oobaya enkiroishi enye shekeli tomon e saabu.

²³Nejo, “Aatasayia tolikioki ajo ira entito e ng'ae? Ketii olgilata likirrag enkaji e papaai lino?”

²⁴Nejoki ninye ninye, “Kara entito e Betuel olayioni le Milka otoikio Nahor.”

²⁵Neitoki ajoki, “Kiata sii pokira, olkujita o lgilat ooirragi.”

²⁶Neirrug oladuoo tung'ani elukunya aserem Olaitoriani.

²⁷Nejo: “Meisisi Olaitoriani Enkai o lkitok lai Abraham, leitu aing'uaa enyorrata enye nauno o bayarotisho enye to Laitoriani lai. Ore nanu, aatorikuo Olaitoriani te nkoitoi arikoki enkaji oo lalashera lo lkitok lai.”

²⁸Neipirri ina tito aliki enkaji e ng'otonye kuna baa.

²⁹Eeta apa Rebeka olalashe oji enkarna enye Laban. Nepuku Laban akuet alo enetii ilo tung'ani te nchorro.

³⁰Ore peyie edol olgisoi o lkataarri otii inkaik e nkanashe, nening'u sii irorei le Rebeka enkanashe enye oojo, “Neijia aatiaaka oltung'ani,” nelo enetii oltung'ani; neinepu eitashe te mbata oo ntamesin te nchorro.

³¹Nejoki, “Tijing'u, olomayiana lo Laitoriani, kainyoo peyie intashe tiauluo: naidipa aitobira enkaji o ewueji oo ntamesin.”

³²Metaa etijing'ua ilo tung'ani atua aji, nelaku Laban ilolan too ntamesin, neisho ninye ninche endaa oo ntamesin. Neisho sii ninye enkare naisujie inkejek enyena o tenebo lelo oiriamunore.

³³Neirragakinyeki ninye endaa meinosa, kake etejo ninye; “Manya endaa o metaba anaa nairo ororei laayawua.” Nejoki Laban ninye, “Iroro.”

³⁴Metaa etejo ninye, “Kara nanu osinka le Abraham! Netamayiana Olaitoriani olkitok lai oleng, neitaa ninye karsis:

³⁵eishoo ninye inkishu o ntare o nkoshola o saabu o sinkan o nkaisiaayiak o ntamesin o sirkon.

³⁶Ore Sara, enkitok olkitok lai, etoikio ninye enkayioni etaa moruo. Ore nena masaa pooki neishoo olayioni lenye.

³⁷Aainosie olkitok lai olmumai ajoki, ‘Milo iyie ayamaki olayioni lai enkitok too ntoyie oo Lkanaan lena kop naamanya.

³⁸Kake shomo enkaji e papa lai, o ltung'ana lang torikoki olayioni lai enkitok.’

³⁹Najoki nanu olkitok lai, ‘Keidimayu pee aany enkitok aasuju nanu.’

⁴⁰Kake aatiaaka ninye nanu, ‘Ore Olaitoriani laa ninye laarikoo naa keirriu olmalaika lenye tenebo iyie neitumunyan enkoitoi ino, nirikoki olayioni lai enkitok too ltung'ana lang le nkaji e papa.

⁴¹Niking'uaa ina kata olmumai tinilo enetii iltung'ana laainei. Naa tinikimitiki ninche ninye, nimikintoki aibung iyie olmumai lai.’

⁴²“Nalotu duoo nanu enchorro najo, ‘Oi Olaitoriani Enkai o lkitok lai Abraham, ntumunyanakaki tena kata enkoitoi naim aitorioo.

⁴³Lele nanu oitashe te mbata enchorro e nkare, inchoo entito nalotu aoku enkare naa tenajoki: Aatoomono inchooki te moti ino; enkiti are naok.

⁴⁴Naajoki nanu! Tooko naa kaokoki sii intamesin inono, inchoo metaa ninye enkitok nategeleka Olaitoriani olayioni lo olkitok lai.’

⁴⁵“Ore sii ake eitu aishu enkiroroto oltau lai, nelotu Rebeka enapita emoti e nkare to loililai, nedoiki enchorro aoku enkare. Najoki ninye, ‘Aatoomono inchooki matooko.’

⁴⁶Nesioki aitadou emoti enye to loililai lenye nejo; ‘Tooko, naa kaisho sii ninche ntamesin inono.’ Neaku atooko nanu neisho sii nena tamesin enkare.

⁴⁷Naitoki aikilikuan ninye ajoki: ‘Ira entito e ng'ae?’ Nejo, ‘Entito e Betuel olayioni le Nahor otoikio ninye Milka.’ Napik olgisoi enkume enye o lkataarri inkaik enyena.

⁴⁸Nairrug elukunya aserem Olaitoriani, naisis Olaitoriani Enkai o lkitok lai Abraham, ilo laatorikoyie te nkoitoi nasipa matoriko entito o lalashe lo lkitok lai arikoki olayioni lenye.

⁴⁹Ore naa taata, tenaa aiyasiasa esupatisho o esipata to lkitok lai, entolikioki nanu, naa tinimiasiasa entolikioki nanu peyie atum aibelekenyakinoyu enkaina e tatene aashu kedianye.”

⁵⁰Newal Laban o Betuel aajo, “Ore ena bae naa Olaitoriani eing'uaa. Mikindiim aatiaaki iyie entorrono anaa esidai.

⁵¹Ing'ura neeina Rebeka natii dukuya iyie, toriko ninye shomo metaa ninye enkitok olayioni lo lkitok lino anaa enairoro Olaitoriani.”

⁵²Ore peyie ening olaisiaayiani le Abraham irorei lenye neirrugo abaiki enkop te dukuya Olaitoriani.

⁵³Neyau ilo aisiaayiani intokitin naagol enkinyiang'a o enkosholai o saabu o nkilani neisho ninche Rebeka. Eishoo sii ninye olalashe lenye tenebo ng'otonye intokitin naagol enkinyiang'a.

⁵⁴Ore ninye o lelo tung'ana apa ootii tenebo ninye, nedaa neokisho, neirrag ine. Ore pee einyototo ninche tadekenya, nejo ninye, “Enchooki matushukoyu enetii olkitok lai.”

⁵⁵Nejo olalashe tenebo ng'otonye, “Enchoo entito eng'as aton tenebo iyiook inkuti olong'i, anaa naaji inkolong'i tomon, ore peyie eishunye neidim ashomo.”

⁵⁶Kake etiaaka ninye ninche, “Mikintokiki ailitilit, anaa enaidipa Olaitoriani aitumunyana enkoitoi ai, enchooki mashomo enetii olkitok lai.”

⁵⁷Nejo ninche; “Aikimpot entito aaikilikuan enajo.”

⁵⁸Neipot ninche Rebeka, nejoki ninye, “Amaa airiamariyie ele tung'ani?” Newal ajo, “Ekalo.”

⁵⁹Neaku eishoo ninche Rebeka enkanashe enye meshomo tenebo enkaisiaayiani enye, o sinka le Abraham tenebo iltung'ana lenyena.

⁶⁰Nemayian ninche Rebeka nejoki: “Enkanashe ang taa iyie ng'otonye oo nkalifuni, o nkalifuni tomon, naa inchoo metujung'o eishoi ino kishomi e lelo ooiba ninche.”

⁶¹Nedumunye Rebeka tenebo inkaisiaayiak enyena, neked intamesin neirukurukore ilo tung'ani, neaku etoriko ilo aisiayani Rabeka, nelo enkop enye.

⁶²Eewuo apa Isaak ina kata eing'uaa Beer-lahai-roi nelotu abik te Negeb.

⁶³Nepuku Isaak alo ong'ata adamisho teipa, neshumu inkonyek enyena, nedol intamesin naapuonu.

⁶⁴Neshumu Rebeka inkonyek enyena nedol Isaak, ore peyie edol ninye nedou te ntames,

⁶⁵nejoki ilo aisiaayiani, “Kalo tung'ani lido olotu ti ong'ata anang'are iyiook?” Nejoki ilo aisiaayiani, “Olkitok lai.” Neitayu enkarasha aitoip kewan.

⁶⁶Neinosaki ilo aisiaayiani Isaak imbaa pooki naataasate.

⁶⁷Nerik Isaak ninye atua olng'obor. Neya Rebeka neaku ninye enkitok enye, nenyorru ninye. Neaku eitagoloki apa Isaak te keeya e ng'otonye.