Read Maasai Bible – Biblia Sinyati Enkiterunoto 25 Bible Online

Enkiterunoto 25 - Maasai Bible – Biblia Sinyati bible

Enkiterunoto 25

¹Eyama apa Abraham ae kitok naji enkarna enye Ketura.

²Neiki ninye Simran o Yokshan o Medan o Midian o Ishbak o Shua.

³Ore apa Tokshan naa ninye menye le Sheba, o Dedan. Ore ilayiok le Dedan, naa Asshurim o Letushim o Leumim.

⁴Ore ilayiok le Midian naa Epa o Eper o Hanok o Abida o Eldaa. Ore apa kulo naa nkera e ketura.

⁵Neisho Abraham pooki toki naata Isaak.

⁶Kake eishoo Abraham ilayiok loo nkapiak enyena inkishoorot, ore eton eishu, neidurrie ninche aitung'uaa olayioni lenye Isaak meshomo enkop oloosaen.

⁷Kulo larin le nkishui e Abraham, ilarin iip o ntomoni naapishana o imiet.

⁸Neye Abraham etaa olpayian kitok etamorua amitunye, nepiki ninye eneiturrurrorre olorere lenye.

⁹Nenukaa ninye ilayiok lenyena Isaak o Ishmael te nkapune e Makpela te nkurma e Efron olayioni le Soha loo Lhiti

¹⁰to loosaen le Mamre, te nkurma nainyiang'ua apa Abraham too Lhiti. Metaa teine apa etunukayioki Abraham tenebo o enkitok enye Sara.

¹¹Ore peyie eidip Abraham atua, nemayian Enkai Isaak olayioni lenye. Nebik Isaak te Beer-lahai-roi.

¹²Kulo ninche ilayiok le ishoi e Ishmael olayioni le Abraham otoikio ninye Haga e Misiri naa enkaisiaayiani apa e Sara.

¹³Kuna ninche nkarn oo layiok le Ishmael anaa enaikunakino te inoto enye: Nebaiot aa ninye olkikau le Ishmael o Kedar o Adbeel o Mibsam,

¹⁴Mishma o Duma o Masa

¹⁵o Hadad o Tema o Yetur o Napish o Kedema.

¹⁶Kulo ninche ilayiok le Ishmael naa kuna inkarn enye, too nkang'itie enye o too lng'oborri lenye. Ilkituaak tomon o are anaa iloshon lenye.

¹⁷(Kulo ilarin le nkishui e Ishmael, ilarin iip o tomoni uni o naapishana, neitianya aye, neiturrurrokino ninye olorere lenye.)

¹⁸Nemany ebaiki Hafila o meshomo Shur, natii enkalo o loosaen le Misiri te nkalo e Asiria. Etamanya apa ninye enetalakinore olikae orere pooki lenye.

¹⁹Kulo ninche ilayiok le ishoi e Isaak olayioni le Abraham: ore apa Abraham naa ninye menye le Isaak.

²⁰Ore apa Isaak naa oloo larin artam peyie eyam enkitok enye Rebeka, ina tito e Betuel le Aramean te Padan Aram, ina anashe e Laban le Aramean.

²¹Neomon Isaak Olaitoriani te nkaraki enkitok enye, amu koolupi apa ninye, newal Enkai enkomono enye, neiroshiu Rebeka enkitok enye.

²²Nepupung'a nkera tiatua enkoshoke enye, nejo ninye, “Amaa tenaa inji etiu, kainyoo doi peyie aishu? Nelo ninye aikilikuan Olaitoriani ina bae.”

²³Nejoki Olaitoriani ninye, “Etii iloshon aare atua enkoshoke ino, naa ore lelo tung'ana pookira liiu, naa ekeori, ekegolu obo alang olikae, ore olbotor naa keisiaai oloti.”

²⁴Ore peyie ebau inkolong'i enyena peyie ejing aji, eeta ilmao te nkoshoke enye.

²⁵Ore olotang'asunye naa kenyokie, naa keju osesen lenye pooki anaa ilpapit le nkila, neipot ninye aajo enkarna Esau.

²⁶Neitoki olalashe lenye asuju, ore enkaina enye neibung'ita entutunyo e Esau, neipot ninye aajo Yakobo[11]. Ore apa Isaak naa oloo larin ntomoni ile peyie eiki Rebeka ninye lelo mao.

²⁷Ore peyie ebulu lelo ayiok, neaku Esau olang'oroni padan naa oltung'ani sii liong'ota. Ore Yakobo, naa oltung'ani obor ogira aton too lng'oborri.

²⁸Kenyor apa Isaak Esau te nkaraki nkiri oo ng'uesi naayaki ninye. Ore Rebeka nenyor Yakobo.

²⁹Ore nabo olong egira Yakobo ayier imotori oo nkaitubulu e nkurma enye, nebau Esau eing'uaa ong'ata neeta esumash oleng.

³⁰Nejoki Esau Yakobo; “Etaa kaye te sumash, inchooki mainosa ina toki nayiara natii emoti. Ore te nkaraki ina, neji enkarna enye Edom[12].”

³¹Newaliki Yakobo ninye ajoki “Tang'asa timirakaki esipata e kikausho ino.”

³²Nejo Esau, “Etaa kaye, kene nyoo tipat naata esipata e kikausho te nanu?”

³³Nejoki Yakobo, “Tang'asa inosakaki olmumai.” Nenya Esau olmumai, nemiraki ninye Yakobo esipata enye e kikausho.

³⁴Neaku eishoo Yakobo Esau emukate tenebo nena motori, nenya neok sii, neinyototo alo. Neaku etemenayie Esau esipata enye e kikausho.