Read Maasai Bible – Biblia Sinyati Enkiterunoto 26 Bible Online

Enkiterunoto 26 - Maasai Bible – Biblia Sinyati bible

Enkiterunoto 26

¹Ore pee eitoki olameyu ajing enkop leme olapa ameyu le nkata e Abraham. Nelo Isaak Gera enetii Abimelek olaiguanani loo Lfilisti.

²Neipang'aki Olaitoriani ninye nejoki, “Midoyio alo Misiri, totona tamanya enkop naaliki.

³Tobiko tena kop, naa kaaku nanu tenebo iyie, naa kaamayian nanu iyie tenebo iishoritin inono aisho kuna kuapi pooki, naitabaya olmumai lainosie papaai lino Abraham.

⁴Kaponaa eishoi ino metotiwuo anaa ilakir lo loing'ang'e, naisho eishoi ino ena kop pooki naa te ishoi ino emayiani iloshon le nkop pooki

⁵amu etoning'o Abraham oltoilo lai, neibung enkikoo ai, o nkitanapat aainei pooki.”

⁶Neaku etamanya apa Isaak Gera.

⁷Ore peyie eikilikuan ilewa leine imbaa naipirta enkitok enye, nejo ninye “Enkanashe ai ninye.” Amu eturia ninye ejo, “Enkitok ai” edamu ajo, “Keidim ilewa leine ataar ninye metua te nkaraki Rebeka,” amu aisidai ninye oleng te nidol.

⁸Ore peyie ebik Isaak teine enkata naado eturumishe te lusie Abimelek olaiguanani loo Lfilisti, nedol Isaak eirrapirap Rebeka enkitok enye.

⁹Neipot Abimelek Isaak nejoki, “Nyorriki ime enkitok ino, kaji inkuna peyie itejo ‘Enkanashe ai ninye’?” Nejoki Isaak ninye, “Amu atadamua ajo, ‘Peyie maye te nkaraki ninye,’ ”

¹⁰Nejo Abimelek, “Kainyoo ena nintaasa iyiook? Keidim obo loo ltung'ana ashomo enetii enkitok ino, nipik iyiook entaboi te sunkuroisho.”

¹¹Neikok Abimelek iltung'ana pooki nejoki, “Ore pooki ng'ae oiseyie ele tung'ani anaa enkitok enye naa keari metua.”

¹²Neunisho Isaak teinakop ilo ari, neikesisho katitin iip aitulus enatuunishe. Nemayian Olaitoriani ninye.

¹³Neaku apa ninye karsis neponari imasaa oleng oleng, ometaa olkarsis.

¹⁴Keeta apa ntare kumok o luaat oo nkishu o lmarei sapuk ometaa etoduakita Ilfilisti olom.

¹⁵Nenuk Ilfilisti nchorroi pooki te nterit apa naatuturo ilaisiaayiak le menye aa Abraham.

¹⁶Nejoki Abimelek Isaak, “Shomo tung'uai iyiook, amu itaa magilani oleng te iyiook.”

¹⁷Neaku eidurra apa Isaak teine, nelo apik olng'obor lenye oerata le Gera nebik teine.

¹⁸Neitoki Isaak atur nena shorroi oo nkariak naatuturoki apa too nkolong'i e Papaai lenye, Abraham, amu etapalaitie Ilfilisti ninche peyie eye Abraham. Neisho sii inkarn apa naishoo menye.

¹⁹Kake ore peyie eidip ilaisiaayiak le Isaak aatuturisho te yarrata netum teine enchorro e nkare naijirrijirru.

²⁰Neishankarrarre ilchekuti le Gera ilchekuti le Isaak aajoki, “Enaang ena are.” Neaku eipoto Isaak ina shorro enkare ajo Esek, amu eishankarrarre ninche ninye.

²¹Neitoki ninche aatur ae shorro, neitoki ake aishankarrarre ninye teina aaigil, neaku eipoto enkarna enye ajo Sitina.

²²Neidur teine atur ae shorro, neitu ejing enchankar ina, neaku eipoto enkarna eina ajo Rehobot ejo, “Ore tena kata eitaikia iyiook Olaitoriani ewueji nelala, naa aikibul te nkop.”

²³Nepuku Isaak teine ailep alo Beer-sheba.

²⁴Neipang'aki Olaitoriani ninye ina kewarie nejoki, “Kara nanu Enkai e Abraham papaai lino, miureishoyu amu atii tenebo iyie, naa kaamayian iyie naitubul eishoi ino te nkaraki osinka lai Abraham.”

²⁵Neaku etesheta Isaak olperere lo lasar teine neipot enkarna Olaitoriani, neun olng'obor lenye teine, Netur ilaisiaayiak le Isaak enchorro enkare teine.

²⁶Neitoki Abimelek adumunye alo enetii Isaak eing'uaa Gera tenebo o Ahusa olautaroni lenye tenebo o Fikol olkitok lenye le njore.

²⁷Nejoki Isaak ninche, “Kainyoo peyie ietuo enatii nadolita ajo aikimbaba intae nanu, nikitaaraitie aitung'uaa ate?”

²⁸Nejo ninche, “Kidolita tukul aajo ketii Olaitoriani tenebo iyie metaa kitejo, inchoo maitayu olmumai te rishata ino o iyiook naa maitayu sii olning'o o iyie,

²⁹inchere mintaas iyiook intorrok anaa eneitu kiseyie iyie neitu kintaas iyie entorroni meteleku eseriani ake nikincho iyie shomo te seriani. Ira taata iyie olomayiana lo Laitoriani.”

³⁰Metaa eitobiraka Isaak ninche osirua, nedaa neokisho.

³¹Ore peyie ekenyu, neinyototo ninche enasirie aanya pooki olmumai, neisho Isaak ninche meshomo, nepuo aaing'uaa ninye to sotua.

³²Ore ake teina olong nepuonu ilaisiaayiak le Isaak aaliki ninye enchorro e nkare natuturo nejoki ninye,

³³“Kinotito enkare.” Neisho enkarna ine aajo shiba, metaa ore enkarna eina anasa naa keji Beer-sheba ometabaiki ena olong.

³⁴Ore peyie eaku Esau oloo larin artam, eyama Yudit entito e Beeri loo Lhiti tenebo o Basemat entito e Elon oo Lhiti.

³⁵Nepik emion enkishui e Isaak o Rebeka.