Read Maasai Bible – Biblia Sinyati Enkiterunoto 27 Bible Online

Enkiterunoto 27 - Maasai Bible – Biblia Sinyati bible

Enkiterunoto 27

¹Ore apa peyie eaku Isaak moruo oleng metaa eiliilaitie inkonyek metaa meekure edolisho neipotu Esau olkikau lenye, nejoki ninye, “Enkerai ai” neng'amaa menye ajoki, “Nele nanu.”

²Nejoki Isaak ninye idolita ajo atamorua nemayiolo enkolong naye.

³Tudumu imasaa inono, emootian ino tenebo o enkawuo ino, nilo ong'ata pee kilo ang'oroki eng'ues.

⁴Nikintobiraki endaa namelok, anaa enoshi nanyor, nikiyaki mainosa peyie aatum atamayiana eton eitu aye.

⁵Ore apa Rebeka, einining'ito Isaak egira airorie olayioni lenye Esau. Metaa ore peyie edumunye Esau alo ong'ata ang'or eng'ues, nayau

⁶nejoki Rebeka olayioni lenye Yakobo “Atoning'o papaai lino eirorie olalashe lino Esau ejoki,

⁷‘Iyakaki eng'ues nikilotu aitobiraki endaa sidai. Natum ainosa naamayian iyie te dukuya Olaitoriani eton eitu aye.’

⁸Ore naa tena kata olayioni lai, toning'o ororei lai anaa enaaitanap ajoki.

⁹Shomo intare, niking'uraki ilkuoo le kineji aare sidain, peyie aitobirie endaa namelok sidai naaijo enoshi nanyor papaai lino.

¹⁰Niyaki ninye papaai lino meinosa peyie kitum atamayiana eton eitu eye.”

¹¹Kake etiaaka Yakobo Rebeka ng'otonye, “Ng'ura ajo ore Esau olalashe lai naa oltung'ani oju, nara nanu oltung'ani osipa.

¹²Keidimayu naairrapirrap papa nanu, natiu nanu anaa oltung'ani olej ninye, nayaki kewan oldeket ajo emayianata aing'oru.”

¹³Nejoki ng'otonye ninye, “Inchoo oldeket lino elotu shumata nanu enkerai ai, toning'o ake iyie ororei lai nikilo aing'uraki lelo kuoo.”

¹⁴Nelo Yakobo ayau ninche ayaki ng'otonye, neitobir ng'otonye endaa sidai namelok naaijo enoshi nanyor Isaak.

¹⁵Neishopoki Rebeka inkilani sidan e Esau olkikau lenye, naata tiaji, olayioni lenye oti Yakobo, neripaki indapan oo ilkineji inkaik enyena tenebo emurt enye nasipa. Neisho ninye endaa sidai namelok tenebo emukate naitobira olayioni lenye Yakobo.

¹⁶Ore nena dapan oo ilkineji nepik inkaik enyena o ine wueji nesipa te murt enye;

¹⁷neisho ninye endaa sidai namelok tenebo emukate naitobiraka apik inkaik o layioni lenye Yakobo.

¹⁸Metaa eshomo Yakobo ajing'aki menye nejoki, “Papa”. Neng'amaa ajoki, “Nele nanu, ira ng'ae enkerai ai?”

¹⁹Nejoki Yakobo menye, “Nanu doi Esau olkikau lino. Aidipa ataasa anaa enikitiaaka. Inyo totona inosa inkiri oo ng'uesi aainei peyie kitum atamayiana.”

²⁰Kake etiaaka Isaak olayioni lenye, “Kaji doi inkuna peyie itasioko taata atum olayioni lai?” Newaliki Yakobo ajoki, “Amu aaishoo Olaitoriani Enkai ina dupoto.”

²¹Ina pee ejoki Isaak Yakobo, “Wou tinyiku, peyie atum airrapirrapa ajur enkerai ai, matayiolo katukul metii olng'ash ajo ira olayioni lai Esau anaa aimira.”

²²Neigutaki Yakobo Isaak papaai lenye. Neirrapirrap ninye nejo, “Ore oltoilo naa oltoilo le Yakobo, kake ore inkaik naa ine Esau.”

²³Neitu eyiolou ninye amu ore inkaik enyena naa keju anaa ino lalashe lenye Esau, neaku etamayiana ninye.

²⁴Nejo Isaak, “Aira hoo doi olayioni lai Esau?” Newaliki Yakobo ajoki, “Ekara.”

²⁵Ina peyie ejo Isaak, “Iyakaki nanu endaa peyie atum ainosa, inkiri oo ng'uesi o layioni lai naatum atamayiana.” Neyau Yakobo ayaki ninye, nenya ninye, neyaki ninye enaisho oo sabibu neok ninye.

²⁶Ina peyie ejoki Isaak olayioni lenye, “Wou tinyikakaki tung'ututaki olayioni lai.”

²⁷Metaa etinyikua Yakobo neng'utut menye neing'uaya olng'usil too nkilani enyena, nemayian ninye ejoki, “Ing'ura olng'usil lo layioni lai otiu anaa olng'usil liong'ata otamayiana Olaitoriani.

²⁸Mikinchoo Enkai enkolielio e keper, tenebo empiron e nkop, tenebo o enkikesare sapuk o enaisho oo sabibu.

²⁹Inchoo kisiaai iyie iloreren, nikigilaki kung iyie iloshon. Taa olkitok too lalashera linono, naa inchoo ilayiok le ng'utunyi kirrugokino iyie. Metedeki pooki ng'ae likidek, nemayiani pooki ng'ae likimayian iyie!”

³⁰Ore ake aa enaidipie Isaak atamayiana Yakobo, ore ake enaipang'ie Yakobo aing'uaa ine netii Isaak Papaai lenye, nejing'u olalashe lenye Esau eing'uaa eng'orore.

³¹Neitobir sii ninye endaa sidai namelok, neyau ayaki papaai lenye. Nejoki menye “Papaai, inyo nosa inkiri e ng'ues pee kitum atamayiana.”

³²Neng'amaa papaai lenye Isaak ajoki ninye, “Ira doi ng'ae?” Newaliki ajoki, “Nanu doi olayioni lino, olkikau lino Esau.”

³³Netum Isaak olokirikiri sapuk le ng'oro nejo ninye; “Aing'ae doi naaji otang'oro eng'ues naayaki nanu, nainosa pooki eton eitu ibau, naidipa atamayiana ninye? Nesipa ee, naa kemayiana ninye.”

³⁴Ore peyie ening Esau irorei le papaai lenye neishir abuaku to ltoilo sapuk o te mion, nejoki papaai lenye, “Oi tamayianaki sii nanu, nchooki sii nanu emayianata ino, papaai lai!”

³⁵Kake etiaaka Isaak Esau, “Eewuo olalashe lino to losek, neewa emayianata ino.”

³⁶Nejo Esau, “Aime keji doi te sipata etejoki enkarna enye Yakobo? Naaeseka ninye nanu kuna katitin are. Ewa apa ninye esipata ai e kikausho, naa ng'ura ake ajo enyaaka tena kata aya emayianata ai.” Ina peyie ejoki “Keitu hoo ninye kilekaki nanu emayianata?”

³⁷Newaliki Isaak Esau ajoki, “Ing'ura ajo aitaa ninye olkitok lino, naa ore ilalashera lenyena, aishoo ninye meitaa isinkan, naa too lpaek tenebo enaisho oo sabibu aitotio ninye. Kaa naa taata aaitaas enkerai ai?”

³⁸Nejoki Esau papaai lenye, “Ke mayianata nabo duoo ake iata papaai lai? Oi tamayianaki sii nanu, nchooki sii nanu emayianata ino, papaai lai!” Neilepie Esau oltoilo lenye neishir.

³⁹Newaliki Isaak papaai lenye Esau ajoki, “Iyaku ololamita empiron e nkop te manyisho ino, niaku sii ololamita enkoileelio e keper e shumata.

⁴⁰Keaku olalem lino ninye inchuyie, niaku oloisiaai olalashe lino, naa tinigelunye te nkitoria enye, nigil enchata oo lmong'i natii emurt ino.”

⁴¹Ore ina kata, neibayu Esau Yakobo te nkaraki emayianata natamayiana papaai lenye ninye. Nejo Esau to ltau lenye. “Etabautua inkolong'i naishiraki papaai, ore peyie eishunye natum ataara metua olalashe lai Yakobo.”

⁴²Kake ore irorei le Esau ilo ayioni lenye botor etolikioki Rebeka; metaa eirriwayie Rebeka ilkiliku meipoti ilo ayioni lenye oti, Yakobo nejoki ninye, “Ing'ura, ore olalashe lino Esau, eitagolito kewan oshoke pee kitum atara tua.

⁴³Metaa ore tena kata enkerai ai toning'o oltoilo lai tudumunye isikaki enetii Laban olalashe lai otii Haran,

⁴⁴niton tenebo ninye te nkiti rishata, ometaba anaa neyagaa engoro napi o lalashe lino;

⁴⁵o metaba anaa nerrinyo engoro olalashe lino. Nerikino enintaasa ninye, naa kairriu olkilikuai mikitorikuni teine. Kainyoo peyie aiturraa intae pookira te keeya te nkolong nabo?”

⁴⁶Ina peyie ejoki Rebeka Isaak, “Enaure enkishui ai te nkaraki kuna kituaak oo Lhiti. Teneyam sii ninye Yakobo nabo o nkituaak oo Lhiti naaijo kuna, nabo oo nkituaak ena kop, kainyoo tipat enkishui te nanu?”