Read Maasai Bible – Biblia Sinyati Enkiterunoto 28 Bible Online

Enkiterunoto 28 - Maasai Bible – Biblia Sinyati bible

Enkiterunoto 28

¹Neitoki Isaak aipot Yakobo, nemayian ninye, neitanap ejoki, “Mayieu niyam hoo nabo oo nkituaak oo Lkanaan.

²Inyo tudumunye shomo Padan Aram enkaji e Betuel laa ninye otoiwuo yeyioo lino, niyau aitaa enkitok teine entito nabo e Laban olalashe yieyioo lino.

³Mikitamayiana Enkai Magilani, nikintubul aponaa, metaa iaku olorere kumok too ltung'ana.

⁴Mikinchoo ninye iyie emayianata e Abraham o tenebo eishoi ino, niaku oloya enkop nitaayie omoni naishoo Enkai Abraham!”

⁵Neisho Isaak Yakobo meshomo. Nelo Padan Aram enetii Laban olayioni le Betuel le Aram, naa olalashe le Rebeka ng'otonye Yakobo o tenebo Esau.

⁶Etoduaa apa Esau ajo etamayiana Isaak Yakobo neisho ninye meshomo Padan Aram meing'oru enkitok teine. Netamayiana sii neitanap ajoki, “Mayieu niyam enkitok hoo nabo oo Lkanaan,”

⁷netoning'o Yakobo menye o ng'otonye nelo Padan Aram.

⁸Metaa ore peyie edol Esau ajo eitu eitiship nena kituaak oo Lkanaan papaai lenye Isaak;

⁹nelo Esau enetii Ishmael, neyam aitaa enkitok, aponaa te nena kituaak naata, Mahalat entito e Ishmael, olayioni le Abraham; enkanashe e Naboiot.

¹⁰Neing'uaa Yakobo Beer-sheba alo enkalo e Haran.

¹¹Nelotu ewueji neje, neirrag ine ina kewarie, amu etadoyie enkolong nedumu osoit obo teine airishunye elukunya enye neirrag teine airura.

¹²Ore eirura, netum enkidetidet naitodolu olkedet ororita enkop, ore enchumata enye nebaiki keper, nedol ilmalaika le Nkai oodou neilep te ilo kedet.

¹³Nedol Olaitoriani eitashe te nchumata ninye, nejo ninye, “Ara nanu Olaitoriani, Enkai e Abraham papaai lino, nara sii Enkai e Isaak, naa ore ena kop naa ninye irragie, ekaaisho nanu iyie tenebo o eishoi ino.

¹⁴Naa kebayu eishoi ino anaa enterit enkop naa aiponari aibulaa aidapashakino enkop te nkalo o loontoluo, o te nkalo o loosaen, o te nkalo e moikuape o te nkalo e kopikop; naa te iyie tenebo o eishoi ino emayiani iloshon le nkop pooki.

¹⁵Tadamu ajo atii nanu te nebo iyie naa kaarrip iyie te pooki wueji naba anaa enilo, naaitoki arrinyu ena kop, amu maaing'uaa nanu iyie o metaba anaa naas ina naatolikio.”

¹⁶Neinyototo Yakobo too njio enyena nejo, “Kesipa ketii Olaitoriani ene wueji, neitu duoo ayiolou.”

¹⁷Neureishoyu oleng nejo, “Kebaa eitureisho ene wueji! Meeta duoo inchere paa dikae ene wueji neme enkaji e Nkai, naa enkishomi najing'ieki keper, ena.”

¹⁸Neinyototo Yakobo tadekenya enasirie, neya oladuoo soit oirishunye elukunya enye neitasheyie aitaa eng'ape nebukoki eilata shumata ninye.

¹⁹Neipot enkarna eine wueji ajo Betel[13], kake keji apa enkarna e ina anasa Lus te dukuya.

²⁰Nenya Yakobo olmumai ajo, “Tenaa keaku Enkai tenebo nanu, naarrip nanu tena lototo, naaisho sii endaa nanya o nkilani naishop

²¹metaa anyaaka arrinyunye enkaji e papa lai te seriani, naa keaku Olaitoriani Enkai ai.

²²Ore ele soit laitasheyie aitaa eng'ape, naa keaku enkaji Enkai, ore pooki nikincho nanu naa kaaisho iyie ematua e tomon.”