Read Maasai Bible – Biblia Sinyati Enkiterunoto 29 Bible Online

Enkiterunoto 29 - Maasai Bible – Biblia Sinyati bible

Enkiterunoto 29

¹Nedumunye Yakobo aibung enkoitoi alo, nebau enkop oo ltung'ana oomanya oloosaen.

²Ore eing'orisho, nedol enchorro ti ong'ata, ore ake sii, nedol iluaat uni oo nkishu o nkerrai eirrag te mbata eina shorro amu teina shorro eokokinyieki enkare naok. Netii osoit sapuk enkutuk enchorro.

³Naa tenereuni nkerrai pooki meirraga teine, neibeleleng'oo ilchekuti ilo soit te nkutuk enchorro peyie etum aishoo ntare enye enkare. Ore ake peyie eidip aaitooko pooki, neitoki aiken enchoro teilo soit aapik enkutuk enchorro.

⁴Nejoki Yakobo lelo shekuti “Ilalashera laainei, kaji doi ing'uaa?” Nejo ninche, “King'uaa Haran.”

⁵Nejoki ninye ninche, “Amaa iyiololo Laban olayioni le Nahor?” Nejo ninche, “Aikiyiolo ninye.”

⁶Nejoki Yakobo ninche “Aisupat ninye?” Neng'amaa aajo, “Ee aisupat, naa ore entito enye Raheli elotu ereuta ntare!” Nejo Yakobo,

⁷“Ore amu eton aa enaipirie enkolong, eton mme nkata naiturrurri nkerrai aaokoki enkare peyie etum aashom aatadaata.”

⁸Kake etejo lelo shekuti, “Mikintook omeiturrurroto nkerrai pooki tenebo, nikimbeleleng'oo osoit te nkutuk e nchorro nikitum aaitooko inkerrai.”

⁹Ore eton eirorie ninche, nebau Raheli ereuta ntare e papaai lenye aa ninye nairritita.

¹⁰Ore peyie edol Yakobo Raheli entito e Laban olalashe ng'otonye tenebo nkerrai e Laban olalashe ng'otonye, nelo Yakobo aibeleleng'oo osoit te nkutuk enchorro, neitook inkerrai e Laban, olalashe ng'otonye.

¹¹Neng'utut Yakobo Raheli eishir abuaku te nchipai.

¹²Neliki Yakobo Raheli ajoki ole sotua, naa olayioni le Rebeka. Neipirri Raheli ang alo aliki menye.

¹³Ore peyie ening Laban ilomon le Yakobo olayioni le nkanashe, neipirri alo anang'are ninye, neitamuat ninye inkaik neng'utut neriku ninye enkaji enye. Neliki Yakobo Laban kuna baa pooki,

¹⁴neaku etiaaka Laban ninye, “Kesipa tukul ajo ira osarge lai, nira sii osesen lai!” Neton aboitare ninye olapa.

¹⁵Neitoki Laban ajoki Yakobo, “Ore amu ira ole sotua, aikisiaai iyie nanu pesho? Tolikioki ajo kainyoo elaata niyieu naalaaki?”

¹⁶Eeta apa Laban ntoyie are, neji entito botor Lea neji entito kiti Raheli.

¹⁷Aitorrok apa nkonyek e Lea, ore Raheli naa aisidai neikishiaan.

¹⁸Nenyorru Yakobo Raheli ometejo, “Ekaaisiaai iyie ilarin oopishana te nkaraki Raheli ina tito ino kiti.”

¹⁹Nejo Laban, “Enaikash te naaisho iyie alang te naisho ninye likae lee; totona tenebo nanu.”

²⁰Neaku eisiaayia apa Yakobo Laban ilarin oopishana te nkaraki Raheli, netiu lelo arin anaa inkolong'i kuti te nkaraki enyorrata sapuk naata te ninye.

²¹Neitoki Yakobo ajoki Laban, “Inchooki nanu enkitok ai peyie alo ayiolou ninye, amu aitabayie enkata ai.”

²²Neiturrurru Laban iltung'ana pooki leine, neitayu osirua

²³kake ore teipa ewa entito enye Lea ayaki ninye Yakobo; neboitare Yakobo ninye ina kewarie.

²⁴(Eishooyie Laban enkaisiaayiani enye Silpa, aisho Lea entito enye metaa enkaisiaayiani enye.)

²⁵Ore peyie ekenyu nedol Yakobo ajo Lea ng'ole eishooki, Nejoki Yakobo Laban, “Kainyoo ena nikintaasa nanu? Aime enaji Raheli doi apa aaisiayie? Kainyoo naa peyie kiteleja iyie nanu?”

²⁶Neng'amaa Laban ejo, “Measi oshi neijia te nkop ang, aaishooyo entito kiti eton eitu eishoori enkikau.

²⁷Iishu e wiki ena, naa aikintoki aaisho iyie enkae tinikisiaai kulikae arin oopishana.”

²⁸Neas Yakobo ina, neishu ewiki enye; neaku neisho Laban ninye Raheli ina tito enye meitaa enkitok.

²⁹(Eishooyie Laban enkaisiaayiani enye Bilha, aisho Raheli entito enye metaa enkaisiaayiani enye.)

³⁰Neaku enyaaka sii Yakobo alo aboitare Raheli nenyorru Raheli oleng aitalang enanyor Lea neisiaai Laban kulikae arin oopishana.

³¹Ore peyie edol Olaitoriani ajo keibai Lea, nebol enguset enye, kake ore apa Raheli naa koolupi.

³²Nenutayu Lea neiu enkayioni neipot ninye enkarna ajo Ruben, amu etejo, “Te nkaraki natoduaa Olaitoriani enkisilisiloto ai, nesipa taata ajo ekaanyoru olpayian lai.”

³³Neitoki ake anutayu, neiu enkayioni, nejo, “Te nkaraki natoning'o Olaitoriani ajo kaaibai naaisho ena ayioni aigil.” Neipot enkarna enye ajo Simon.

³⁴Neitoki ake anutayu neiu enkayioni nejo, “Ore taata naa kaaibung'are olpayian lai, amu atoikio ninye ilayiok okuni.” Ina peyie eipot enkarna enye ajo Lawi.

³⁵Neitoki anutayu neiu enkayioni nejo “Ore taata naa kaisis Olaitoriani,” metaa eipoto ninye enkarna ajo Yuda[14], ina pee edung eishoi.