Read Maasai Bible – Biblia Sinyati Enkiterunoto 32 Bible Online

Enkiterunoto 32 - Maasai Bible – Biblia Sinyati bible

Enkiterunoto 32

¹Nedumunye Yakobo alo arrinyo enkop enye, nenang'are ilmalaika le Nkai ninye.

²Ore peyie edol Yakobo ninche, nejo, “Enjore e Nkai ena!” Neipot enkarna eine ajo Mahanaim[19].

³Neirriwaa Yakobo ilkiliku meituruko aapuo enetii olalashe lenye Esau te nkop e Seir, natii enkop e Edom.

⁴Neitaarriyian ninche nejoki, “Inji intae enchom entiaaki olkitok lai Esau inji ejo olaisiaayiani lino Yakobo, ‘Ataboitare Laban o taata,

⁵naata ilmong'i o sirkon o ntare o laisiaayiak lewa o nkaisiaayiak ng'oruo nairriwua olkilikuai aliki olkitok lai, pee atum anoto omom too nkonyek inono.’ ”

⁶Nerrinyunye lelo kiliku enetii Yakobo nejoki, “Kitabaikitia olalashe lino Esau, naa elotu ninye peyie kinang'are iyie nerikito ilewa iip ong'uan.”

⁷Neureishoyu Yakobo oleng oleng netum enkiputukuny oleng, Neor lelo tung'ana apa ooboitare, neor inkishu o ntamesin, neitainye pooki ntukusi are edamu ajo,

⁸“Tenelotu Esau aidaikie entukus nabo, neaku ore entukus natelekua neidim aisika.”

⁹Nejo Yakobo, “Na Ai Enkai e papa lai Abraham naa Enkai e papa lai Isaak, Lo Aitoriani, ilo apa laatiaaka nanu, ‘Torrinyoyu shomo enkop ino enetii olorere lino le sotua, naa kaitaas iyie esidai,’

¹⁰maaishiaakino nanu katukul ina nyorrata ino nauno, tenebo o ina kisiligata nintoduaa iyie osinka lino, amu te ng'udi ai ake atalang'a ele keju le Yordan; nataa taata iltimito oaare.

¹¹Tokorduaki nanu, aatoomono iyie, te nkaina olalashe lai, te nkaina e Esau, amu kaure nanu ninye melotu ake aar iyiook pooki matuata, inkera o noo ng'otonye.

¹²Kake itejo, ‘Ekaaitaas iyie esidai, naisho eishoi ino metaba anaa osinyai le naiposha, nemeikenayu te nkumoi.’ ”

¹³Metaa eirraga ine ina kewarie, neitayu te nena naata ninye enkishooroto naisho olalashe lenye Esau.

¹⁴Inkineji iip are o oloroi tikitam o supeni e kerra iip are tenebo ilmeregeshi tikitam,

¹⁵intamesin naalepo tomoni uni o nkurrarrun enye o nkishu artam tenebo iloing'ok tomon o sirkon lipong'a tikitam o lamuyeishi tomon.

¹⁶Neitarasaa kuna too nkaik oo laisiaayiak lenyena, meeta ake ineitu erewi te luaata enye maate, nejoki sinkan lenyena, “Enchom enturuko ninchosho metaa ketii erishata eluaata ake o eluaata.”

¹⁷Neitaarriyian olorikito pooki ajoki, “Ore te nenang'are intae Esau olalashe lai, nikinkilikuan ajoki, ‘Ira iyie oleng'ae? Kaji iloito? Naa einkuneng'ae kuna masaa nireutata?’

¹⁸Naa ijokiki ninye, ‘Ino sinka lino Yakobo naa enkishooroto nairriwaka olkitok lai Esau, ore ake sii, elotu ninye te siadi ang.’ ”

¹⁹Neitaarriyian ake sii ilo liare o ilo liokuni o lelo pooki ooreuta nena masaa nejoki, “Entiaaki Esau ina bae tininang'arere, ninye.

²⁰Naa ijokiki intae, ‘Ore ake sii, elotu osinka lino Yakobo te siadi.’ ” Amu etadamua Yakobo ajo, “Kaidim aitoborro ninye too nkishoorot naashomo te dukuya nanu, ore esuju ina naidim atoduaa enkomom enye, nebaiki naaidim atang'amai nanu.”

²¹Metaa neiturukieki nkishoorot e Yakobo, ore ina kewarie neirrag ninye olng'obor.

²²Ore ake ina kewarie nedumunye Yakobo arik inkituaak enyena pokira are, o nkaisiaayiak enyena pokira are tenebo inkera enyena tomon oobo nelang te lang'ata e Yabok.

²³Neya ninche aitalang enkare, tenebo o pooki toki naba anaa enaata,

²⁴neing'uari Yakobo aa ninye ake. Ore ina kewarie etii oltung'ani otupupungare enkewarie pooki o metamanai esirua.

²⁵Ore peyie edol ilo tung'ani ajo eitu eidimu Yakobo, neiseyie oloudo le nkupes, nepuku enkupes e Yakobo te rubata oloudo ina kata epupung'are ilo tung'ani.

²⁶Ina peyie ejo oltung'ani, “Inchooki mashomo, amu ekenyua.” Kake etiaaka Yakobo, “Maaisho hoo ilo o metaba anaa nikimayian.”

²⁷Nejoki ninye, “Aikiji ng'ae enkarna?” Nejo, “Yakobo.”

²⁸Ina peyie ejoki “Mikintokini aekata aajo Yakobo, kake Israel[20], amu itekeshare Enkai tenebo o iltung'ana nisulie.”

²⁹Neitoki Yakobo aikilikuan ninye ajoki, “Tolikioki aatasayia enkarna ino.” Kake etiaaka, “Kainyoo doi peyie inkilikuanu enkarna ai?” Nemayian ninye teine.

³⁰Neipot Yakobo enkarna ine wueji ajo Peniel etejo, “Amu kitoduaate o Enkai too nkomomi, ore ake eyia neton aishu.”

³¹Neilepaki enkolong egiroo Penuel, neitong'ojinari te nkaraki enkupes enye.

³²Ore ebaiki ina olong, menya Isiraeli emorloo o loudo; naatii enkong'u oloudo, te nkaraki naibung'a apa ilo tung'ani enkong'u oloudo le Yakobo o emorloo enye.