Read Maasai Bible – Biblia Sinyati Enkiterunoto 33 Bible Online

Enkiterunoto 33 - Maasai Bible – Biblia Sinyati bible

Enkiterunoto 33

¹Neshumu Yakobo inkonyek enyena aing'orisho nedol Esau elotu nerikito iltung'ana iip ong'uan. Metaa etooro inkera aoriki Lea o Raheli o nkaisiaayiak enyena.

²Nepik inkaisiaayiak tenebo inkera enye dukuya, ore Lea o nkera enyena o Raheli o Yosef nepuonu te siadi.

³Ore ninye makewan neituruk te dukuya ninche, neirrugo abaiki enkop katitin naapishana o metaba anaa nenyiku olalashe lenye.

⁴Kake ekuetua Esau alo anang'are olalashe, neng'utut ninye, nebatatakino emurt enye ang'utut, neishir pokira.

⁵Ore peyie ehumu Esau nkonyek enyena nedol inkituaak o nkera, nejo ninye, “Kakua kuna nikiboitare?” Nejo Yakobo, “Inkera naaishoo Enkai to lng'ur osinka lino.”

⁶Neitoki nena aisiaayiak aanyiku, ninche tenebo inkera enye, neirrugo aabaiki enkop;

⁷neitoki Lea tenebo inkera enyena aabau aanyiku neirrugo aabaiki enkop; ore te bayie e pooki nenyiku Yosef o Raheli, neirrugokino aabaiki enkop.

⁸Nejo Esau, “Kainyoo eutu ele orora pooki lainepua?” Newal Yakobo ajo, “Pee atum omom te dukuya nkonyek olkitok lai.”

⁹Kake etejo Esau, “Ekaata inaabaiki, olalashe lai, intaa pooki niata ininono.”

¹⁰Nejo Yakobo, “A'a, aatasayia, tenaa kanoto omom too nkonyek inono, neaku tang'amai naa enkishooroto ai too nkaik aainei, amu kesipa tenajo ore enduaata natoduaa enkomom ino netiu anaa enduaata natoduaa enkomom e Nkai amu te nyorrata natiu neijia kitang'amua nanu.

¹¹Tang'amai, aatasayia ina kishooroto ai nikiyakaki iyie, amu aaing'urrie Enkai oleng, naa kaata sii inaabaiki.” Ina peyie earaki Yakobo Esau meewa, nenyorraa ninye.

¹²Neitoki Esau ajo, “Emaibung'a enkoitoi aapuo, naa kaituruk te dukuya iyie.”

¹³Kake etiaaka Yakobo ninye, “Iyiolo olkitok lai ajo ore kuna ng'aturran naa kenana, naa nanu ogolie intare o nkishu tenebo ilasho lenye, naa te nerewi oleng enkolong nabo, naa keye imasaa pooki.

¹⁴Inchoo olkitok lai egiroo osinka lenye, pee ariku ninche maakutiti te risioroto e lototo oo nkishu naatii dukuya nanu o te risioroto e lototo oo inkera, omatabau enetii olkitok lai te Seir.”

¹⁵Nejo Esau, “Inchooki maatung'ueiki embata oo ltung'ana laainei laata tene.” Kake etejo, “Meeta tipat ning'uarie. Kayieu ake duoo natum omom te dukuya enkomom ino olkitok lai.”

¹⁶Metaa etorrinye Esau ina olong alo Seir.

¹⁷Kake eshomo Yakobo Sukot, neshetaki kewan enkaji neitayu ninye ilng'oborri loo nkishu enyena, metaa keji enkarna e ine wueji Sukot!

¹⁸Nelotu Yakobo te Seriani o metabaiki enkanasa naji Shekem, natii ina kop e Kanaan eing'uaa Padan Aram, neun ilng'oborri te mbata enkanasa.

¹⁹Neinyang'u too layiok le Hamor, aa papaai le Shekem too mpisai iip nabo esashati enkop naa ninye etuunie ilng'oborri lenyena.

²⁰Neshetu teine olperere lo lasar nedung'oki enkarna ine ajo El-Elohe Israel.