Read Maasai Bible – Biblia Sinyati Enkiterunoto 34 Bible Online

Enkiterunoto 34 - Maasai Bible – Biblia Sinyati bible

Enkiterunoto 34

¹Nedumunye Dina entito e Lea natoikio ninye Yakobo alo aparan inkituaak eina kop;

²ore peyie edol Shekem olayioni le Hamor le Hifi ilo kitok leina kop, neibung ninye te ngolon aikony nesul ninye.

³Neng'uar ninye Dina oleng to ltau lenye ina tito e Yakobo; nenyorru ninye ina tito, neirorie ninye too rorei oobor.

⁴Metaa eshomo Shekem airorie papaai lenye Hamor ajoki: “Ing'urakaki ena tito maitaa enkitok.”

⁵Nening apa Yakobo ajo einyala shekem entito enye Dina; netii apa ilayiok lenyena nkishu ti ong'ata, negira Yakobo eitu ejo ae o metaba anaa nepuonu ninche.

⁶Nelotu Hamor menye le Shekem enetii Yakobo airorie ninye.

⁷Nejing'u ilayiok le Yakobo eing'uaa ong'ata peyie ening ilo omoni; negoro ninche oleng pee ening ina bae amu etaasa Shekem ina nayawuaesulare atua Siraeli aikony entito e Yakobo, amu ore embae naaijo ena nemeishiaakino neasi.

⁸Kake eirorie Hamor ninche nejoki, “Etayiewua naleng oltau lo layioni lai Shekem entito ino; aatasayia, enchoo ninye meyama.

⁹Emayamata maate, enchoo iyiook intoyie inyi; niyaya sii intae intoyie ang.

¹⁰Nikishula aaku elatia, ore enkop neaku kebolokino intae, entamany nikiwal imasaa nitumutumu imasaa kumok.”

¹¹Nejoki ake sii ninye Shekem menye ina tito tenebo ilalashera lenyena, “Nchooki manoto omom te dukuya inkonyek inyi, naa ore pooki nikijokiki intae naa kaishoru.

¹²Inkilikuanu te nanu imasaa pooki naaba anaa niyieu too nkishoorot, naa kaishoru te risioroto eina nikijokiki nanu, kake intabai ake ena naata to ltau, inchooki ake ninye nanu ena tito metaa enkitok ai.”

¹³Newaliki ilayiok le Yakobo Shekem tenebo papaai lenye Hamor te ntorroni te nkaraki nainyala enkanashe enye Dina.

¹⁴Etiakita ninche ninche, “Mikiindim iyiook aataas ena bae, aaisho enkanashe ang oltung'ani lememurata, amu keaku ina esulare te iyiook.

¹⁵Pooki ake pee kinyorraa tiniasiasa ena: Tiniakuku ake anaa iyiook, ore pooki lee linyi nemurati.

¹⁶Ina kata ake kinyorraa aaisho intae intoyie ang, nikiya sii iyiook intoyie inyi, nikiparana tenebo aaku olorere obo.

¹⁷Naa tinimining'ining'i iyiook ninchosho metumurati intae, neaku aikiya entito ang, nikipuo aaidur.”

¹⁸Neitiship irorei lenye Hamor o layioni lenye Shekem.

¹⁹Neaku eitu eitoki ilo barnoti aitumutiki ina bae, amu etonyorra ninye ina tito e Yakobo. Naa ninye apa enyorri oleng aaitulus to lmarei pooki.

²⁰Metaa eshomo Hamor tenebo o olayioni lenye Shekem kishomi enkanasa enye neirorie ilewa le nkanasa enye nejoki,

²¹“Ore kulo tung'ana naa iltung'ana supati, enchoo etoni tena kop nikimirakino intokitin, amu idolitata aajo kelala enkop oleng te ninche. Emayama intoyie enye nikincho sii ninche meyama intoyie ang.

²²Tena bae ake eidim kulo tung'ana aatonyorrai aatotoni tiatua iyiook, nikiaku olorere obo: pee emurati pooki lee tiatua iyiook anaa pee emurata ninche.

²³Aimeaku inkishu enye, o ntokitin enye o masaa enye pooki inkunaang? Ematonyorrai ake duoo ina nayieu, naa kemany ninche atua iyiook.”

²⁴Ore lelo pooki oimutua kishomi e nkanasa enye, nenyorraa nena pooki naatejo Hamor o Shekem metaa etumurataki pooki lee, o pooki ooimutua kishomi eina anasa.

²⁵Ore te nkolong e uni, aa enamuratieki neton emuoyiaa, nedumunye ilayiok aare le Yakobo, Simon o Lawi oong'arie kina Dina, neya ilalema lenye aarasaki enkanasa meyioloi, near lelo lewa pooki metuata.

²⁶Near Hamor metua tenebo o layioni lenye Shekem to lalem neitayu Dina aitung'uaa enkaji e Shekem, nepuo aaing'uaa.

²⁷Nedoiki ilayiok le Yakobo aar enkanasa, near iltung'ana metuata neya ntokitin te nkanasa amu einyalaki enkanashe enye.

²⁸Neya intare enye o nkishu enye o sirkon lenye o pooki toki ake ninye natii atua enkanasa o naatii nkurman.

²⁹Neya pooki toki naata tipat, o nkera enye pooki tenebo inkituaak enye, o pooki toki natii atua inkajijik neibung aaisardakie ninche.

³⁰Ina peyie ejoki Yakobo Simon o Lawi, “Kiyakita nanu enyamali amu kintong'ueita nanu tiatua olorere lena kop, too Ilkanaani o Ilperesi; aikuti iltung'ana laainei, naa tenelo neibung'a aaitoriokino aarare nanu, naa kaamuti nanu tenebo o enkaji ai pooki.”

³¹Kake etejo ninche, “Keishaakino ninye neitaa enkanashe ang e mulayoi?”