Read Maasai Bible – Biblia Sinyati Enkiterunoto 35 Bible Online

Enkiterunoto 35 - Maasai Bible – Biblia Sinyati bible

Enkiterunoto 35

¹Nejoki Enkai Yakobo, “Tudumunye ilepa shomo Betel, nilo amany ine; nintobir teine olperere lo lasar, aitaiki Enkai ina nikimpang'aka ina kata apa peyie ilo ailany olalashe lino Esau.”

²Metaa etiaaka Yakobo Enkaji enye o lelo pooki apa ootii tenebo ninye, “Ewuangie kulie aitin oo loreren naatii atua intae, nintisinyinyi ate, nimbelekenyenye inkilani inyi.

³Ematudumunye aailep aapuo Betel, peyie atum aitayu teine olperere lo lasar aitaiki Enkai, ina naatawalikia nanu te nkata osina, naataboitare te pooki wueji nashomo.”

⁴Ina peyie eisho Yakobo nena aitin oo loreren pooki naata, tenebo o ilgiso ootii inkiyiaa enye; neisudoo Yakobo nena pooki te ntonata olchani onyaanyukie olng'aboli otii embata Shekem.

⁵Ore eidurrita ninche nedoiki enkuretisho naing'uaa Enkai inkanas naamanita ninche, metaa eitu esujaa ninche ilayiok le Yakobo.

⁶Nelotu Yakobo Lus (aa ninye Betel), aa ninye natii enkop e Kanaan. Ore ninye tenebo o lorere pooki oboitare,

⁷neshet olperere lo lasar teine, nejo ine wueji El-betel, amu ine apa eibalakinye Enkai kewan ninye ina kata naisik alo aing'uaa olalashe lenye.

⁸Neye Debora enkaisiaayiani e Rebeka teine, nenukari te ntonata olchani onyaanyukie olng'aboli tiabori Betel, metaa etejoki enkarna e ine Allon-bakut.

⁹Neitoki ake Enkai aipang'aki Yakobo aigil, ina kata pee elotu aing'uaa Padan Aram, nemayian ninye.

¹⁰Nejoki Enkai ninye, “Aikiji enkarna ino Yakobo; kake mikintokini aikata aajo Yakobo, kake aikiji enkarna ino Israel.” Metaa eipotoki enkarna enye aajo Israel.

¹¹Nejoki Enkai ninye, “Kara Enkai Magilani; entoisho entoponari, kepuku te iyie olorere o lorora loo loreren, nepuku ilaiguanak te iyie.

¹²Ore ina kop apa naishoo Abraham o Isaak naa kaaisho iyie, naa kaisho ina kop eishoi ino nikisuju.”

¹³Nelo Enkai aig'uaa ninye teine neirorie Yakobo.

¹⁴Neitasheyie Yakobo eng'ape teine apa neirorie Enkai o ninye, eng'ape o soit; nebukoki olasar opikuni enchumata enye, nebukoki eilata shumata enye.

¹⁵Metaa eishoo enkarna ine wueji neirorie Enkai ajo Betel.

¹⁶Neitoki Yakobo o lmarei lenye aaidur aapuo te Betel; ore eton elakuaniki Efrat, nesaisayu Raheli, near enkop oleng.

¹⁷Ore eitanyamal emion oleng, etiaaka enkaitoyioni ninye, “Miureishoyu amu itum ae ayioni.”

¹⁸Ore ena kata edung'o tau (amu etua), neipot enkarna enye ajo Benoni[21]; kake eipoto menye enkarna enye ajo Benchamen[22].

¹⁹Metaa etua Raheli, nenukari te nkoitoi epuoi Efrat, (aa ninye Betlehem),

²⁰neitasheyie Yakobo eng'ape te nchumata enkurare e Raheli; naa eng'ape ina enkurare e Raheli, netii ina ng'ape o taata.

²¹Neidur Israel alo, neun olng'obor lenye te dukuya oltalet le Eder.

²²Ore emanya Israel ina kop, nejing'aki Ruben aboitare Bilhah ina apiani e papaai lenye, nening Israel ina bae.

²³Nera ina kata ilayiok le Yakobo tomon aare. Ore ilayiok le Lea naa: Ruben, (olkikau le Yakobo) o Simion o Lawi o Yuda o Isaakar o Sebulon.

²⁴Ore ilayiok le Raheli naa: Yosef o Benchamen.

²⁵Ore ilayiok le Bilhah enkaisiaayiani e Raheli naa: Dan o Naftali.

²⁶Ore ilayiok le Silpa enkaisiaayiani e Lea naa Gad o Asheri. Kulo apa ilayiok le Yakobo ootoikioki ninye te Padan Aram.

²⁷Nelotu Yakobo enetii Isaak papaai lenye te wueji neji Mamre, aashu Kiriat-tarba (aa ninye taa eji Hebron), ine apa etamanya Abraham o Isaak.

²⁸Etabaitie ina kata inkolong'i e Isaak ilarin iip o ntomoni isiet.

²⁹Neye ninye, nelo eneiturrurrorre iltung'ana lenyena apa ootuata, etaa oltung'ani moruo oiputakinote nkolong'i, ore ilayiok lenyena Esau o Yakobo nenukaa ninye.