Read Maasai Bible – Biblia Sinyati Enkiterunoto 37 Bible Online

Enkiterunoto 37 - Maasai Bible – Biblia Sinyati bible

Enkiterunoto 37

¹Nebik Yakobo teinakop apa naidurraka lo papaai lenye teina kop e Kanaan.

²Ena enkatini o lmarei le Yakobo. Ore aa oloo larin tomon oopishana Yosef, neirritita apa intare tenebo o lalashera lenyena; ore apa aa enkayioni ninye netii apa tenebo o layiok le Bilha o Silpa nena kituaak e Papaai lenye. Neyaki Yosef papaai lenye ilomon torrok ooipirta ilalashera lenyena.

³Kenyor apa Israel Yosef oleng aitalang inkera enyena pooki, amu etoikioki ninye etaa kitok oleng, neitobiraki ninye olkila oodo loo loo muain kumok.

⁴Ore peyie edol ilalashera lenyena aajo kenyor menye Yosef aitalang ilalashera lenyena pooki, neibayu ninche ninye oleng, neaku meyieu neirorie ninye te supatisho.

⁵Netum Yosef enkidetidet, ore peyie eliki ilalashera lenyena neibayu ninche ninye oleng.

⁶Nejoki ninye ninche, “Entoning ena kidetidet naidetidetua.

⁷Atoduaa kigira iyiook aaen irridat le nkano tiatua enkurma naa nadol orridati lai etudumunye aitashe, aitoriori naa nadol irridat linyi pooki eetuo pooki aiturrurrokino aaman orridati lai, neirrugokino pooki ninye.”

⁸Nejoki ilalashera lenyena ninye, “Kesipa iyaku oloitore iyiook? Aashu iyaku oloata enkitoo te iyiook pooki?” Neaku eibaitie ninche Yosef oleng too nkidetidetat enyena o too rorei lenyena.

⁹Neitoki ake Yosef atum ae kidetidet, neliki ilalashera lenyena nejo, “Anyaaka ake atum ae kidetidet; naa ng'ura, ore enkolong o lapa o lakir tomon oobo naairrugokino nanu.”

¹⁰Kake ore ake peyie eliki menye neliki sii ilalashera, neisikong menye nejoki ninye, “Kainyoo doi ena kidetidet nindetidetu? Metaa kaalotu nanu tenebo yieyioo lino o lalashera linono aairrugo aabaiki enkop te dukuya iyie?”

¹¹Netum ilalashera lenyena olom te nkaraki ninye, kake etushuma menye ina kiroroto to ltau.

¹²Nedumunye ilalashera le Yosef aapuo airrita intare e menye te mbata e Shekem.

¹³Nejoki Israel Yosef, “Aimegira ilalashera linono aairrita intare te Shekem? Wou maairriwai enetii ninche.” Nejoki Yosef ninye, “Nele nanu.” Ina peyie ejoki Israel Yosef,

¹⁴“Shomo tena kata taleenoi tenaa keserian ilalashera linono, o ntare, nikintoki ayaki olomoni.” Neaku eirriwayie ninye to erata le Hebron, nelo Shekem.

¹⁵Neinepu oltung'ani Yosef egira aiposha too nkong'at, neikilikuan ilo tung'ani ninye ajoki, “Kainyoo doi ing'oru?”

¹⁶Nejo ninye, “Agira aing'oru ilalashera laainei, tolikioki sii ake aatasayia, kaji doi egira aairritayie intare.”

¹⁷Nejoki ilo tung'ani, “Eshomo aaidurraki dikae, amu atoning'o ninche ejo, ‘Maape Dotan.’ ” Metaa eshomo Yosef asujaa ilalashera lenyena, netum ninche te Dotan.

¹⁸Nedolu ninche ninye elakua, ore eton eitu elotu anyikaki ninche, nenya ninche enkiguana peyie ear ninye metua.

¹⁹Nejokino maate, “Nelido oloshi aidetidetani olotu.

²⁰Wootu taata, emataar ninye metua nikinang'aki ninye engumoto nabo te kuna, nikipuo aajo eng'ues entim nainosa ninye, nikianyu aadol enaaku inkidetidetat enyena.”

²¹Kake ore peyie ening Ruben ina, neitajeu Yosef too nkaik enye nejoki, “Mikiar ninye metua.”

²²Nejoki Ruben ninche, “Emimbukoo osarge; entanang'aki ninye atua ena gumoto tene tiong'ota, kake eminteleiki ninye enkaina aar metua,” peyie etum aitajeu ninye aitung'uaa inkaik enye, nerrinyoki ninye papaai lenye.

²³Metaa ore peyie elotu Yosef enetii ilalashera lenyena, neng'as aaoru ninye olkila lenye, ilo kila oodo oata imuain kumok oishopito;

²⁴neya ninye aanang'aki eng'umoto, ore ina gumoto nemetii toki, metii enkare atua.

²⁵Netoni ninche te nkop aanya endaa, nejo matushumu nkonyek enye nedol encholiek oo lbiasharani le Ishmael epuonu aaing'uaa Gilead, ereuta intamesin enye, nenapita intokitin naaji ubani o Seu o emanoo etii enkoitoi edoyio aapuo Misiri.

²⁶Ina peyie ejoki Yuda ilalashera lenyena, “Kainyoo taa doi kitum tinikiar olalashe lang metua, nikituroo osarge lenye?

²⁷Wootu, ematimir ninye aamiraki kulo tung'ana le Ishmael, nimikincho inkaik ang ebaiki ninye, amu olalashe lang ninye, olo sarge lang.” Nenyorraa ilalashera lenyena ina natejo.

²⁸Ore peyie epuonu ilbiasharani le Midian aaim ine: neyietu Yosef aaitayu te ng'umoto, nemiraki ninye lelo tung'ana le Ishmael te shekeli tikitam e nkosholai; neya ninche Yosef Misiri.

²⁹Ore pee eshukunye Ruben enaduoo gumoto nedol ajo meekure etii Yosef ine, nepolos inkilani enyena to sina sapuk.

³⁰Nerrinyo enetii ilalashera lenyena nejoki: “Metii enkayioni ine kaji taata alo nanu?”

³¹Neya olkila le Yosef, neyieng enkine, neitadoiki ilo kila osarge.

³²Neirriwaa ilo kila oodo loo muain kumok meyakini menye, nejo, “Nele olkila likinotito, ng'ura sii iyie tujurru tenaa ko lkila lo layioni lino anaa aime ninye.”

³³Neyiolou nabo kata ninye, nejo, “Olkila lo layioni lai, einosa eng'ues e ntim ninye, maata olng'ash tukul ajo etumuta Yosef ing'uesi!”

³⁴Nepolos Yakobo inkilani enyena to sina nerrid olkuniyia te mpolos enye. Neishiraki olayioni lenye inkolong'i kumok.

³⁵Neinyototo ilayiok pooki lenyena tenebo o ntoyie enyena pooki aaibung ninye aitagol; kake etanya ninye tukul eitagoli, nejo, “A'a ekalo abori enemeneng'a enetii olayioni lai, aishirita.” Metaa eishiraka menye Yosef oleng.

³⁶Ore ina rishata neidipa Ilmidian aatimir Yosef te Misiri aamiraki Potifa, obo loo laitoriak le Farao, aa ninye olkitok loo larripok le wueji netii Farao.