Read Maasai Bible – Biblia Sinyati Enkiterunoto 39 Bible Online

Enkiterunoto 39 - Maasai Bible – Biblia Sinyati bible

Enkiterunoto 39

¹Ewaki apa ina kata Yosef Misiri, ore Potifa laa obo loo lkituaak le Farao, olkitok le rripore, naa olmisiri sii, einyiang'ua Potifa ninye too ltung'ana le Ishmael laa ninche ooyautua ninye ina kop.

²Etii apa Olaitoriani tenebo o Yosef, neaku oltung'ani otudupe oleng, neton te nkaji olkitok lenye ilo Misiri.

³Nedol olkitok lenye ajo ketii Olaitoriani tenebo Yosef, ore pooki naata neisho Olaitoriani metubula too nkaik enyena.

⁴Metaa enoto Yosef omom too nkonyek e Potifa, neisho ninye metaa oloitasheikinoni le nkaji enye pooki neaku ninye oitore pooki toki naata.

⁵Ore ebaiki ina kata neitaa ninye olaitasheikinoni le nkaji enye o pooki toki naata, nemayian Olaitoriani enkaji e ilo Misiri te nkaraki Yosef. Ore emayianata Enkai nejing pooki toki naata, tiaji o te nkurma.

⁶Metaa etung'ueikia apa Potifa pooki naata metaa Yosef oitasheiki; neaku ore eeta Yosef, eitu eitoki anyamaliki ae toki meteleku endaa ake nanya ninye. Ore apa Yosef naa oltung'ani sidai te mua.

⁷Ore etulusoyie enkata, nekurraki enkitok o lkitok lenye inkonyek enyena ang'uar Yosef, nejoki, “Irraga tenebo nanu.”

⁸Kake etanya ninye nejoki enkitok nejoki enkitok olkitok lenye, “Ing'ura, ore atii ene meekure enyamaliki olkitok lai ae toki tena aji, netipika pooki toki naata atua enkaina ai.

⁹Meekure aa kitok tena aji pee aalang nanu; nemeeta hoo ae toki naatirishie nanu meteleku iyie ake, amu ira iyie enkitok enye; kaji taa pasa aiko peyie aas enkarruoisho naba inji, naas eng'oki te dukuya Enkai?”

¹⁰Ore hoo duoo ninye neirorie Yosef anaake eitu ening Yosef ninye, peyie eirrag tenebo ninye, aashu eisiritore ninye.

¹¹Kake ore nabo olong, eshomo Yosef atua enkaji aas esiaai enye nemeetae likae lee otii atua aji.

¹²Neibung enkitok e Potifa enkila enye nejoki, “Irraga tenebo nanu.” Kake etung'uayie ninye enkila enye te nkaina enye, neilanyisho aisik aipang te nkaji.

¹³Ore peyie edol ina kitok ajo etung'uayie Yosef enkila enye te nkaina enye eibung'ita, neisik alo aing'uaa enkaji.

¹⁴Neipot ilewa le nkaji enye nejoki ninche, “Eng'ura, eyaka ninye iyiook Potifa Olburaniai meeu amor iyiook; aaewuo ajing'aki ajo aboitare, naishir oleng to ltoilo sapuk.

¹⁵Ore peyie ening ajo ailepie oltoilo lai aishir oleng, neing'uaa enkila enye te nkaina ai neilanyisho aipirri aipang boo.”

¹⁶Neirragie ninye ina kila enye te mbata enye o meeu olkitok lenye ang.

¹⁷Neliki ninye Potifa ina bae ake ajoki, “Ore ilo sinka loo Lbrania, ilo liyaua atua iyiook, aaewuo ajing'aki amor;

¹⁸kake ore ake peyie ailepie oltoilo lai aishir, neing'uaa enkila enye aata neilanyisho aisik apuku te nkaji.”

¹⁹Ore peyie ening olkitok le Yosef lelo rorei ooiroro enkitok enye, “Neijia aaikuna osinka lino.” Neyupuyup engoro enye.

²⁰Neya olkitok le Yosef ninye apik jila, ine wueji nepiki ilmapuusuni lo laiguanani. Nepiki ninye jila.

²¹Kake etii apa Olaitoriani tenebo o Yosef neitodol ninye enyorrata nauno, neisho ninye omom too nkonyek olaitasheikinoni le jila.

²²Ore ilo aitasheikinoni, nepik Yosef aitaa ninye oitasheiki lelo pooki ooikenoro te jila neaku ore pooki naasi naa ninye oas.

²³Ore ilo kitok le jila eitu eitoki aitanyamaluo te pooki toki natipika inkaik e Yosef, amu etii Olaitoriani tenebo ninye; neaku ore pooki nataasa, neisho Olaitoriani meitobirari.