Read Maasai Bible – Biblia Sinyati Enkiterunoto 4 Bible Online

Enkiterunoto 4 - Maasai Bible – Biblia Sinyati bible

Enkiterunoto 4

¹Neboitare Adam enkitok enye, neiroshiu neiu Kain. Nejo: “Anoto olee te retoto o Laitoriani.”

²Neitoki aiu olalashe lenye Abel. Ore apa Abel naa olairritani loo ntare, ore Kain naa olaturoni le nkop.

³Ore etulusoyie enkata, neyaki Kain Olaitoriani enkishooroto oo lng'anayio lenyena le nkop.

⁴Neyau sii ninye Abel ilkikaunot loo ntare enyena naapir. Neng'amaa Olaitoriani Abel tenebo enkishooroto enye.

⁵Kake eitu eng'amaa Kain tenebo o enkishooroto enye. Negoro Kain nesot enkomom oleng.

⁶Nejoki Olaitoriani Kain, “Kainyoo peyie itagore naa kainyoo peyie isot enkomom?

⁷Amaa tiniaas isupati aimitum omom? Naa teneitu ias isupati, kigira ing'ok aarresh te nkutuk enkaji, naa iyie eyieu neibung kake keishiaakino nimir ninche.”

⁸Nejoki Kain olalashe lenye Abel, “Maape ong'ata.” Ore peyie ebaiki ong'ata nedumakino Kain olalashe lenye Abel aar metua.

⁹Neikilikuan Olaitoriani Kain, “Koree olalashe lino Abel?” Nejo, “Mayiolo, ainanu oshi olairritani lo lalashe lai?”

¹⁰Nejoki Olaitoriani, “Kaa bae ena nitaasa?” Kaagira oltoilo lo sarge lo lalashe lino aishiraki te nkop.

¹¹Ore taata iyie kitediaaki te nkop, ina natabolo enkutuk enye ang'amaa osarge lo lalashe lino te nkaina ino.

¹²Tinitur enkop, nemeiu ninye ae toki. Iyaku olaisikani olimana te nkop.

¹³Nejoki Kain Olaitoriani, “Aisapuk enkitamioto ai alang enaidimu.

¹⁴Ng'urai amu kitaarayie nanu ena olong aitung'uaa enkop, nikintalam sii enkomom ino peyie madol, naaku ololo te nkop metaa ore oltung'ani laatum naar nanu matua.”

¹⁵Nejoki Olaitoriani Kain, “Mme neijia etiu, ore oltung'ani likiar iyie tua, neitamei ninye kat naapishana.” Nepik Olaitoriani olmishire Kain peyie ore oloinepu ninye nemear metua.

¹⁶Neing'uaa Kain enkomom o Laitoriani, nelo amany enkop e Nod natii oloosaen te Eden.

¹⁷Neboitare Kain enkitok enye, nenutayu neiu Enok, neshet enkanasa, neipot ina anasa ajo Enok anaa enkarna o layioni lenye.

¹⁸Neikini Enok Irad, neiu Irad Mehujael, neiu Mehujael Metushael neiu Metushael Lamek.

¹⁹Neyam Lamek inkituaak are. Ore enkarna e nabo naa keji Ada, neji enkarna enkae Sila.

²⁰Neiu Ada Yabal laa ninye apa menye le lelo ootoni too lng'oborri neramat sii inkishu.

²¹Neji enkarna o lalashe lenye Yubal, laa ninye menye le lelo oosh ilwululi loo usin o ndulen.

²²Neiu Sila Tubalkain, laa ninye olkunoni oidong'u inkinantani too suyan, o sekenke. Neji enkanashe e Tubalkain Naama.

²³Nejoki Lamek inkituaak enyena, Ada o Sila, “Entoning oltoilo lai; intae nakituaak e Lamek enining'o enajo nanu: Ataara oltung'ani metua laatipika olbae, ilo barnoti laatoosho nanu”.

²⁴“Tenaa keitalaki Kain elap kat naapishana, kesipa ajo ore Lamek naa katitin ntomoni naapishana o naapishana eitalaki.”

²⁵Neboitare Adam enkitok enye aigil, neiu enkayioni neipot enkarna enye ajo Seti, amu etejo, “Aanyaaka Enkai apikaki nanu ae kerai najing ewueji e Abel amu etaara Kain ninye metua.”

²⁶Neitokini aaiki Seti olayioni, neipoti enkarna enye aajo Enosh. Ore ina kata neiterutua iltung'ana aaipot enkarna Olaitoriani.