Read Maasai Bible – Biblia Sinyati Enkiterunoto 40 Bible Online

Enkiterunoto 40 - Maasai Bible – Biblia Sinyati bible

Enkiterunoto 40

¹Ore etulusoyie enkata, neyooki olaitasheikinoni le naisho oo sabibu lo laiguanani le Misiri tenebo o lapejoni loo mukateni o laiguanani, aaitagor olkitok lenye ilo aiguanani le Misiri.

²Negoro Farao te nkaraki lelo aitasheikinok lenyena pokira, o laitasheikinoni kitok le naisho oo sabibu tenebo o lapejoni kitok loo mukateni.

³Nepik ninche enkaji narripieki iltung'ana arruok natii enkaji o lkitok le rripore, teina jila naikenorieki Yosef.

⁴Ore ilo kitok le rripore neitanap Yosef meing'ura, neisaiai ninche. Netoni inkolong'i naaikash teina aji oo larruok.

⁵Ore enkewarie nabo, neidetidet pokira, olaitasheikinoni kitok le naisho oo sabibu tenebo o lapejoni loo mukateni lo lkitok le Misiri, eikenoro te jila. Meeta ake oleitu eidetidet enkidetidet enye, nemeeta ake enkidetidet nemeeta enautu.

⁶Ore peyie eyooki Yosef ninche enasirie, nedol ninche, nenyorriki ajo kenyamal oleng pokira.

⁷Neikilikuan ilaitasheikinok le Farao ootii tenebo te nkaji naenishoreki te enkaji olkitok lenye ajoki, “Kainyoo doi anaaijo kesoto taata intae inkomomi?”

⁸Nejoki ninche ninye, “Kindetideta duo, nemeeta hoo oltung'ani oidim aibelekenyaki iyiook atoliki aibalakinye.” Nejoki Yosef ninche, “Amaa doi enkibelekenyata aime ene Nkai? Entolikioki atasayia intae.”

⁹Ore ilo aitasheikinoni kitok le naisho oo sabibu, neliki Yosef enkidetidet enye nejoki ninye, “Ore te nkidetidet ai, etii duoo osabibu dukuya nanu,

¹⁰ore te nchumata eilo sabibu, etii ilng'osil okuni; ore ake peyie eitapuku, nelioyu esidano enye, neku[25] aimarrimar aaku osabibu.

¹¹Netii duoo enkikompe e Farao enkaina ai, naitayu ilng'anayio loo sabibu, naironyaki enkare enye ina kikompe, napik ina kikompe e Farao inkaik e Farao.”

¹²Ina peyie ejoki Yosef ninye, “Ena enkibelekenyata ena kidetidet: ore ilng'osil okuni naa inkolong'i uni,

¹³ore too nkolong'i uni naa aikidumu Farao endukuya ino nikinyiaaki esiaai ino, neaku aipikaki Farao enkaina enye enkikompe enye anaa apake te dukuya aa olaitasheikinoni le naisho oo sabibu.

¹⁴Kake tadamuaki tenilo nitum eseriani, nikintaas sii nanu esupatisho peyie kimbalie sii nanu te dukuya Farao, pee kintayu nanu tena aji.

¹⁵Amu kesipa tukul ajo kapurruno te nkop ooore sii tene natii maata enataasa peyie aatipikaki atua jila.”

¹⁶Ore peyie edol olapejoni loo mukateni ajo ore enkibelekenyata naibelekenya Yosef naa kening'unoyu, nejoki sii ninye Yosef “Aidetideta sii nanu, etii nkikapuni uni oo mukateni elukunya ai,

¹⁷ore enkikapu natii shumata inkulie netii indaiki oo mpukunot pooki naapejuno e Farao, neinosita imotonyi nena daiki naatii enkikapu natii endukuya ai.”

¹⁸Newaliki Yosef ajoki, “Ena enkibelekenyata enye: Ore inkikapuni uni naa inkolong'i uni;

¹⁹ore too nkolong'i uni, naa kedumu Farao endukuya ino nikintung'uaa iyie! Nikilili iyie to lchani, ore imotonyi naa kenya inkiri o sesen lino.”

²⁰Ore te nkolong e uni, aa enkolong apa natoinyieki Farao, neitaiki ilaisiaayiak lenyena pooki osirua nedumu endukuya o laitookoni kitok tenebo o endukuya o layiarani kitok tiatua ilaisiaayiak lenyena.

²¹Neshukoki olaitasheikinoni kitok le naisho oo sabibu, nepik enkikompe inkaik e Farao,

²²kake eililio ilo apejoni kitok loo mukateni, anaa enatolikio apa Yosef ninche.

²³Ore ake eyia, eitu edamu ilo kitok le naisho oo sabibu Yosef, etorikine ninye.