Read Maasai Bible – Biblia Sinyati Enkiterunoto 42 Bible Online

Enkiterunoto 42 - Maasai Bible – Biblia Sinyati bible

Enkiterunoto 42

¹Ore peyie ening Yakobo ajo keetae entapa te Misiri, nejoki ilayiok lenyena, “Kainyoo doi peyie itonini aaing'ura maate tene?”

²Nejo, “Atoning'o ajo keetae ilpaek te Misiri; enchom ina kop enyiang'u ilpaek einyiang'aki iyiook teine, peyie kibikoo eitu kiye.”

³Metaa eshomo ilalashera le Yosef tomon aainyiang'u ilpaek te Misiri.

⁴Kake eitu eirriwaa Yakobo Benchamen, olalashe le Yosef tenebo ilalashera lenyena, amu keure ajo ketum enyamali.

⁵Neaku eetuo apa ilayiok le Israel aainyiang'isho anaa olikae orere oetuo, amu etijing'a apa olameyu enkop e Kanaan.

⁶Ore apa ina kata naa Yosef olgafanai leina kop naa ninye enkorrok apa omiraki ilpaek olorere pooki le nkop. Nepuonu ilalashera le Yosef, neirrugo ninche te dukuya ninye aaitabaiki inkomomi enye enkop.

⁷Nedol Yosef ilalashera lenyena, neyiolou ninye ninche, kake eitaasa ninye ninche anaa lomon neirorie ninche te nkisikong'ata nejoki, “Kaji doi ing'uaa?” Nejo ninche, “Enkop e Kanaan king'uaa kietuo ainyiang'u endaa.”

⁸Metaa etayiolo Yosef ilalashera lenyena, kake eitu eyiolou ninche ninye.

⁹Nedamu Yosef inapa kidetidetat naaidetideta naaipirta ninche, nejoki ninche, “Irara ilaikitalak, iyetuo aajur enchalan oo itung'ana lena kop.”

¹⁰Nejoki ninche ninye, “A'a olkitok lang, kake kietuo ainyiang'u endaa, ina pee eetuo isinkan linono.

¹¹Aikira pooki ilayiok lo lpayian obo, nikira iltung'ana ooisiligayu, ore isinkan linono neme ilaikitalak.”

¹²Nejoki Yosef ninche, “A'a, iyetuo aajur enchalan oo ltung'ana lena kop.”

¹³Nejo ninche, “Ore iyiook isinkan linono, kira ilalashera tomon aare, ilayiok lo lpayian obo te nkop e Kanaan; naa ore oloti te iyiook eboitare ena olong papaai lang, ore obo nemeekure eetae.”

¹⁴Kake etiaaka Yosef ninche, “Etiu ake anaa enatiaaka intae inchere irara ilaikitalak.

¹⁵Ore te nkaraki ina naa ketemi intae. Ore te nkishui e Farao, mipuopuo aing'uaa ene wueji ometaba anaa nelotu olalashe linyi oti ene.

¹⁶Erriwai obo linyi olo ayau olalashe linyi, ore intae nianyunyu te jila pee etumi aatujur irorei linyi, tenaa ketii esipata atua intae, aashu anaa te nkishui e Farao, kesipa irara ilaikitalak.”

¹⁷Nepik pooki tenebo jila too nkolong'i uni.

¹⁸Ore te nkolong e uni nejoki Yosef ninche, “Entaas ena peyie miyeye, amu kaure Enkai.

¹⁹Tenaa irara iltung'ana loo sipat, enchoo olalashe linyi obo eing'uari eikenoro teine neikenorieki intae, nepuo ilkulikae aaya entapa te nkaraki olameyu loo lmareita linyi,

²⁰nikiyakiki olalashe linyi, oti; pee etumi aatonyorrai irorei linyi, nimiyeye.” Neas ninche ina.

²¹Nejokino maate, “Ore taa te sipata einepua iyiook entorroni o lapa alashe lang, amu kitoduaa enyamali oltau lenye, ina kata peyie esai iyiook neitu kinining ninye katukul, neaku ena pee eewuo ena nyamali atua iyiook.”

²²Newaliki Ruben ajo, “Ekeitu apa ajoki intae emintaas entorrono enkayioni? Neitu kinining'ining'i. Metaa ore taata etabawua naa elaata osarge lenye.”

²³Eitu ninche eyiolou aajo etoning'o Yosef irorei lenye pooki, amu ketii apa olaibelekenyani erishata enye.

²⁴Nepuku ninye aing'uaa ninche alo aishir; neshukunye airorie ninche. Neitayu ninye Simon tiatua ninche neen ninye te dukuya ninche.

²⁵Neitanapisho Yosef meiputi ilbenia lenye te ntapa, neshukokini pooki bene impisai nayautua ninche, neishori sii endaa nainosaa te nkoitoi. Neitaasi ninche ina.

²⁶Neirot isirkon lenye too lpaek nedumunye aapuo.

²⁷Ore pee ejo obo lenye abol olbene lenye pee eisho osikiria lenye endaa te wueji neirraga, nedol impisai enyena te nkutuk olbene lenye.

²⁸Nejoki ilalashera lenyena; “Aatushukokoki nanu impisai aainei, noona naatii enkutuk olbene lai!” Ore ake pee ening ina neikirikira to lkirutoto nerrinyokino maate ejokino, “Kaa bae ena naitaasa iyiook Enkai?”

²⁹Ore pee epuonu enetii Yakobo; papaai lenye, te nkop e Kanaan, neliki nena pooki naanoto ninche, nejoki,

³⁰“Ore ilo tung'ani, ilo kitok leina kop, eirorie iyiook te nkisikong'ata, neiko iyiook anaa aikira ilaikitalak leina kop.

³¹Kake kitiakita ninye, ‘Aikira iltung'ana ooisiligayu, mikira ilaikitalak;

³²ekira iyiook ilalashera tomon aare, ilayiok le papa lang; nemeekure eishu obo lang, ore oloti neboitare ena olong papaai te nkop e Kanaan.’

³³Ina peyie ejo ilo tung'ani, ilo kitok leina kop ajoki iyiook, ‘Ore pee ayiolou ajo irara iltung'ana asipak, entung'uai olalashe linyi obo entung'ueikiaki, niyaya ilpaek aayaki olorere te nkaraki olameyu loo lmareita linyi, nipuopuo aarrinyo.

³⁴Entorikokoki olalashe linyi oti, pee atum atayiolo ajo mirara ilaikitalak kake iltung'ana ooisiligayu, naa kalaaki intae olalashe linyi, nindimidimi ataas biashara tena kop.’ ”

³⁵Ore eitayu ntokitin too lbenia lenye, meeta ake oltung'ani lemeeta orridati loo mpisai enyena to lbene. Ore pee edol ninche tenebo o menye irridat loo mpisai, neirut oleng.

³⁶Nejoki Yakobo papaai lenye ninche, “Kinchirie intae to sina sapuk aaiturrarrie inkera aainei: Meekure eetae Yosef, nemeekure eetae Simon, ore tena kata naa intokiki aaya Benchamen, ore kuna pooki naa inaanoto nanu.”

³⁷Ina pee ejoki Ruben menye, “Taara ilayiok laainei aare metuata tenemayau ninye ashuku enitii; tipika ninye inkaik aainei naa kashuku ninye enitii.”

³⁸Kake etejo Yakobo, “Melo olayioni lai airiamariyie intae, amu etua olalashe lenye, naa ninye ake taata etung'uayioki. Tenelo netum bata te nkoitoi ina kata ipuopuo, ataa nanu oltung'ani kitok oibor lukunya, ore osina likiyakiki nanu naa kaar nanu matua.”