Read Maasai Bible – Biblia Sinyati Enkiterunoto 44 Bible Online

Enkiterunoto 44 - Maasai Bible – Biblia Sinyati bible

Enkiterunoto 44

¹Ina pee eitanap Yosef olaitasheikinoni lenye le nkaji enye ajoki, “Imputa ilbenia le lelo tung'ana endaa, tipika enaba anaa enaidim ake ninche aatanap, nipik impisai e pooki tung'ani enkutuk olbene lenye.

²Nipik enkikompe ai ina kikompe e nkosholai enkutuk olbene lo loti lenye tenebo o impisai enyena naainosie ilpaek.”

³Neas anaa enaitanapa Yosef ninye. Ore ake pee ekenyu, neishori iltung'ana epuo aareu isirkon lenye.

⁴Ore ake pee epuo aalamari penyo aalam enkanasa, nejoki Yosef olaitasheikinoni le nkaji, enye, “Inyo, tusuja lelo tung'ana, ore ake pee inepu, tiaaki ninche, ‘Kainyoo pee itushukutuo entorrono te sidai? Kainyoo pee itupurroitie enkikompe ai e nkosholai?

⁵Aime ena kikompe oshi eokishore olkitok lai naa te ninye eibonisho? Itaasa entorroni teina nitaasa.’ ”

⁶Ore ake pee einepu ninche, neirorie ninche lelo rorei.

⁷Nejoki ninche ninye, “Kainyoo pee eiro olkitok lang irorei laaijo kulo? Metalama isinkan linono ina, pee meas ake embae naaijo ina!

⁸Itoduaa ajo ore inapa pisai nikinotito too nkutukie oo lbenia lang, kitushukutuo aashukoki iyie king'ua enkop e Kanaan; kaji naa kinko siake tinikipurroo enkosholai aashu saabu te nkaji olkitok lino?

⁹Inchoo ake obo lang too sinkan linono otumi eeta, enchoo eye, nikiaku sii iyiook pooki irrindiki lo lkitok lang.”

¹⁰Nejo ninye, “Enchoo naa eaku anaa enitejo, ore ake olotumi eeta neaku orrindik lai, ore ilkulikae linyi pooki neaku meeta entioto.”

¹¹Nesioki pooki ng'ae aitadou olbene lenye enkop, nebol pooki tung'ani olbene lenye.

¹²Neing'oru te pooki eiteru to lbotor neitabayie to loti, netumi enkikompe to lbene le Benchamen.

¹³Nepolos pooki inkilani enye, neirot pooki ng'ae esikiria enye, nerrinyo aapuo enkanasa.

¹⁴Ore pee elotu Yuda o lalashera lenyena enkaji e Yosef, eton ake etii Yosef ine, nebatata te dukuya ninye aabatatakino enkop.

¹⁵Nejoki Yosef ninche, “Kaa bae ena nikintaasa? Aimiyiololo aajo ore oltung'ani laaijo nanu naa kaidim aibonisho?”

¹⁶Nejo Yuda, “Kaa taa kijoki olkitok lang? Kainyoo taa kiro aajo? Anaa kaji kinko tinikilaku ate? Enoto Enkai entorroni oo sinkan linono, kira iyiook irrindiki lo lkitok lang, iyiook pooki ometabaiki lido duoo linotie enkikompe.”

¹⁷Kake etejo Yosef, “Meidimayu te nanu mataasa ina! Oltung'ani ake onotieki enkikompe ninye ake oaku orrindik lai, kake ore intae, enchom te seriani enetii papaai linyi.”

¹⁸Ina pee elo Yuda enetii Yosef nejoki, “Oi olkitok lang, inchoo osinka lino eiro, aatasayia, kaliki ororei enkiok o lkitok lai, nimincho engoro ino eyupuyup to sinka lino, amu itiu doi iyie anaa Farao enkorrok.

¹⁹Eikilikuana apa olkitok lai isinkan lenyena ajoki, ‘Iyatata papaai linyi anaa likae alashe?’

²⁰Nikiwal apa aajoki olkitok lang, ‘Kiata papa, naa olpayian kitok oleng, nikiata sii olalashe lang, oti olotioiwuoki te moruao enye, netua apa olalashe lenye, neaku ninye ake etung'uayioki too nkera e ng'otonye; naa kenyor menye ninye oleng.’

²¹Nintoki ajoki isinkan linono, ‘Eyau ninye ene natii, pee adol ninye too nkonyek aainei.’

²²Nikijoki olkitok lang, ‘Meidim enkayioni atung'uai menye, amu tenelo aing'uaa menye, naa keye menye.’

²³Ina pee ijoki isinkan linono, ‘Pooki ake pee intokiki aadol enkomom ai, tenelotu olalashe linyi oti tenebo intae.’

²⁴“Ore pee kirrinyo enetii osinka lino, aa papa, nikiliki irorei lo lkitok lang.

²⁵Ore pee ejo papaai lang, ‘Enchom enyaaki enyiang'aki iyiook enkiti daa;’

²⁶nikijo, ‘Mikipuo katukul. Tenaa keiriamariyie iyiook olalashe lang oti naa aikipuo, amu mikindim katukul aatodol enkomom eilo tung'ani aashu ake kiata olalashe lang oti tenebo iyiook.’

²⁷Ina pee ejoki iyiook osinka lino papaai lang, ‘Iyiololo apa aajo aatoikio enkitok ai ilayiok oaare;

²⁸ore obo naatung'uayie nanu. Ina pee ajo, kesipa etumutaki apa aaitaa ndung'udung'ot, neitu aekata aitoki adol ninye.

²⁹Tinintokiki sii taata aaya ele aaitung'uaa nanu nelo netum enyamali e nkitamioto niyauu ilpapit laainei ooibor to sina enemeneng'a.’

³⁰Ore naa taata, ore tenalotu enetii osinka lino papaai lang, nemetii enkayioni tenebo iyiook, neaku ore enkishui enye neibung'are ena ayioni.

³¹Ore pee edol ajo metii enkayioni tenebo iyiook, neye ninye, neyau isinkan linono ilpapit ooibor lo sinka lino papaai lang to sina enemeneng'a.

³²Amu etaa osinka lino oloitasheiki enkishui enkayioni, te papaai lang ejoki. Teneitu ashuku ninye enitii, naaku oloata entorroni te dukuya papaai te nkishui ai pooki,

³³metaa, ore naa taata, inchoo osinka lino, aatasayia, ejing erishata enkayioni aaku orrindik lo lkitok lai, nincho enkayioni eshuko tenebo ilalashera lenyena.

³⁴Amu kaji naa aikunari tenarrinyokino papaai lai marikito enkayioni? Ekaure doi ninye tenadol intorrok naajing'aki papaai lai.”