Read Maasai Bible – Biblia Sinyati Enkiterunoto 46 Bible Online

Enkiterunoto 46 - Maasai Bible – Biblia Sinyati bible

Enkiterunoto 46

¹Metaa etudumunye Yakobo alo o pooki toki naata, nepuonu Beer-sheba, neitayu ilasarri aaitaiki Enkai e papaai lenye Isaak.

²Neirorie Enkai Israel too nkitoduat e kewarie nejoki ninye, “Yakobo, Yakobo,” nejo ninye, “Nele nanu.”

³Ina pee ejoki, “Kara nanu Enkai, Enkai e papaai lino; miureyu ilo Misiri; amu kaalo aitaa olosho sapuk teine.

⁴Ekaairiamariyie iyie Misiri, naa kaaitoki ashuku ene, neaku inkaik e Yosef ilo airurare.”

⁵Ina pee epuku Yakobo aing'uaa Beer-sheba, nenap ilayiok le Israel Yakobo papaai lenye, o nkera enye, o nkituaak enye too ngarrin naairriwua Farao metanapa ninche.

⁶Eterewa sii inkishu enye o masaa enye, naanoto te nkop e Kanaan, nepuonu enkop e Misiri, Yakobo o eishoi enye pooki:

⁷ilayiok lenyena, o layiok loo layiok lenyena tenebo ninye o ntoyie enyena o ntoyie oo layiok lenyena o eishoi enye pooki eyaua ninye pooki tenebo ninye Misiri.

⁸Kuna ninche inkarn e ishoi e Israel, naaetuo atua Misiri, Yakobo o layiok lenyena, Ruben, olkikau le Yakobo.

⁹Ore ilayiok le Ruben, naa: Hanok o Palu o Hesron o Karmi.

¹⁰Ore ilayiok le Simon naa: Yemuel o Yamin o Ohal o Yakin o Sohar o Saul, aa layiok le nkitok oo Lkanaani.

¹¹Ore ilayiok le Lawi naa: Gershon o Kohat o Merari.

¹²Ore ilayiok le Yuda naa: Eri o Onan o Shela o Peres o Sera (kake ore Eri o Onan netuata te nkop e Kanaan): ore ilayiok le Peres naa: Hesron o Hamul.

¹³Ore ilayiok le Isaakar naa: Tola o Pufa o Yob o Shimron.

¹⁴Ore ilayiok le Sebulon naa: Sered o Elon o Yahaleel

¹⁵(kulo apa ilayiok le Lea ootoikio ninye Yakobo te Padan Aram, tenebo entito enye Dina; neaku pooki ilayiok o ntoyie enyena iltung'ana tomoni uni o kuni).

¹⁶Ore ilayiok le Gad naa: Sifion o Haggi o Shuni o Esbon o Eri o Arod o Areli.

¹⁷Ore ilayiok le Asheri naa: Imna o Ishfa o Ishfi o Beria, tenebo Sera enkanashe enye. Ore ilayiok le Beria naa: Heber o Malkiel

¹⁸(kulo ninche ilayiok le Silpa oishoo Laban Lea entito enye; neaku kulo etoikio Yakobo - iltung'ana tomon o ile).

¹⁹Ore ilayiok le Raheli, enkitok e Yakobo naa: Yosef o Benchamen.

²⁰Neikini Yosef te nkop e Misiri Manaseh o Efraim, laa ninche etoikio Asenat entito e Potifera olapolosani le Oni.

²¹Ore ilayiok le Benchamen naa: Bela o Becher o Ashbel o Gera o Naaman o Ehi o Rosh o Mupin o Huppin o Ard

²²(kulo ninche ilayiok le Raheli ootoikioki Yakobo - iltung'ana tomon oong'uan pooki.)

²³Ore ilayiok le Dan naa: Hushim.

²⁴Ore ilayiok le Naftali naa: Yahseel o Guni o Yeser o Shilem,

²⁵(kulo ninche ilayiok le Bilha, ooishoo Laban Raheli entito enye, neaku kulo ninye etoikio Yakobo - iltung'ana oopishana pooki.)

²⁶Ore iltung'ana pooki le Yakobo ooetuo atua Misiri, laa ile ishoi enye enkorrok, nemeikenaro ilayiok loo nkituaak oo layiok lenyena naa iltung'ana intomoni ile o ile pooki;

²⁷o layiok aare le Yosef ootoikioki ninye te Misiri. Neaku ore olorere pooki le nkaji e Yakobo oetuo atua Misiri naa iltung'ana intomoni naapishana.

²⁸Neirriwaa Israel Yuda meituruko alo enetii Yosef ajoki ninye menotore ninye te Goshen; nepuonu ninche enkop e Goshen.

²⁹Neirot Yosef engarri enye oo mbartan nelo anang'are papaai lenye Israel te Goshen; nekuetiki Yosef papaai lenye nemuataki inkaik enyena emurt, aishir te murt enye te nkata naado.

³⁰Nejoki Israel Yosef, “Etaa taa nchooki matua amu aatoduaa enkomom ino nayiolo ajo eton ake inchu.”

³¹Nejoki Yosef ilalashera lenyena o enkaji e menye pooki; “Ekalo ainosaki Farao, naa kajoki ninye, ‘Ore ilalashera laainei o enkaji e papa pooki, ootii apa enkop e Kanaan, neetuo enatii.

³²Ore lelo tung'ana naa ilairritak, amu ilaramatak loo nkishu, neyautua intare enye o nkishu enye o pooki toki naata.’

³³Ore teneipot intae nejoki intae: ‘Kainyoo esiaai inyi niasiasa?’

³⁴Enchom entejo, ore isinkan linono naa ilaramatak loo nkishu eiteru te keraisho o metabaiki ena kata, iyiook tenebo o loo papa lang; pee itumutumu aatamany enkop e Goshen; Amu ore pooki aramatani loo ntare naa olminong too Lmisiri.”