Read Maasai Bible – Biblia Sinyati Enkiterunoto 47 Bible Online

Enkiterunoto 47 - Maasai Bible – Biblia Sinyati bible

Enkiterunoto 47

¹Metaa eshomo Yosef ajing'aki Farao te nkaji, nejoki: “Ore papaai lai o lalashera laainei, tenebo o intare enye o nkishu enye o pooki toki naata, eetuo aaing'uaa enkop e Kanaan. Netii taata ninche ina kop e Goshen.”

²Neriku too lalashera lenyena ltung'ana imiet arikoki Farao.

³Nejoki Farao ilalashera le Yosef. “Kainyoo oshi esaiai inyi niasiasa?” Nejoki ninche Farao, “Ore isinkan linono naa ilaramatak, anaa enatiu apa iloo papa lang.”

⁴Nejoki ninche Farao, “Kietuo iyiook aamany ena kop, amu meeta indaat oo ntare isinkan linono, amu etaa olameyu sapuk te nkop e Kanaan; naa ore taata, kiomon iyie inchoo isinkan linono emany enkop e Goshen.”

⁵Ina pee ejoki Farao Yosef, “Eewuo papaai lino o lalashera enitii.

⁶Neina enkop e Misiri natii dukuya iyie, intamanya papaai lino o lalashera linono ine wueji sidai aisul tena kop, inchoo emany enkop e Goshen naa tiniyiolo iltung'ana airritak supati te ninche tipika ninche meitasheiki inkishu aainei.”

⁷Ina peyie eitijing'u Yosef Yakobo papaai lenye neitoton te dukuya Farao, nemayian Yakobo Farao.

⁸Nejoki Farao Yakobo, “Kaja inkolong'i oo larin le nkishui ino.”

⁹Nejoki Yakobo Farao, “Ore inkolong'i oo larin laainei lenkidurrudur ai naa ilarin iip o tomoni uni; kuti naa torrok inkolong'i oo larin le nkishui ai, neitu ebaiki inkolong'i oo larin le nkishui oo loo papa too nkolong'i enkidurrudur enye.”

¹⁰Nemayian Yakobo Farao nepuku alo aing'uaa Farao.

¹¹Neaku eitamanya Yosef ilalashera lenyena Misiri, neisho ninye ninche enkop metaa enenye te Misiri, ewueji neisul teina kop e Rameses, anaa enaitanapishe Farao.

¹²Neisho Yosef papaai lenye, tenebo o ilalashera lenyena, o lmarei lenye pooki endaa, te risioroto esiana oo ltung'ana lenye.

¹³Etaa apa meekure eetae endaa teinakop pooki; amu etasapuka olameyu oleng, metaa etaa enkop e Misiri o enkop e Kanaan enaisumash te nkaraki olameyu.

¹⁴Nesotu Yosef impisai pooki naanotoki te nkop e Misiri o te nkop e Kanaan, te ntapa nainyiang'utua; neyau Yosef nena pisai aya enkaji e Farao.

¹⁵Neaku ore pee emiri aaishu impisai pooki te nkop e Misiri o te nkop e Kanaan, nepuonu Ilmisiri pooki enetii Yosef nejoki ninye, “Inchoo iyiook endaa; Kainyoo pee kiye te dukuya nkonyek inono?

¹⁶Amu kiishutua impisai ang.” Newaliki Yosef ajoki, “Enchoru inkishu inyi, naa kaisho intae endaa awalunye nkishu inyi tenetaa eishunye impisai inyi.”

¹⁷Metaa nerewaki inkishu enye Yosef; neisho Yosef ninche endaa awalunye imbartan enye o intare o nkishu o sirkon: neisho ninye ninche endaa awalunye nkishu enye pooki teilo ari.

¹⁸Ore pee eishunye ilo ari, neitoki aapuonu to likae ari nejoki Yosef, “Mikisudorie ate olkitok lang inchere eishunye impisai ang pooki, ore iluaat oo nkishu naa ino lkitok lang; metii ae toki natung'uayioki te dukuya olkitok lang meteleku iseseni lang ake o enkop ang.

¹⁹Kainyoo pee kiye te dukuya inkonyek inono, iyiook tenebo o enkop ang? Inyiang'u iyiook tenebo o enkop ang te ndaa; ore iyiook tenebo enkop ang nikiaku irrindiki le Farao; nincho iyiook ilanterera pee mikiiye, neaku ena kop pooki mitil.”

²⁰Metaa einyiang'ua Yosef enkop pooki e Misiri ainyiang'aki Farao, amu etimira Ilmisiri inkurman enye amu etarasua olameyu oleng te ninche. Neaku enkop pooki ene Farao.

²¹Ore iltung'ana neaku, irrindiki pooki eiteru te nkiting'oto nabo e Misiri o metabaiki enkae kiting'oto.

²²Enkop ake oo lapolosak ake eitu einyiang'u; amu keeta apa ilapolosak emborei enye nauno naishoo Farao, neishunyie ina borei enye naishoo Farao ninche. Metaa eitu ninche emir enkop enye.

²³Ina pee ejoki Yosef iltung'ana, “Idolitata ajo ainyiang'ua intae ena olong tenebo o enkop inyi aitaa ene Farao. Ore naa, noolo ilanterera linyi, naa entuun enkop.

²⁴Ore te nkata e nkikesare ninchosho ematua e imiet Farao, ore ematua e ong'uan neaku eninyi too ilanterera le nkop, neaku sii endaa inyi o lmarei linyi, o ndaiki naanya inkera inyi.”

²⁵Nejo ninche, “Intajeuo enkishui ang; inchoo eitiship ena olkitok lang, aikiaaku iyiook irrindiki le Farao.”

²⁶Metaa eitobirua Yosef inkiguanat naaipirta enkop e Misiri, neitashe nena kiguanat o taata, inchere ketum Farao ematua e imiet e nkikesare. Enkop ake oo lapolosak neitu eaku ene Farao.

²⁷Metaa etamanya Israel Enkop e Misiri ina kop e Goshen; netum imasaa kumok teine, neeisho oleng nebul te nkumoi.

²⁸Neton Yakobo te nkop e Misiri ilarin tomon opishana; metaa ore inkolong'i oo larin le nkishui e Yakobo naa iip o artam oopishana.

²⁹Ore pee enyiku inkolong'i pee eaku enkata nairura Israel, neipot olayioni lenye Yosef nejoki ninye, “Tenetaa taata anoto omom too nkonyek inono, tipika enkaina ino kirrisha nkupesir aainei nikisiligie ajo aikintaas nanu enkanyit o esipata.

³⁰Ore pee airura tenebo olopapamayieu nikinukaa nanu te Misiri, kake tunukayioki nanu tiatua inkuraren oo loo papa; tanapaki nanu intung'uayioki Misiri nikilo aturoo nanu te wueji enye neturorie olorere.” Newaliki Yosef ajoki, “Ekaas anaa enitejo.”

³¹Nejo, “Inosa olmumai te nanu.” Nenya Yosef olmumai. Ina pee eirrug Israel endukuya enye te dukuya e ndapash enye.