Read Maasai Bible – Biblia Sinyati Enkiterunoto 48 Bible Online

Enkiterunoto 48 - Maasai Bible – Biblia Sinyati bible

Enkiterunoto 48

¹Ore pee elusoo nena, nelikini Yosef aajoki, Kemuoi papaai lenye. Metaa etoriko ninye ilayiok lenyena aare, Manase o Efraim.

²Nelikini Yakobo aajoki, “Eewuo olayioni lino Yosef enitii;” neitagoluo Israel nenyok ainyototo aton te ndapash.

³Nejoki Yakobo Yosef, “Aaipang'aka Enkai Magilani nanu te Lus te nkop e Kanaan naamayian nanu,

⁴naajoki nanu, ‘Idol ajo kaaisho iyie tubula, naa kaaponaa iyie, naaitaa iyie olorora loo ltung'ana kumok, naa kaisho ena kop eishoi ino nikisuju metaa enenye intarasi.’

⁵“Ore ilayiok linono pokira aare likitoikioki te nkop e Misiri eton eitu alotu enitii tene te Misiri; naa ilaainei; Efraim o Manase keaku ilaanei anaa paa ilaainei Ruben o Simon.

⁶Ore eishoi nitum te siadi ninche naa keaku ilinono; naa keipotieki ninche enkarna oo lalashera te njung'ore enye.

⁷Amu ore apa pee alotu te Padan Aram, aainepua osina etua Raheli te nkop e Kanaan te nkoitoi, eton elakua elototo pee ebau Efrat. Naturoo ninye teine te nkotoi aloito Efrat (aa ninye Betlehem).”

⁸Ore pee edol Israel ilayiok le Yosef, nejo “Kakua doi kulo?”

⁹Nejoki Yosef papaai lenye, “Ilayiok laainei ninche, lelo apa laaishoo Enkai tene.” Nejo Israel, “Toriku ninche ene natii, aatasayia pee atum atamayiana ninche.”

¹⁰Ore ina kata, eiliilaitie nkonyek e Israel te moruao, metaa meidim ninye atisipu. Neaku eyaua Yosef ninche aitinyiaki ninye; neng'utut Israel ninche neitamuat inkaik enyena.

¹¹Nejoki Israel Yosef, “Majo apa kaitoki adol enkomom ino; kake aaishoo Enkai matoduaa sii inkera inono.”

¹²Metaa eiwuangie Yosef ninche too nkung e papaai lenye, neirrugo ninye makewan abaiki enkop.

¹³Nerik Yosef ninche pokira, etii Efraim enkaina enye e tatene eitorioki enkaina e kedianye e Israel, netii Manase enkaina enye e kedianye eitorioki ninye enkaina e tatene e Israel, neriku Yosef ninche aitinyikaki papaai lenye.

¹⁴Neitorioo Israel enkaina enye e tatene neiteleiki ninye endukuya e Efraim, laa ninye oloti, ore enkaina enye e kedianye neiteleikiendukuya e Manase, aitapaash inkaik, amu ore Manase naa ninye olbotor.

¹⁵Nemayian ninye Yosef ajo: “Ore ina Ai naisiaayia iloo Papa te dukuya nanu, Abraham o Isaak, ina Ai naatorikoyie te nkishui ai pooki o metabaiki ena olong,

¹⁶Ilo malaika laaitajeuo nanu te pooki torroni, tamayiana kuna ayiok. Naa te ninche inchoo enkarna ai meipoti, tenebo o enkarna oo loo papa Abraham o Isaak; Naa inchoo ninche ebul aaku ilororani tiatua ena kop pooki.”

¹⁷Ore pee edol Yosef ajo eiteleikia menye enkaina e tatene shumata endukuya e Efraim neitu eitiship ninye, nedumu enkaina e menye aitayu aitung'uaa endukuya e Efraim apik ene Manase.

¹⁸Nejoki Yosef papaai lenye, “Ime neijia etiu papaai, amu ore ilo naa ninye olkikau; tipika enkaina ino e tatene shumata endukuya enye.”

¹⁹Kake etanya menye tukul nejo, “Ekayiolo olayioni lai, ekayiolo; ekeaku sii ninye kitok; kake ore ake eyia, ekeaku olalashe lenye oti kitok te ninye, ore eishoi enye naa keaku olorere kumok.”

²⁰Metaa etamayiana ninye ninche ina olong nejoki, “Te iyie elo Israel aibalie imayianat ajo, ‘Mikintotiwuo Enkai anaa Efraim o Manase’ ”, neaku neijia eikuna Israel aitojool Efraim Manase.

²¹Ina pee ejoki Israel Yosef, “Etataana enkata pee aye, kake keaku Enkai tenebo iyie, naa aikintoki ayau iyie ina kop o loo papaai lino.

²²Ore ake sii, aaishoo iyie ineitu aisho ilalashera linono Shekem enkiyopata o ldoinyo, ine wueji nepir naawa too nkaik oo Lamori to lalem lai o te nkawuo ai.”