Read Maasai Bible – Biblia Sinyati Enkiterunoto 49 Bible Online

Enkiterunoto 49 - Maasai Bible – Biblia Sinyati bible

Enkiterunoto 49

¹Ina peyie eipotu Yakobo ilayiok lenyena nejoki, “Enturrurroto tenebo, pee atum atoliki intae imbaa naatiu too nkolong'i naapuonu.

²Enturrurroto entoning, intae ilayiok le Yakobo, nining'ining'i Israel papaai linyi.

³Ruben, ira iyie olkikau lai, engolon ai, naa olng'anayioi le dukuya lai le ngolon ai. Oloituruk lo lwuasa naa oloituruk te ngolon.

⁴Olemeitirring'a anaa enkare, miaku iyie ololus te pooki, amu itijing'aka endapash e papaai lino; ina peyie isarkionie ninye ishomo endapash ai ainyal.

⁵Ore Simion o Lawi naa ilalashera, ore imasaa enye olarrabal naa ilalema lenye.

⁶Oi oltau lai, milotu ake enkiguana enye; Oi lotau lai, mintaa ninche encholiek. Amu te ngoro enye ear iltung'ana metuata, naa to lwuasa lenye etudung'o errishet o lkiteng.

⁷Metedeki engoro enye, amu kepi ninye; o engoro enye napi, amu ketolo! Ekaor ninche tiatua Yakobo, naidapash ninche tiatua Israel.

⁸Yuda, aikisis iyie ilalashera linono; Neibung inkaik inono imurto oo lmang'ati linono; ore ilayiok le papaai lino naa keirrugo te dukuya iyie.

⁹Ore Yuda naa ketiu anaa olkuoo lo lng'atuny; olotu eing'uaa eng'orore, enkerai ai ilepa iyie. Itadowuo iyie anaa olng'atuny aitirring'a, anaa elipong olng'atuny, aing'ae oitieu atuputu ninye.

¹⁰Meing'uaa eng'udi e nkitoria enkaji e Yuda, aashu orinka le nkitoria empolos oo nkejek enyena, ometaba anaa nebaiki ninye olopeny, neaku enenye enkanyit oo iltung'ana pooki.

¹¹Neeniki osikiria lenye olchani lo sabibu, ore olkurrarru lenye neeniki ilo sabibu gelunoti. Neisuj ninye inkilani enyena te naisho oo sabibu, neisuj inkilani enyena too lng'anayio oonyokie anaa osarge.

¹²Ekedoru inkonyek enyena te naisho oo sabibu. Neibor ilala lenyena te okoto e kule.

¹³Ore Sebulon naa kemany embata enaiposha, naa keaku ewueji neitasheyie imelin. Ore olpolosie lenye netii Sidon.

¹⁴Ore Isaakar naa osikiria ogol, neirrag te rishata oo muatat oo ntare.

¹⁵Etoduaa ajo ore eneyeng'iyeng'areki naa aisidai, naa ekeitishipisho enkop, metaa keirrugoo oloililae lenye anap, neaku orrindik te siaai naarakini.

¹⁶Ekeiguanare Dan iltung'ana lenyena, anaa obo loo loshon le Israel.

¹⁷Keaku Dan olasurai te nkoitoi, enturbubua te nkoitoi, ina naony intutuny oo mbartan, ometusulu ilo okedito embarta.

¹⁸Ekaanyu enjeunoto ino, iyie Olaitoriani.

¹⁹Kerasaki ilapurrok Gad, kake keibelekenyakino ninye ninche amir ninche.

²⁰Ore enkop e Asheri naa keiu endaa sapuk, naa keitayu ninye endaa nanya olkitok.

²¹Ore Naftali naa enkolii naipirri etalaayioki, neitayu ororei sidai.

²²Ore Yosef naa olng'osila oiu ilng'anayio, olng'osila loo lng'anayio te nkong'u enkare. Keibulaa ilng'osil lenyena esuntai.

²³Kearare ilang'orok loo mbaa ninye te ngolon, neng'or ninye, neitagor ninye oleng.

²⁴Nemeing'unung'unieki hoo enkawuo enye, neitaariyiani inkaik enyena, inkaik Olmagilani le Yakobo (Te nkarna e ilo Shekut, Endapidapoi e Israel).

²⁵Te Nkai e papaai lino laa ninye likiret iyie, te Nkai Magilani laa ninye likimayian iyie, too mayianat e keper e shumata. Imayianat oo neegut naairrag tiabori, imayianat oo lki o ene nguset.

²⁶Ore Imayianat e papaai lino naa Magil aalus too mayianat oo ldoinyo loo ntarasi. Ore nena tokitin sidain naaing'uaa ndoinyo oo ntarasi; metotonie ninche endukuya e Yosef, o enkopiyia eilo apa otoorori too lalashera lenyena.

²⁷Ore Benchamen, naa osuyiani otang'arase, neyooki enasirie aar eng'ues, ore teipa neor iyarunot.”

²⁸Ore kulo pooki naa iloshon tomon oaare le Israel; naa nena apa eitanapa menye pooki emayian ninye ninche, emayianaki pooki ng'ae emayianata naishiaakino ninye.

²⁹Ina pee eitanap Yakobo ilayiok lenyena nejoki ninche, “Ore amu ekalo enetii iltung'ana lainei te keeya; entunukayioki tenebo iloo papa te nkapune natii enkurma e Efron le Hiti.

³⁰Ina apune natii enkurma e Makpela, oloosaen le Mamre te nkop e Kanaan, nainyiang'ua apa Abraham tenebo o ina kurma e Efron lo Lhiti aitaa enenye nanukarie iltung'ana lenyena.

³¹Teine apa etunukaitie ninche Abraham o Sara enkitok enye naa te ninye sii etunukayioki Isaak o Rebeka enkitok enye; naa teine sii atunukayie Lea.

³²Ore ina kurma tenebo o ina apune natii atua neinyang'uaki apa too Lhiti.”

³³Ore pee eidip Yakobo aitanapa ilayiok lenyena, nerrinyoki inkejek enyena endapash, neirurayie ina. Nepiki ninye eneiturrurrorre olorere lenye pooki.