Read Maasai Bible – Biblia Sinyati 2 Samuel 11 Bible Online

2 Samuel 11 - Maasai Bible – Biblia Sinyati bible

2 Samuel 11

¹Ore te nkiterunoto o lari, ina kata apa napuoyie ilaiguanak olarrabal, neirriwaa Daudi Yoab o sinkan lenyena te nebo ninye o Israel pooki, neitalaku ninche elap too ltung'ana le Amoni neman aamuat Raba. Kake etotona Daudi te Yerusalem.

²Ore nabo olong, etigile enkolong ore pee edumunye Daudi te ndapash enye, neloolo ninye te nchumata e nkaji o laiguanani, nedol ninye te nchumata olperere enkitok nagira aitukuo; naa aisidai ina kitok oleng.

³Neirriwaa Daudi olkilikuai aikilikuanu ina kitok. Nejo obo, “Aime Batsheba ena, entito e Eliam, enkitok e Uria Olhiti?”

⁴Neaku eirriwayie Daudi ilkiliku, neya ninye; nelotu ninye enetii, neboitare ninye ninye. (Naa keitobira apa ninye kewan te nkiduruk enye o lapa.) Neitoki ashuko alo enkaji enye.

⁵Nenutayu ina kitok; neirriwaa ninye olkilikuai nejoki Daudi, “Atunute.”

⁶Neirriwaki Daudi Yoab oratioti[1], ajoki, “Irriwakaki nanu Uria loo Lhiti.” Neirriwaa Yoab Uria enetii Daudi.

⁷Ore pee elotu Uria enetii ninye, neikilikuanu Daudi enaasita Yoab o eneikununo iltung'ana o eneikunari olarrabal.

⁸Nejoki Daudi Uria, “Tadoi shomo enkaji ino, pee intuku inkejek inono.” Neipang Uria alo te nkaji o laiguanani, nesujaa ninye enkishooroto naing'uaa olaiguanani.

⁹Kake eirure Uria te kutukaji e nkaji o laiguanani te nebo isinkan pooki lo lkitok lenye, neitu elo enkaji enye.

¹⁰Ore ake pee ejoki ninche Daudi, “Eitu edoyio Uria alo enkaji enye,” nejoki Daudi Uria, “Keitu iyie ilotu aing'uaa enkop naado kainyoo pee eitu idoyio alo enkaji ino?”

¹¹Nejoki Uria Daudi, “Ore osanduku le Nkai e Israel o Yuda nebikito too lng'oborri; ore olkitok lai Yoab o sinkan lo lkitok lai netii ilng'oborri ti ong'ata naisiasha; kaji nanu aiko tenalo enkaji ai, adaa naokisho, nairrag te nebo enkitok ai? Ore anaa eninchu o anaa enaishu oltau lino, maas nanu ena bae.”

¹²Neitoki Daudi ajoki Uria, “Totona ake sii taata tene, ore taaisere naaisho iyie shomo.” Neaku etotona Uria te Yerusalem ina olong o pee ekenyu.

¹³Neitoomon Daudi ninye, nedaa ninye te dukuya ninye neokisho, neaku eitemera ninye; ore te nteipa neipang ninye alo airrag te ndapash enye te nebo isinkan lo lkitok lenye, kake eitu ninye edoyio alo enkaji enye.

¹⁴Ore tadekenya neigeroki Daudi Yoab empalai, neirriwaa te nkaina e Uria.

¹⁵Ore tiatua empalai neiger ajo, “Tipika Uria enkomom o larrabal ogol, paa intokiki aaitiakunye aaing'uaa ninye, pee etumi aatar metua.”

¹⁶Ore emanita Yoab enkanasa neisho ninye Uria ewueji neyiolo ajo ketii iltung'ana oopi.

¹⁷Neipang'u iltung'ana le nkanasa aapuonu aarare Yoab, ore embata oo ltung'ana le Daudi tiatua iltung'ana neurori. Ore Uria ilo Hiti nesesekuani sii ninye.

¹⁸Neirriwaa Yoab olkilikuai aliki Daudi ilomon pooki lo larrabal.

¹⁹Neitanap ninye ilo kilikuai, ajoki, “Ore ake pee indip ainosaki ilomon pooki lo larrabal olaiguanani,

²⁰ore ake pee eilep, engoro o laiguanani, ore ake pee kijoki iyie, ‘Kainyoo intae pee ishomo aataaniki enkang oleng to larrabal? Keitu intae iyiolouu aajo keng'oru mbaa te suntai.

²¹Kaing'ae apa natara Abimelek olayioni le Yerubeshet metua? Aime enkitok natanang'ua osoit oidong'ishoreki aitadoiki te suntai, neaku etua ninye te Tebes. Kainyoo intae pee ishomo oleng aanyikaki esuntai?’ Nijo iyie, ‘Ore sii osinka lino Uria Olhiti etua sii ninye.’ ”

²²Kaae nelo ilo kilikuai, nelotu neliki Daudi nena pooki naairriwua Yoab ninye metoliki.

²³Nejoki ilo tung'ani lo lkilikuai Daudi, “Enotokito iyiook iltung'ana, neipang'u aapuonu aarare iyiook ti ong'ata; kake kiterewa aashukoki enejing'ieki kishomi.

²⁴Neng'or iltung'ana loo mbaa isinkan linono te suntai; netuata embata oo sinkan lo laiguanani; ore osinka lino Uria Olhiti netua sii ninye.”

²⁵Nejoki Daudi ilo kilikuai, “Inji iyie shomo tiaaki Yoab, ‘Mincho iyie ena bae kintanyamal, amu kear olalem pooki ng'ae. Ntirrisha erasakinoto ino e nkanasa nimbung ninye.’ Nintagol ninye oshoke.”

²⁶Ore pee ening enkitok e Uria inchere etua Uria olpayian lenye, neishir ninye olkiyioi lo sina te nkaraki olpayian lenye.

²⁷Ore pee eishunye olkiyioi, neirriwaa Daudi olkilikuai neyau ninye enkaji enye, neaku ninye enkitok enye, neiki ninye olayioni. Kake ore ina bae nataasa Daudi neitu eitiship Olaitoriani.