Read Maasai Bible – Biblia Sinyati 2 Samuel 13 Bible Online

2 Samuel 13 - Maasai Bible – Biblia Sinyati bible

2 Samuel 13

¹Ore apa Absalom, olayioni le Daudi, neeta enkanashe sidai naji enkarna Tamar; ore pee elusoo enkata, nenyorru ninye Amnon, olayioni le Daudi.

²Neisomita oleng Amnon o metaba anaa nemuoyu te nkaraki enkanashe enye Tamar; amu eselenkei apa nemeyiolo olee neaku etaliee ajo meidimayu te Amnon pee eitaas ninye ae.

³Kake eeta apa Amnon olchore, oji enkarna Yonadab, olayioni le Shimea, olalashe le Daudi; ore apa Yonadab naa oltung'ani kalamas oleng.

⁴Nejoki Yonadab Amnon, “Olayioni lo laiguanani, kainyoo pee igira asasu anaake? Aimikiliki iyie nanu?” Nejoki Amnon ninye, “Kanyor nanu Tamar, enkanashe o lalashe lai Absalom.”

⁵Nejoki Yonadab Amnon, “Irraga te ndapash ino, nintaakuno anaa imuoi; ore ake pee kilotu papaai lino adol, tiaaki ninye, ‘Inchoo enkanashe ai Tamar aalotu aisho endaa nanya, neitobir endaa te dukuya nanu, pee atum nanu atoduaa ina daa, nanya nanu te nkaina enye.’ ”

⁶Neaku eirraga Amnon, neitaakuno kemuoi; ore ake pee elotu olaiguanani adol ninye, nejoki Amnon olaiguanani, “Inchoo siaake enkanashe ai Tamar elotu aitobir inkuti mukateni te dukuya nanu, pee aatum ninye aishoo endaa.”

⁷Neirriwaa Daudi olkilikuai enetii Tamar nejoki, “Shomo enkaji olalashe lino Amnon, intobiraki ninye endaa.”

⁸Neaku eshomo Tamar enkaji o lalashe lenye Amnon, ine apa neirragie. Neya ninye enkurma, neipurj, neitobir imukateni too nkonyek enyena, nepej imukateni.

⁹Neitayu ninye enkarae oo mukateni neitayu imukateni aisho te dukuya ninye, kake etanya ninye enya. Nejo Amnon, “Taarai pooki tung'ani maashomo aaing'uaa nanu.” Neipang pooki ng'ae alo aing'uaa ninye.

¹⁰Nejoki Amnon Tamar, “Iyau endaa atua olgilata, pee atum nanu ainosa te nkaina ino.” Neya Tamar nena mukateni naaitobira, neyau ninche atua olgilata enetii Amnon olalashe lenye.

¹¹Kake ore ake pee eyau ninche aitinyikaki ninye meinosa, neibung ninye, nejoki, “Wou, irraga te nebo o nanu, enkanashe ai.”

¹²Newaliki ninye ajoki, “A'a, olalashe lai, mikiaraki nanu; amu measi ena te Israel; mias ena torroni emodai.

¹³Amaa te nanu, kaji aya enkurruna ai? Amaa te iyie, nitiu iyie anaa obo loo larruok oomoda too Siraeli. Ore naa taata, aatasayia iyie, irorie olaiguanani, amu maamitiki ninye iyie.”

¹⁴Kake eitu ening, naa ore amu ninye ogol alang ninye, nearaki ninye, neirag ninye te nebo ninye.

¹⁵Neitoki Amnon aibayu ninye te nkiba sapuk; neaku ore enkiba naiba ninye naa aisapuk alang enyorrata apa natonyorra ninye. Nejoki Amnon ninye, “Tudumunye, shomo.”

¹⁶Kake etiaaka ninye, “A'a, olalashe lai, amu ore ena kitarruoroto nikiararie nanu naa aikitok alang ina ae nikintaasa nanu.” Kake meinining ninye ninye.

¹⁷Neipotu ninye olbarnoti apa oisiaaita ninye nejoki, “Iwuang'ie ena kitok tene natii nanu, ninken kutukaji te siadi ninye.”

¹⁸Neishopito apa ninye olkila oado adoru nkaik; amu inji apa eiko iselenken o laiguanani nemeyiolo olee te neishopo. Neaku eitayio osinka lenye ninye boo, neiken kutukaji te siadi ninye.

¹⁹Nepik Tamar nkuruon endukuya enye nepolos ilo kila oodo apa oishopito; neiteleiki inkaik enyena endukuya enye, nelo, neyietu aishir eloito.

²⁰Nejoki olalashe lenye Absalom ninye, “Ketii duoo Amnon olalashe lino te nebo o iyie? Tigirayu naa taata, enkanashe ai; olalashe lino ninye; minap ena to ltau.” Nebik Tamar, anaa enkitok naliyio, tiatua enkaji o lalashe lenye Absalom.

²¹Ore pee ening Olaiguanani Daudi kuna baa pooki, negoro ninye oleng.

²²Kake eitu eirorie Absalom Amnon aa esidai aa entorrono; amu eibayie apa Absalom Amnon, te nkaraki naikonya enkanashe enye Tamar.

²³Ore te siadi ilarin oaare oolulung'a neeta apa Absalom ilabarnok loo nkerra te Baal-hasor, naa ninye nataaniki Efraim, neitoomon Absalom ilayiok pooki lo laiguanani.

²⁴Nelotu Absalom enetii olaiguanani, nejo, “Ng'ura, eeta osinka lino ilabarnok loo nkerra; aatasayia inchoo olaiguanani o sinkan lenyena epuo te nebo osinka lino.”

²⁵Kake etiaaka olaiguanani Absalom, “A'a, olayioni lai, mincho iyiook kipuo pooki, mikiaku ake iyiook olola te iyie.” Neitirrishaki ninye, kake meyieu ninye nelo kake eishoo ninye emayianata enye.

²⁶Nejo Absalom, “Ti nimilo, aatoomono inchoo olalashe lai Amnon elo te nebo o iyiook.” Nejoki olaiguanani ninye, “Kainyoo pee elo ninye te nebo intae?”

²⁷Kake eitirrishaka Absalom ninye o metaba anaa neisho ninye Amnon o layiok pooki lo laiguanani meshomo te nebo ninye.

²⁸Neitanap Absalom isinkan lenyena, ejo, “Entujurru ore ake pee emera Amnon te naisho oo sabibu, ore ake pee ajoki intae, ‘Entoosh Amnon,’ niariara intae ninye metua. Emiureisho; aime nanu oitanapa intae? Entipij niarriyianunu.”

²⁹Neaku eitaasa isinkan le Absalom Amnon anaa enaitanapishe Absalom. Nedumunye ilayiok lo laiguanani pooki, neked ake oltung'ani enyumpu enye neisik.

³⁰Ore epuoito ninche te nkoitoi, nepuonu ilomon enetii Daudi, nejo “Etaara Absalom ilayiok lo laiguanani pooki, metuata neitu ninye eing'uari obo.”

³¹Nedumunye olaiguanani, nepolos ilkilani lenyena, neirrag te nkop; ore isinkan lenyena pooki apa ooitashe te mbata nepolos ilkilani lenye.

³²Kake etejo Yonadab olayioni le Shimea, ilo alashe le Daudi, “Mincho olkitok lai ejo ketaara ninche metuata lelo barnot pooki, lelo ayiok lo laiguanani, amu Amnon ake otua, amu te nkitanapata e Absalom etaasaki ena ebaiki apa enkolong naikonya ninye enkanashe enye Tamar.

³³Ore naa taata, mincho olkitok lai olaiguanani epik oltau adamu ajo etuata ilayiok pooki lo laiguanani; amu Amnon ake otua.”

³⁴Kake eisika Absalom. Ore apa olbarnoti orripisho nedumu inkonyek enyena, neing'orisho, nedol epuonu iltung'ana aaimu enkoitoi e Horonaim emurte o ldoinyo.

³⁵Nejoki Yonadab olaiguanani, “Ng'ura, eetuo ilayiok lo laiguanani; anaa enatejo osinka lino, metaa ketaa ina.”

³⁶Ore ake enaidipie airoro, nepuonu ilayiok lo laiguanani, neilepie oltoilo neishir; ore olaiguanani o sinkan lenyena pooki neishir te mion oleng.

³⁷Kake eisika Absalom, nelo enetii Talmai olayioni le Amihud, olaiguanani le Geshur. Neishir Daudi te nkaraki olayioni lenye anaake.

³⁸Neaku eisika Absalom, nelo enetii Geshur, netii apa ine ilarin okuni.

³⁹Neyieu oltau lo laiguanani nelo enetii Absalom; amu eitigiraki tialo Amnon, etodua ajo etua ninye.