Read Maasai Bible – Biblia Sinyati 2 Samuel 15 Bible Online

2 Samuel 15 - Maasai Bible – Biblia Sinyati bible

2 Samuel 15

¹Ore te siadi ena neing'uraki Absalom kewan engarri oo mbartan o ltung'ana onom ookuet te dukuya ninye.

²Naa keinyototo apa Absalom ayooki neitashe te mbata enkoitoi e kishomi; ore te neeta oltung'ani enkiguana nayau dukuya olaiguanani pee eiguanareki, neipotu Absalom ninye, nejo, “Kaa anasa ing'uaa iyie?” Ore ake pee ejo, “Ore osinka lino naa olosho oje te Israel,”

³nejoki Absalom ninye, “Ng'ura, kesipa neishiaakino ena niyieu; kake metii oltung'ani otegelua olaiguanani likining iyie.”

⁴Nepon Absalom ajo, “Oi naaji tena kara oladung'oni le nkiguana tena kop! Neaku ore pooki tung'ani oata enkiguana aashu enaikilikuanu neidim aeu enatii, naisho nanu ninye esipata.”

⁵Naa ore ake pee ejo oltung'ani anyiku alotu aserem ninye, neitorioo enkaina enye neibung ninye, neng'utut ninye.

⁶Neiko neijia Absalom too ltung'ana loo Israeli oopuonu enetii olaiguanani metundung'okini enkiguana; neaku etupurroyie Absalom iltauja loo ltung'ana le Israel.

⁷Ore te nkiting'oto oo larin oong'uan nejoki Absalom olaiguanani, “Aatasayia inchooki nanu mashomo alak olmumai apa lainosa to Laitoriani, te Hebron.

⁸Amu einosa apa osinka lino olmumai amanya Geshur natii Aram, najo, ‘Kesipa te naaitoki nanu Olaitoriani ashuku Yerusalem, naitayu nanu eseremata to Laitoriani.’ ”

⁹Nejoki olaiguanani ninye, “Shomo te seriani.” Neaku etudumunye ninye nelo Hebron.

¹⁰Kake eirriwayie Absalom ilkiliku te nkisudoroto atua Israel pooki, ejo, “Ore ake pee ining'ining'i oltoilo le mowuo, entejo, ‘Absalom olaiguanani te Hebron!’ ”

¹¹Nepuo te nebo Absalom iltung'ana iip are ooing'uaa Yerusalem aa ilomon apa ooitoomonoki, nepuo ninche meeta ae too ltauja neitu eyiolou toki.

¹²Ore eitayu Absalom olasar, neirriwaki olkilikuai meipotuni Ahitofel ilo le Gilom olaikooni le Daudi meeu te nkanasa enye Gilo. Neponari enkarruoisho e Absalom, ore iltung'ana ootii te nebo Absalom neponari.

¹³Nelotu olkilikuai enetii Daudi, ejo, “Eshomo iltauja loo ltung'ana le Israel aasujaa Absalom.”

¹⁴Nejoki Daudi iltung'ana lenyena, pooki apa ootii te nebo ninye te Yerusalem, “Entudumunye, emaisika iyiook, aashu eaku mikiata iyiook enikisikaki aailany Absalom; enchom entasiooi meinepu ake ninye iyiook asioki, neyau entorroni aitadoiki shumata iyiook, neshurt ena anasa te nepi o lalem.”

¹⁵Nejoki isinkan lo laiguanani olaiguanani, “Ng'ura aajo eanyita isinkan linono pee eas enaba anaa enadung'u olkitok lai olaiguanani.”

¹⁶Neaku eshomo olaiguanani, ore enkaji enye pooki nesujaa ninye. Neing'uaa olaiguanani inkapiak tomon pee eing'or enkaji.

¹⁷Nelo olaiguanani nesujaa iltung'ana po oki ninye; neitashe ninche te nkaji nabayie.

¹⁸Negiroo isinkan lenyena pooki ninye; o Lkereti pooki o Lpeleti o lelo iip ile le Giti apa ootusujaitie ninye ebaiki Gas, negiroo aaim dukuya olaiguanani.

¹⁹Nejoki olaiguanani Itai ilo le Giti, “Kainyoo sii pee ilo iyie te nebo o iyiook? Tushukoyu shomo, pee ilo aton te nebo olaiguanani; amu ira iyie olomoni, nira sii oloisikua aing'uaa enkang ino.

²⁰Ng'ole ake iewuo iyie, naa kaaisho nanu iyie taata tamanai te nebo o yiook, idolita ajo aloito, nemayiolo enalo? Tushukoyu shomo, nirik ilalashera linono te nebo o iyie; naa mikintoduaa iyie Olaitoriani enyorrata nauno o enkisiligata.”

²¹Kake etawalikia Itai olaiguanani ajoki, “Ore anaa enaishu Olaitoriani, naa ore enaishu olkitok lai olaiguanani, ore eneba enaa enetii olkitok lai olaiguanani, aa te keeya aashu te nkishui, ine sii ninye etii osinka lino.”

²²Nejoki Daudi Itai, “Shomo naa, tulusoi.” Neaku eshomo Itai ilo le Giti agiroo, te nebo iltung'ana lenyena pooki o nena kutiti pooki apa naatii te nebo ninye.

²³Neishir enkop pooki ayietu egiroo iltung'ana pooki, nelang olaiguanani oerata le Kidron, negiroo iltung'ana pooki aing'or enkalo o lpurkel.

²⁴Neilepu Abiata, nelotu sii Sadok, te nebo Ilawi pooki, enapita osanduku lo sotua le Nkai; neirragie ninche ilo sanduku le Nkai, o metaba anaa negiroo iltung'ana pooki ti oriong enkanasa.

²⁵Nejoki olaiguanani Sadok, “Entanap osanduku le Nkai, entorriny atua enkanasa. Te natum nanu omom too nkonyek o Laitoriani, naa kaashuku ninye naaisho ninye matodua ninye o emanyisho enye;

²⁶kake te nejo ninye, ‘Maashipakino nanu iyie,’ ng'ura, nele nanu, inchoo ninye maaitaasa ina nadol aa sidai te ninye.”

²⁷Neitoki ake sii olaiguanani ajoki Sadok olapolosani, “Tushukoyu shomo enkanasa te seriani, iyie o Abiata, te nebo ilayiok linyi pokira oaare, Ahimasi olayioni lino o Yonatan olayioni le Abiata.

²⁸Ng'ura, kaanyu nanu iyie too lang'at o lpurkel, o metaba anaa nelotu oratioti oing'uaa enitii pee aaitayiolo nanu.”

²⁹Neaku etanapa Sadok o Abiata osanduku le Nkai aashuk Yerusalem; nebik ninche teine.

³⁰Kake eilepa Daudi alo enchumata o ldoinyo loo loirienito, neishiraa eloito, meeta namuka neimulumula endukuya enye; ore lelo tung'ana pooki ootii te nebo ninye neimulumul ilukuny enye, neilep ninche aapuo, neishiraa epuoito.

³¹Nejokini apa Daudi, “Etii Ahitofel atua lelo arruok te nebo Absalom.” Nejo Daudi, “Olaitoriani, aatoomono nanu iyie, imbelekenya enkiguana e Ahitofel metaa emodai.”

³²Ore ake pee elotu Daudi entopij o ldoinyo ine apa neseremieki Enkai, nelotu Hushai ilo Akiti anang'are ninye epolosa olkila lenye lioriong netii enterit endukuya enye.

³³Nejoki Daudi ninye, “Ti nilo iyie te nebo nanu niaku iyie olola te nanu.

³⁴Kake ti nishuko iyie alo enkanasa, nijoki Absalom, ‘Kaaku nanu osinka lino, iyie olaiguanani, naa ore apa anaa enara nanu osinka le papaai lino te nkata natulusoyie, neijia sii taata etiu, kaaku nanu osinka lino,’ niaku intashal iyie te nkaraki nanu enkiguana e Ahitofel.

³⁵Aimetii Sadok o Abiata ilapolosak te nebo o iyie te idie? Metaa ore enaba anaa enining te nkaji o laiguanani, toliki Sadok o Abiata ilapolosak.

³⁶Ng'ura etii ilayiok lenye pokira oaare te nebo ninche teine, Ahima-as, olayioni le Sadok o Yonatan, olayioni le Abiata; naa te ninche kirriwaki nanu pooki toki nining.”

³⁷Neaku eewuo Hushai, olchore le Daudi atua enkanasa, ina kata apa ejing'ita Absalom Yerusalem.