Read Maasai Bible – Biblia Sinyati 2 Samuel 17 Bible Online

2 Samuel 17 - Maasai Bible – Biblia Sinyati bible

2 Samuel 17

¹Neponaa Ahitofel ajoki Absalom, “Inchooki nanu mategelu iltung'ana inkalifuni tomon o are, pee aipang nanu amir Daudi kewarie.

²Naa karasaki nanu enetii ninye enaure netashala, nanang'aki ninye atua enkiputukuny; ore iltung'ana ootii te nebo ninye neisik. Naar nanu olaiguanani ake,

³naayaki nanu iltung'ana pooki enitii anaa esiankiki narikuni ang aarikoki olpayian lenye. Ing'oru iyie enkishui o ltung'ani obo ake, ore iltung'ana pooki neserianu.”

⁴Neitiship ina kikoo Absalom o lpayiani pooki le Israel.

⁵Neitoki Absalom ajo, “Empoto sii ninye Hushai ilo Alkiti, pee kining iyiook enajo ninye.”

⁶Ore pee elotu Hushai enetii Absalom, nejoki Absalom ninye, “Inji eiroro Ahitofel ajo; amaa aikias iyiook anaa enautu ninye? Tinimikias iroro naa iyie.”

⁷Nejoki Hushai Absalom, “Ore tena kata enkikoo naishorua Ahitofel neme sidai.”

⁸Nejo Hushai, “Ore ake, iyiolo inchere ore papaai lino o ltung'ana lenyena naa ltung'ana magil netarasutua sii, anaa olng'arurumi otooruoki inkera enyena ti ong'ata. Ore etii ina, kaarriyia papaai lino to larrabal; meirura ninye kewarie te nebo iltung'ana.

⁹Ore ninye taata eisudoyie ninye kewan te ngumoto nabo, aashu ti ae wueji. Naa ore ake pee ebatata embata oo ltung'ana te rasakinoto e dukuya, ore pooki ng'ae oning nejo, ‘Ketii enkidaaroto atua lelo tung'ana oosujita Absalom.’

¹⁰Neaku ore ninye oltung'ani opi, oikununo oltau anaa oltau lo lng'atuny, nelepori tukul te nkuretisho; amu eyiolo Israel pooki inchere ore papaai lino naa oltung'ani magilani, naa ore lekua ootii te nebo ninye naa iltung'ana oopi.

¹¹Kake ore eutaroto ai naa inchere pee kinturrurrokino iyie Israel pooki, ebaiki Dan o metabaiki Beer-sheba, eba anaa osinyai le naiposha te nkumoi naa inchere, mirikoo iyie makewan olarrabal.

¹²Neaku eikipuonu iyiook shumata ninye tiatua ewueji neba anaa enetumieki ninye, paa eikidoiki iyiook ninye te wueji neba anaa enetumieki nikidoiki iyiook ninye anaa enadoiki enkoileelio enkop; ore te ninye o ltung'ana pooki ootii te nebo ninye meing'uari ninye obo.

¹³Naa tenelo ninye ajing atua enkanasa, neyau Isiraeli pooki inkeenta ina ang, nikinkurtutaa iyiook ina ang atua oerata o metaba anaa neaku metumi ninye osoit obo teine.”

¹⁴Ore Absalom o ltung'ana pooki le Israel nejo, “Ore enkikoo e Hushai Olakiti naa aisidai alang enkikoo e Ahitofel.” Amu etegelua Olaitoriani pee emir enkikoo sidai e Ahitofel, pee etum Olaitoriani ayau entorroni shumata Absalom.

¹⁵Nejoki Hushai Sadok o Abiata lelo apolosak, “Inji o nji eikoo Ahitofel Absalom o lpayiani le Israel; naa inji o nji nanu aikoo.

¹⁶Ore naa taata erriwai ilkiliku entasioki entiaki Daudi, “Mirura taata iyie kewarie too lang'at oo lkejek to lpurkel, kake togiroi tukul; meijori ake olaiguanani o ltung'ana pooki ootii te nebo ninye.”

¹⁷Ore apa Yonatan o Ahima-aa neanyisho ninche te En-rogel; nelo apa enkaisiaayiani aliki ninche, nepuo ninche aaliki olaiguanani Daudi; amu meeta inchere pee etoduaki ninche ejing enkanasa.

¹⁸Kake etoduaa ninche enkayioni, neliki Absalom; neaku eshomo ninche pokira are aasiooyo, nepuonu enkaji o ltung'ani te Bahurim, apa oata enchorro ti oriong e nkaji enye; nedoiki ninche atua.

¹⁹Neya enkitok neimulumul enkutuk e nchorro, neidapashaki enkano shumata enye; neaku meyiolounoyu toki.

²⁰Ore pee epuonu isinkan le Absalom enetii ina kitok ti aji, nejo ninche, “Koree Ahima-as o Yonatan?” Nejoki ina kitok ninche, “Eshomo ninche aalang ereyiet.” Ore ake pee esujaa ninche neitu einepu ninche, neshukunye ninche aapuonu Yerusalem.

²¹Ore pee eidip ninche aatulusoi, neilepu lelo tung'ana te nchorro, nepuo aaliki Olaiguanani Daudi. Nejoki ninche Daudi, “Tudumunye, nilo asiooyo alang enkare; amu inji o nji eikoo Ahitofel te iyie.”

²²Nedumunye Daudi, o ltung'ana pooki apa ootii te nebo ninye, nelang ninche Yordan; ore enasirie eitu eleku obo leitu elang Yordan.

²³Ore ake pee edol Ahitofel ajo eitu esuji enkikoo enye, neirot osikiria lenye, nelo ninye ang enkanasa enye makewan. Neitobir mbaa e nkaji enye, negor kewan; neye ninye, nenukari te nkurare e papaai lenye.

²⁴Neitoki Daudi alotu Mahanaim. Nelang Absalom Yordan te nebo iltung'ana pooki loo Siraeli.

²⁵Netipika apa Absalom Amasa shumata enjore te rishata e Yoab. Ore apa Amasa naa olayioni lo ltung'ani oji Itra le Ishimail, apa oyama Abigail entito e Nahash, enkanashe e Seruiya, ng'otonye Yoab.

²⁶Ore Israel o Absalom neitayu ilng'oborri te nkop o Gilead.

²⁷Ore pee elotu Daudi Mahanaim, ore Shobi olayioni le Nahash oing'uaa Raba oo lamori, o Makir olayioni le Amiel oing'uaa Lo-deba, o Barsilai o Lgiliadi ooing'uaa Rogelim,

²⁸neyau indapashi o mbakulini o motioo oo nkulupuok o enkano o shairi o enkurma naidong'o o mpoosho o ndaiki oo mpukunot pooki,

²⁹o enaisho o eng'orno o nkerra naaitung'uari eluaata te nkaraki Daudi o ltung'ana ootii te nebo ninye pee enya; amu etejo ninche, “Keeta iltung'ana esumash nenaurate nenoto enkure ti ong'ata.”