Read Maasai Bible – Biblia Sinyati 2 Samuel 18 Bible Online

2 Samuel 18 - Maasai Bible – Biblia Sinyati bible

2 Samuel 18

¹Neiturrur Daudi aiken iltung'ana pooki apa ootii te nebo ninye, nepik shumata ninche ilarikok loo nkalifuni o larikok loo maa iip.

²Neya Daudi enjore e matua nabo e uni ti abori erikore e Yoab, ematua nabo e uni ti abori erikore e Abishai olayioni le Seruiya, olalashe le Yoab, o ematua nabo e uni ti abori erikore e Itai Olgiti. Nejoki olaiguanani lelo tung'ana, “Kalo sii nanu makewan aipang te nebo o intae.”

³Kake etejo lelo lewa, “Mimpang iyie alo. Amu ti nikisik iyiook nemeshilaa ninche iyiook. Te neye olpisiai lang nemeshilaa ninche iyiook. Kake inyaanyukie iyie iip tomon katitin tomon lang. Metaa enaikash tinirriwaki iyie iyiook eretoto te nkanasa.”

⁴Nejoki olaiguanani ninche, “Ore enaba anaa enidolidolo aa sidai te intae naas nanu.” Neaku eitashe olaiguanani te mbata e kishomi, ina kata eruko enjore pooki aapuo too maa iip o too nkalifuni.

⁵Neitanap olaiguanani Yoab o Abishai o Itai, ajoki, “Emintaas entorrono te nkaraki nanu ilo barnoti Absalom.” Nening iltung'ana pooki eishorita olaiguanani inkitanapat lelo arikok pooki le njore tialo Absalom.

⁶Neaku eipang'a enjore alo ong'ata aarare Israel; neitayuni olarrabal tiatua entim e Efraim.

⁷Nemiri iltung'ana le Israel teine isinkan le Daudi, nesapuku enkidaaroto teine ina olong, iltung'ana inkalifuni tikitam oidaa.

⁸Neidapashakino olarrabal oriong enkop pooki; nenya entim iltung'ana kumok ina olong alang ilotara olalem.

⁹Nediding Absalom isinkan le Daudi. Nekedito apa Absalom enyumpu enye, nelo enyumpu aim abori ilng'osil sapuki lo lchani neng'amari endukuya too lng'osil, neing'uari ninye eililio to lng'am; ore ina nyumpu apa natii abori ninye nelo.

¹⁰Nedol oltung'ani obo, neliki Yoab, “Ng'ura, atoduaa nanu Absalom eisiong'a to lchani.”

¹¹Nejoki Yoab ilo tung'ani otiaka ninye, “Kainyoo, itoduaa iyie ninye! Kainyoo naa pee eitu iosh ninye teine asulaki enkop? Anaata naaji ashipa nanu naaisho iyie mpisai tomon e nkosholai o enkeene e mpolos.”

¹²Kake etiaaka ilo tung'ani Yoab, “Ore naaji ninye hoo te naning nanu te nkaina ai enkiroishi oo mpisai inkalifuni tomon e nkosholai, maitorioo nanu enkaina ai aar olayioni lo laiguanani; amu ore te ning'oto ang nikintanapa iyie olaiguanani o Abishai o Itai, ejo, ‘Ore te nkaraki nanu entomitu ilo barnoti Absalom.’

¹³Ore sii enkae, tenaa naaji kaitaasa nanu enkishui enye entorrono (nemetii entoki naisudoro to laiguanani) anaata indim iyie makewan atekepari.”

¹⁴Nejo Yoab, “Maitoki nanu aiturraa enkata aiko nji te nebo o iyie.” Neyau ninye iremeta uni te nkaina enye neibitaki ninche oltau le Absalom, eton eishu to lchani.

¹⁵Ore ilbarnot tomon anapak loo masaa o larrabal e Yoab, neman ninche Absalom neosh ninye near ninye metua.

¹⁶Neosh Yoab emowuo nepuonu iltimito aashukunye te mirata oo Siraeli amu etomitikio Yoab ninche.

¹⁷Neitayu ninche Absalom, nenang'aki ninye atua engumoto sapuk tiatua entim, nesot te shumata ninye osototi sapuk loo soito, neisik Israel pooki, pooki ng'ae alo enkang enye.

¹⁸Ore apa Absalom eton eishu neitobiraka kewan eng'ape osoit natii atua oerata lo Laiguanani, amu etejo ninye, “Maata nanu olayioni oshum enkarna ai metadamuni.” Neipotie ina ng'ape kewan, naa keji enadamunyeki Absalom o metabaiki ena olong.

¹⁹Nejo Ahimaas olayioni le Sadok, “Inchooki nanu makueta, pee aya ilomon sidain enetii olaiguanani inchere etalakua Olaitoriani ninye aitung'uaa engolon oo lmang'ati lenyena.”

²⁰Nejoki Yoab ninye, “Miya iyie ilomon taata; indim iyie aawa ilomon ae olong, kake ore taata miya iyie ilomon, amu etua olayioni lo laiguanani.”

²¹Neitoki Yoab ajoki ilo tung'ani le Kushi, “Shomo tiaaki olaiguanani ina nitoduaa.” Neirrugo Olkushi te dukuya Yoab, nekuet.

²²Neitoki Ahimaas olayioni le Sadok ajoki Yoab, “Inchoo etiu enatiu, inchooki sii nanu makueta asujaa Olkushi.” Nejoki Yoab, “Kainyoo iyie pee ikuet, olayioni lai, idolita ajo mitum iyie olerrinyore too lomon?”

²³Nejo ninye, “Inchoo eaku enaaku, kakuet ake.” Neaku etiaaka ninye, “Kueta.” Nekuet Ahimaas te nkoitoi e nkisiashata negiroo ilo Kushi.

²⁴Netonita apa Daudi te rishata oo nchomito are; neilep olarriponi alo shumata kishomi te mbata e suntai, ore ake pee eshumu inkonyek enyena neing'orisho, nedol oltung'ani okuetu openy.

²⁵Neipotisho olarriponi neliki olaiguanani. Nejo olaiguanani, “Tenaa ninye ake, netii ilomon sidain enkutuk enye.” Nelotu ninye anyiku netaanu.

²⁶Nedol olarriponi likae tung'ani ekuetu; neipotisho olarriponi te kishomi nejo, “Ng'ura ekuetu likae tung'ani openy!” Nejo olaiguanani, “Ilomon sidain sii ninye eyau.”

²⁷Nejo olarriponi, “Amen ajo ore enkuetata ole dukuya naa kenyaanyukie enkuetata e Ahimaas olayioni le Sadok.” Nejo olaiguanani, “Oltung'ani supat ninye naa kelotu ayau ilomon sidain.”

²⁸Neishiraki Ahimaas olaiguanani ajo, “Eseriani.” Neirrugo ninye te dukuya olaiguanani nebaiki enkomom enye enkop, nejo, “Meisisi Olaitoriani Enkai ino, laa ninye oishooyie lelo tung'ana ootekepari aarare olkitok lai olaiguanani!”

²⁹Nejo olaiguanani, “Aisidain mbaa tialo ilo barnoti Absalom?” Newalu Ahimaas ejo, “Ore pee eirriwaa Yoab osinka lino, nadol enking'oling'ol sapuk, kake mayiolo nanu ajo kainyoo.”

³⁰Nejo olaiguanani, “Imbelekenyau intasho tene.” Neaku eitasho ninye te mbata, neitashe aitirring'a.

³¹Naa ng'ura, nelotu Olkushiti; nejo ilo Kushiti, “Ilomon sidain to lkitok lai olaiguanani! Amu kitokordua iyie Olaitoriani ena olong aitung'uaa engolon e pooki apa likitudumakinote iyie.”

³²Nejoki olaiguanani Olkushiti, “Aisidain mbaa tialo ilo barnoti Absalom?” Newal ilo Kushiti ajo, “Metaa ilmang'ati lo lkitok lai olaiguanani o pooki likidumakino aarare iyie te ntorroni, etiu anaa ilo barnoti.”

³³Nenyamalu olaiguanani oleng, neilep alo olgilata otii shumata kishomi neishir; naa ore eloito, nejo ninye, “Oi olayioni lai Absalom, olayioni lai, olayioni lai Absalom! Enyor naa katua nanu te rishata ino, Absalom, olayioni lai, olayioni lai!”