Read Maasai Bible – Biblia Sinyati 2 Samuel 22 Bible Online

2 Samuel 22 - Maasai Bible – Biblia Sinyati bible

2 Samuel 22

¹Neirorie Daudi Olaitoriani irorei lele sinkolio ina olong natalakua ninye Olaitoriani aitung'uaa enkaina oo lmang'ati lenyena pooki, neitung'uaa enkaina e Saul.

²Nejo ninye; Olaitoriani ninye endapidapoi ai, naa osempewuet lai, naa ololakunoni lai.

³Enkai ai, endapidapoi ai, laa ninye esarunoto ai elong'o ai o emowuo enjeunoto ai, oltim lai o enkisudoroto ai, Olaitajeunoni lai; kintajeuo iyie nanu aitung'uaa entorroni.

⁴Aipoto nanu Olaitoriani, laa ninye eishiaakino nerrepi, naaitajeuoki nanu too lmang'ati laainei.

⁵“Amu aamanita nanu ilopir le keeya, naapik nanu indoorot e ntorroni enkuretisho.

⁶Aarrueshita nanu inkeenta e nemeneng'a, naaluaakino nanu irresheta le keeya.

⁷“Ore tiatua osina ai nanu aipoto Olaitoriani; Enkai ainanu aipoto. Te nkaji enye etoning'o ninye oltoilo lai, nelotu enkishirata ai nkiyiaa enyena.

⁸“Kaae neikirikira enkop neigirigiro; ore ilkitamanyunot le shumata, neigirigiro, te nkaraki natagore ninye.

⁹Nepuku empuruo eing'uaa inkumeishin enyena, nepuku enkima nanyaisho te nkutuk enye; inkuk naaishu naayupuyup epuku te ninye.

¹⁰Neirrugu ninye shumata, nelotu adou; netii emisimisi nairrusha abori inkejek enyena.

¹¹Etakedo ninye enchumata olkerubi, nelo tiaai; etoduaaki ninye te nchumata oo naipuko osiwuo.

¹²Eishoo enaimin metamana ninye, neman ninye inkatampo naairrusha o nkariak naaiturrurro.

¹³Nepuku teina wang'an natii dukuya ninye inkuk e nkima naayupuyup.

¹⁴Etadara Olaitoriani te keper, ore ilo otii shumata oleng neitayu oltoilo lenye.

¹⁵Neng'oru ninye imbaa, neidapash ilmang'ati lenyena; te nkiwuang'ata etang'oruo ninche.

¹⁶Nedoli kop e naiposha, neirragieki ilkitamanyunot le nkop meirraga aaibalayu, te nkisikong'ata o Laitoriani, te nkutata e nkiyang'et oo nkumeishin enyena.

¹⁷“Neitoriou ninye enkaina enye te shumata naaya ninye nanu, naaitayu tiatua inkariak kumok.

¹⁸Aatokordua te nkaina o lmang'atinta lai ogol, aitung'uaa lelo apa laaiba nanu; amu kegol apa oleng te nanu.

¹⁹Eetuo ninche shumata nanu te nkolong ai e nyamali; kake etaa Olaitoriani enkigarakinoto ai.

²⁰Aayaua ninye nanu atua ewueji nelala; aatokordua amu kaashipakino ninye nanu.

²¹“Aaitaasa nanu Olaitoriani te risioroto e supatisho ai; te risioroto e ina nemeiduruk inkaik aainei aaitaasa ninye.

²²Amu aibung'a inkoitoi o Laitoriani, neitu nanu te ntorroni aing'uaa Enkai ai.

²³Amu ore inkitanapat enyena pooki netii dukuya nanu, ore too nkitanapat enyena neitu nanu aibelekenya.

²⁴Maata apa nanu eleyiata te dukuya ninye, narrip nanu kewan te ntorroni.

²⁵Metaa aaitaasa nanu Olaitoriani te risioroto e supatisho ai, te risioroto e ina nemaiduruk nanu too nkonyek enyena.

²⁶“Ore te ilo oisiligayu nintodol kewan ajo keisiligayu; ore to ltung'ani lemeeta eleyiata nintodol kewan ajo miata eleyiata;

²⁷Ore te ilo oikishian nintodol iyie kewan ajo inkishian, ore ilo lemeitoriori nintodol iyie ajo ira olo larrabal.

²⁸Ikordu iyie iltung'ana oobor, kake etii inkonyek inono shumata iloowuasa pee intadou ninche.

²⁹Ee, ira iyie oltaa lai, Olaitoriani, naa keitawang Enkai ai enaimin ai.

³⁰Ee, te iyie aidim nanu aidaikie oltim, naa te Nkai ainanu aidim aida esuntai.

³¹Ore ena Ai - kesipa enkoitoi enye; ore enkisiligata o Laitoriani naa keibalayu ajo kesipa; elong'o ninye te pooki ooing'oru enkisudoroto te ninye.

³²“Amu kaing'ae Enkai, neme Olaitoriani? Naa kaing'ae endapidapoi, neme Enkai ang?

³³Ore ena Ai naa enkisudoroto ai nagol, netaseriana ninye enkoitoi ai.

³⁴Neitagol ninye inkejek aainei anaa entarakuet, naagolie ninye mabatata too neeika.

³⁵Neiteng'en ninye inkaik aainei to larrabal, metaa keidim inkaik aainei atoolua enkawuo osuyai.

³⁶Kinchoo iyie nanu elong'o e njeunoto ino, naaitaa nanu eretoto ino kitok.

³⁷Kinchoo iyie nanu ewueji nelala too roruat aainei ti abori nanu, neitu eideketari inkejek aainei;

³⁸atusujayie nanu ilmang'ati laainei naidaikie ninche, neitu ashukunye o metaba anaa neishunye ninche.

³⁹Aishua nanu ninche; ataremo nanu ninche aipang'ie, metaa eitu ninche edumunye; etabatatate ti abori inkejek aainei.

⁴⁰Amu kiterretena nanu te ngolon te nkaraki olarrabal; nincho iyie ilmang'ati laainei meimiso ti abori nanu.

⁴¹Inchoo iyie ilmang'ati laainei maaibelekenyaki inkoriong'i enye, lelo laaiba nanu, naidaikie nanu ninche.

⁴²Neing'orisho, kake metii hoo obo oitajeu ninche; eishirakita ninche Olaitoriani, kake eitu ninye ewaliki ninche.

⁴³Aidong'o nanu ninche naitunyoki ninche enkop anaa esarng'ab e nkoitoi.

⁴⁴“Kintajewuo iyie nanu te lelo tung'ana ootekepari aakeshisho; kitipika nanu mataa endukuya oo loreren; ore apa iltung'ana leitu nanu ayiolou naaisiaai nanu.

⁴⁵Nepuonu iloo loreren naairrugokino nanu; ore ake pee aaning'oo nanu, naairuk ninche nanu.

⁴⁶Etapalari iloo loreren, nepuonu eikirikira aaipang'u too nkisudorot enye.

⁴⁷“Keishu Olaitoriani! Meisisi endapidapoi ai! Naa meitubulari enkitoo e Nkai ai, endapidapoi e njeunoto ai.

⁴⁸Ina Ai naaitalaaka nanu elap neitadou iltung'ana apik abori nanu,

⁴⁹laa ninye laaitayio nanu aitung'uaa ilmang'ati laainei; naailepie nanu te shumata ilmang'ati laainei, nikikordu iyie nanu aitung'uaa iltung'ana arruok.

⁵⁰“Ore tena, kaaisis nanu iyie Olaitoriani, tiatua iloreren, naa karanyaki irrepat e nkarna ino.

⁵¹Inkisulat sapuki eisho ninye olaiguanani lenye, neitodolu enyorrata nauno te ilo lenye obukokino eilata, Daudi o eishoi enye intarasi.”