Read Maasai Bible – Biblia Sinyati 2 Samuel 24 Bible Online

2 Samuel 24 - Maasai Bible – Biblia Sinyati bible

2 Samuel 24

¹Neitoki engoro o Laitoriani ayupuyup te nkaraki Israel, nepik Olaitoriani Daudi endamunoto te nkaraki ninche, nejo, “Shomo inkena Israel o Yuda.”

²Neaku etiaaka olaiguanani Yoab o lkituaak le njore, apa ootii te nebo ninye, “Enchom atua iloshon pooki le Israel, ebaiki Dan o metabaiki Beer-sheba, ninkenikene iltung'ana, pee atum atayiolo esiana oo ltung'ana.”

³Kake etiaaka Yoab olaiguanani, “Metoponai Olaitoriani Enkai ino iltung'ana katitin iip aa kumok anaa enaba, eton edolita inkonyek o lkitok lai olaiguanani; kake kainyoo pee eshipakino olkitok lai olaiguanani ena bae?”

⁴Kake etune ororei lo laiguanani te Yoab o too lkituaak le njore. Neaku eshomo Yoab o lkituaak le njore teine netii olaiguanani aapuo aaiken iltung'ana.

⁵Nelang ninche Yordan, neiteru abaiki Aroer, o metabaiki ina anasa natii atua empolos o erata, te nkalo e Gad nelo Yaser.

⁶Neitoki aapuonu Gilead o Kadesh tiatua enkop oo Lhiti; nepuonu ninche Dan, nepuo te Dan nemanaa aapuo Sidon,

⁷nepuonu enkisudoroto e Tiro o nkang'itie oo Lhafi o Lkanaani; neipang ninche aapuo Negeb e Yuda te Beer-sheba.

⁸Neaku ore ake pee eidip ninche aashom enkop pooki, nepuonu ninche Yerusalem te nkiting'oto oo lapaitin ooudo o nkolong'i tikitam.

⁹Neisho Yoab esiana e nkikenata oo ltung'ana olaiguanani: ore tiatua Israel netii inkalifuni iip isiet oopi ootushututua ilalema, ore iltung'ana le Yuda naa inkalifuni iip imiet.

¹⁰Neitanyamal Daudi oltau lenye ena kata eidipa aikena iltung'ana. Nejoki Daudi Olaitoriani, “Ataasa nanu eng'oki sapuk tena nataasa. Kake ore taata, Olaitoriani, aatoomono nanu iyie, iwuang'ie entorroni to sinka lino; amu ataasa nanu te modai.”

¹¹Ore ake pee einyototo Daudi tadekenya, nelotu ororei lo Laitoriani enetii oloiboni oji Gad, ilo aduani le Daudi, ejo,

¹²“Shomo tiaaki Daudi, Inji ejo Olaitoriani, intokitin uni nanu aaisho; tegelu nabo te ninche, pee aatum aitaasa iyie.’ ”

¹³Neaku eewuo Gad enetii Daudi neliki ninye, nejoki ninye, “Kailarin okuni lo lameyu oopuonu atua enkop ino. Aashu impirri iyie ilapaitin okuni te dukuya ilmang'ati linono kisujita ninche? Aashu te neaku inkolong'i uni ino lmeitai tiatua enkop ino? Nguanare taata, nidut ewalata nashukoki nanu ilo laairiwua.”

¹⁴Nejoki Daudi Gad, “Atii nanu atua osina sapuk; matabatatakinoto iyiook enkaina o Laitoriani, amu kitok olng'ur lenye, kake mikincho abatatakino enkaina o ltung'ani.”

¹⁵Neaku eirriwaka Olaitoriani Israel olmeitai ebaiki tadekenya o metabaiki enkata apa natudung'uoki; neye teine iltung'ana ebaiki Dan o metabaiki Beer-sheba inkalifuni intomoni naapishana.

¹⁶Ore ake pee eitorioo olmalaika enkaina enye aing'orie Yerusalem pee eidaikie, neirridu Olaitoriani ina torroni, nejoki ilo malaika apa oasita ina mutata tiatua iltung'ana, “Eidipe; tushuko taata enkaina ino.” Netii apa ilo malaika lo Laitoriani embata ewueji neidong'ishoreki e Arauna o Lyebusi.

¹⁷Neirorie Daudi Olaitoriani ina kata pee edol ilo malaika apa oarita iltung'ana, nejo, “Oi, ataasa nanu eng'oki, nataasa entorroni; kake amaa kuna kerra, kaa etaasa ninche? Inchoo enkaina ino aatoomono aar nanu near enkaji e papa.”

¹⁸Nelotu Gad ina olong enetii Daudi, nejoki ninye, “Shomo ilepa, tataaniki olperere lo lasar enetii Olaitoriani teine wueji neidong'ishoreki e Arauna o Lyebusi.”

¹⁹Neaku eshomo Daudi ailep to rorei le Gad, anaa enaitanapishe Olaitoriani.

²⁰Ore ake eing'orisho Arauna airrugo, nedol olaiguanani o sinkan lenyena epuonu aayiaya ninye; nelo Arauna, neserem olaiguanani neitabaiki enkomom enye enkop.

²¹Nejo Arauna, “Kainyoo pee eewuo olkitok lai olaiguanani enetii osinka lenye?” Nejo Daudi, “Pee ainyiang'u ene wueji neidong'ishoreki te iyie pee atum ateshetie olperere lo lasar lo Laitoriani, pee etumi aaiwuang'ie olmeitai too ltung'ana.”

²²Nejoki Arauna Daudi, “Inchoo olkitok lai olaiguanani eya neishoru ina nadol aa sidai te ninye; noolo ilmong'i lo lasar opejori, ore intokitin naaidong'ishoreki o nkeek oo lmong'i naa keaku ilkeek.

²³Ore kuna pooki, olaiguanani, eishoo Arauna olaiguanani.” Nejoki Arauna olaiguanani, “Mikitang'amai iyie Olaitoriani Enkai ino.”

²⁴Kake etiaaka olaiguanani Arauna, “A'a, kake kainyiang'u nanu te iyie te nkinyang'a, maishoru nanu olasar opejori to Laitoriani Enkai ai, eitu nanu ainosie toki.” Neaku einyiang'ua Daudi ine wueji neidong'ishoreki, o lmong'i te shekeli onom e nkosholai.

²⁵Neshetaki Daudi teine Olaitoriani olperere lo lasar, neishoru olasar opejori o lasar le seriani. Neaku etoning'o Olaitoriani eomonokinoto enkop, neiwuang'ieki olmeitai aaitung'uaa Israel.