Read Maasai Bible – Biblia Sinyati 2 Samuel 3 Bible Online

2 Samuel 3 - Maasai Bible – Biblia Sinyati bible

2 Samuel 3

¹Etii apa te nkata naado olarrabal te rishata enkaji e Saul o enkaji e Daudi; neponari Daudi agolu anaake edoyio enkaji e Saul ashalu anaake.

²Neikini Daudi ilayiok te Hebron: ore olkikau lenye naa Amnon, le Ahinoam e Yesreel;

³ore oliare, Kileab, le Abigail ina oliai apa e Nabal le Karmel; ore oliokuni, Absalom olayioni le Maaka ina tito e Talmai olaiguanani le Geshur;

⁴ore olioong'uan, Adonija olayioni le Hagis; ore ole miet, Sefatia olayioni le Abital;

⁵ore olayioni le ile, Isrem, le Egla, enkitok e Daudi. Etoikioki kulo ayiok Daudi te Hebron.

⁶Ore etii olarrabal erishata e nkaji e Saul o enkaji e Daudi, neitagolito Abna kewan tiatua enkaji e Saul.

⁷Neeta apa Saul enkapiani naji enkarna Rispa, entito e Aia; nejoki Ishboshet Abna, “Kainyoo pee ishomo iyie ajing'aki enkapiani e papaai lai?”

⁸Negoro oleng Abna te lelo rorei le Ishboshet, nejo, “Kara nanu endukuya o ldia le Yuda? Ore ena olong eton ake aitodolu enkanyit te nkaji e Saul papaai lino, too lalashera lenyena, o too lchoreta lenyena, neton eitu aaishooyo iyie apik inkaik e Daudi; ore taata niking'uanare nanu te nkaraki enkitok.

⁹Metaasa sii Enkai ena te Abna, neitulusoo sii, te neitu nanu aitabaya te Daudi ina apa nainosakinye Olaitoriani ninye olmumai,

¹⁰aitarasaa enkitoria aitung'uaa enkaji e Saul, neitasheyie olorika le nkitoo le Daudi te shumata Israel o te shumata Yuda, ebaiki Dan o metabaiki Beer-sheba.”

¹¹Neitu eitoki Ishboshet aidimu atawaliki Abna likae omoni, amu eturia ninye.

¹²Neirriwaa Abna ilkiliku enetii Daudi te Hebron, ejo, “Keneng'ae ena kop? Intobira olning'o lino o nanu, naa keaku enkaina ai te nebo o iyie pee ayau Israel pooki enitii iyie.”

¹³Nejo Daudi, “Aisidai; Kaitobir nanu olning'o o iyie; kake nabo toki nanu aayieunye iyie; nchere midol iyie enkomom ai, aashu ake te niyau Mikal, entito e Saul, te nikilotu adol enkomom ai.”

¹⁴Neirriwaki Daudi ilkiliku Ishboshet olayioni le Saul, ejoki, “Inchooki nanu enkitok ai Mikal, naa ninye apa atisira te nkinyang'a oo suaten iip oo Lfilisti.”

¹⁵Neirriwaa Ishboshet ilkiliku, neya ninye aitung'uaa olpayian lenye Paltiel olayioni le Laish.

¹⁶Kake eshomo olpayian lenye te nebo o ninye, eishir asujaa ninye te nkoitoi pooki o metabai Bahurim. Nejoki Abna ninye, “Shomo, torrinyoyu;” nerrinyo ninye.

¹⁷Neiguana Abna te nebo o lpayiani kituaak le Israel, ejo, “Ore te nkata naje natulusoyie ning'oruru intae Daudi aaitaa olaiguanani te shumata intae.

¹⁸Ore naa taata entabai intae; amu eitanapa Olaitoriani Daudi, ejo, ‘Te nkaina o sinka lai Daudi aitajeu nanu iltung'ana laainei Israel aitung'uaa enkaina oo Lfilisti; naitung'uaa enkaina oo lmang'ati lenye pooki.’ ”

¹⁹Neirorie sii Abna Benchamen; neitoki Abna alo aliki Daudi te Hebron nena pooki naatodua Israel; pooki o enkaji e Benchamen pooki aajo aisidain te neas.

²⁰Ore pee elotu Abna te nebo iltung'ana tikitam enetii Daudi te Hebron, neitobiraki Daudi osirua Abna o lelo tung'ana apa ootii te nebo ninye.

²¹Nejoki Abna Daudi, “Kadumunye nanu alo, naa kaiturrurroki Israel pooki olkitok lai olaiguanani, pee etum ninche aaitobira olning'o o iyie, pee itum iyie aitoreisho te shumata nena pooki naayieu oltau lino.” Neaku eishoo Daudi Abna meshomo; nelo ninye te seriani.

²²Ore teina kata nebau lelo sinkan le Daudi te nebo Yoab eing'uaa enjore, neyau iyarunot kumok te nebo ninche. Kake metii apa Abna te nebo Daudi te Hebron, amu eishoo ninye meshomo, nelo ninye te seriani.

²³Ore ake pee ebau Yoab o ina jore pooki apa natii te nebo ninye, nejokini Yoab, “Eewuo Abna olayioni le Ner enetii olaiguanani, neishoo ninye meshomo, neshomo ninye te seriani.”

²⁴Nelo Yoab enetii olaiguanani nejo, “Kaa iyie itaasa? Ng'ura ajo eewuo Abna enitii, kainyoo pee inchoo ninye meshomo, neaku eshomo?

²⁵Iyiolo iyie ajo kiewuo Abna ilo ayioni le Ner alej, neyiolou elototo ino e boo o elotunoto ino e atua, neyiolou nena pooki niasita.”

²⁶Ore eipang'u Yoab aing'uaa ine netii Daudi, neirriwaa ninye ilkiliku metusujai Abna, nerik ninye aashuku teilo kesumet le Sira; kake eitu eyiolou Daudi ina.

²⁷Ore ake pee errinyunye Abna Hebron, neya Yoab ninye enkilepata te mpolos e kishomi pee eiro te nebo ninye too nkurrat, ore teine nerem ninye enkoshoke, neye ninye, te nkaraki ilo sarge le Asahel olalashe lenye.

²⁸Ore te siadi, ina kata pee ening Daudi ina, nejo ninye, “Ore nanu o enkitoria ai mikiata entioto intarasi te dukuya o Laitoriani te nkaraki osarge le Abna ilo ayioni le Ner.

²⁹Metaa endukuya e Yoab edoiki o enchumata enkaji pooki e papaai lenye; naa inchoo metaa melai aekata te nkaji e Yoab oltung'ani oata inkimek aashu enkeeya oo lbolot aashu oloibung'aa entirma aashu olosesekuani to lalem, aashu ololau endaa.”

³⁰Kaae near metua Yoab o Abishai olalashe lenye Abna, te nkaraki etaara apa ninye metua olalashe lenye Asahel tiatua olarrabal te Gibeon.

³¹Neitoki Daudi ajoki Yoab o lelo tung'ana pooki apa ootii te nebo ninye, “Entopolos inkilani inyi, nirrotianana ilkuniyiani, ninchirishiri te dukuya Abna.” Nesujaa olaiguanani Daudi ilo sanduku otii osesen.

³²Nenukaa ninche Abna te Hebron, neyietu olaiguanani aishir te nkurare e Abna; neishir iltung'ana pooki.

³³Nerany olaiguanani osinkolio lo lkiyioi, ejo “Keye Abna anaa enaiko te neye olmodai?

³⁴Meena apa inkaik inono, nemeena apa inkejek inono; Ore anaa enabatata oltung'ani te dukuya lelo torrok itabatate iyie.” Neitoki iltung'ana pooki aaishiraki ninye.

³⁵Nepuonu iltung'ana pooki aailejilej Daudi meinosa endaa eton aa dama; kake einosa Daudi olmumai, ejo, “Meikuna Enkai neijia te nanu, neitulusoo sii, te naishamisham endaa aashu ae toki eton eitu edoyio enkolong?”

³⁶Nedol iltung'ana pooki ina, neitiship ina ninche, amu ore apa pooki toki naas olaiguanani neitiship iltung'ana.

³⁷Neaku etayioloito iltung'ana pooki o Israel pooki ina olong inchere mme eyieunoto apa o laiguanani pee ear Abna olayioni le Ner.

³⁸Nejoki olaiguanani isinkan lenyena, “Aimiyiololo intae aajo olarikoni naa oltung'ani kitok oturori ena olong te Israel?

³⁹Nashal nanu ena olong, hoo naatubukokoki eilata aaput aaitaa olaiguanani; ore kulo tung'ana, ayiok le Seruiya naa kegolong'u oleng te nanu. Inchoo elaaki Olaitoriani olarruoni te risioroto enkarruoisho enye!”