Read Maasai Bible – Biblia Sinyati 2 Samuel 4 Bible Online

2 Samuel 4 - Maasai Bible – Biblia Sinyati bible

2 Samuel 4

¹Ore ake pee ening Ishboshet, olayioni le Saul, inchere etua Abna te Hebron, neiropijaa empijan enye, ore Israel pooki neiputukuny.

²Neeta apa olayioni le Saul iltung'ana oaare laa ilkituaak loo Ltimito le njore; ore enkarna e obo naa Baana, ore enkarna o likae naa Rekab, ilayiok le Rimon oltung'ani le Benchamen oing'uaa Be-erot (amu keyioloi sii apa ninye Be-erot aajo ematua e Benchamen;

³eisika apa Ilbeeroti aapuo Gitam netoni ninche teine o metabaiki ena olong.)

⁴Neeta apa Yonatan olayioni le Saul olayioni maima tarrushi inkejek enyena. Naa oloo larin imiet apa ninye ina kata pee epuonu ilomon ooipirta Saul o Yonatan eing'uaa Yesreel; nedumu ninye enkaibung'ani enye, neisik, naa ore eisik te nkisarrisar enye, nebatata, neakunye ina olmaima. Ore apa enkarna enye naa Mefiboshet.

⁵Ore apa ilayiok le Rimon ilo tung'ani le Be-erot naa Rekab o Baana, nepuo ninche, ore te nkata e nkipirata e nkolong nepuonu ninche enkaji e Ishboshet, etii ninye enkiyeng'iyeng enye a enaipirie nkolong.

⁶Naa ng'ura, ore enkaing'urani e kutuk aji negelita enkano, neimug neirura; neaku etasaakinote Rekab o Baana olalashe lenye atua aji.

⁷Ore pee ejing'u ninche atua aji eirrag Ishboshet te ndapash enye tiatua ilo gilata le ndapash, nerem ninye, near metua nedung'u endukuya enye. Neya ninche endukuya enye nepuo aaim enkoitoi e Araba enkewarie pooki,

⁸neyau ninche endukuya e Ishboshet, enetii Daudi te Hebron. Nejoki ninche olaiguanani, “Nena endukuya e Ishboshet, olayioni le Saul, olmang'atinta lino oing'orua apa enkishui ino; eitalakua Olaitoriani elap o lkitok lai olaiguanani ena olong te Saul te ishoi enye.”

⁹Kake etawalikia Daudi Rekab o Baana olalashe lenye, lelo ayiok le Rimon ilo le Be-erot ajoki, “Ore anaa enaishu Olaitoriani, otokordua enkishui ai aitayu tiatua batisho pooki,

¹⁰ore apa pee aajoki oltung'ani obo nanu, ‘Ng'ura ajo etua Saul.’ Nejo ninye keyaua ilomon sidain, naibung ninye naar ninye metua te Siklag, aa ilo apa olerrinyore laishoo nanu ninye too lomon lenyena.

¹¹Kebaa naa elusoo, te netaara iltung'ana torrok oltung'ani supat tiatua enkaji enye te nchumata e ndapash enye, aimaikilikuanu nanu osarge lenye te nkaina inyi, namut intae aiwuang'ie te nkop?”

¹²Neitanap Daudi ilbarnot lenyena, metaara ninche metuata, nedung'oo inkaik enye o nkejek, neilili ninche te mbata o lchorro te Hebron. Kake ewaita ninche endukuya e Ishboshet, nenukaa te nkurare e Abna te Hebron.