Read Maasai Bible – Biblia Sinyati 1 Ilaiguanak 1 Bible Online

1 Ilaiguanak 1 - Maasai Bible – Biblia Sinyati bible

1 Ilaiguanak 1

¹Etamorua apa olaiguanani Daudi neaku oloo larin kumok. Ore hoo teneimulumuli ninye too lkilani nemeirouaju osesen.

²Ore te nkaraki ina, etiaakita isinkan lenyena, “Olaiguanani, inchoo iyiook maing'uraki iyie enkiti siankiki naairag to lgoo lino pee kigolie ninye nitum airouaja.”

³Neaku eing'orutua ninche esiankiki sidai tiatua enkop pooki e Israel, nepuo aatum Abishag e Shunam, neyaki ninye olaiguanani.

⁴Eisidai apa ina siankiki oleng, neaku ninye enkaing'urani o laiguanani neisiaai ninye; kake eitu eboitare olaiguanani ninye.

⁵Ore apa Adonija olayioni le Hagit neitaa kewan kitok ejo, “Kaaku nanu olaiguanani.” Neitobiraki kewan ingarrin oo mbartan o lakedok loo mbartan o ltung'ana onom oo kuet te dukuya ninye.

⁶Neitu aekata eitagor menye ninye eikilikuan ajoki, “Kainyoo pee itaasa ena o ena?” Oltung'ani sii apa sidai ninye te ning'or, naa ninye etoiwuoki eirukurukore Absalom.

⁷Eiroro ninche o Yoab olayioni le Seruyia tenebo o Abiata olapolosani; nesujaa ninche Adonija neretu ninye.

⁸Kake ore Sadok ilo apolosani o Benaia olayioni le Yehoida, o Natan oloiboni le Nkai, o Shimei, o Rei o lelo tung'ana le Daudi magil nemetii ninche enkalo e Adonija.

⁹Nepolos Adonija ilkerra, o lmong'i o ntokitin naapir te ndapidapoi oo lasuriaa, te mbata e Norogel, neitoomon ninye ilalashera lenyena pooki, lelo ayiok lo laiguanani o lelo tung'ana pooki kituaak le Yuda.

¹⁰Kake eitu ninye eitoomon Natan oloiboni le Nkai aashu Benaia aashu lelo tung'ana magil lo lalashe lenye Solomon.

¹¹Neitoki Natan ajoki Batsheba, ng'otonye Solomon, “Keitu iyie ining ajo etaa Adonija olayioni le Hagit olaiguanani nemeyiolo Daudi olkitok lang?

¹²Wou naa taata maaishoo nanu eutaroto, pee itum aitajeu enkishui ino makewan o enkishui o layioni lino Solomon.

¹³Shomo nabo kata tijing'aki olaiguanani Daudi, nijoki ninye, ‘Keitu apa iyie olkitok lai olaiguanani, inya olmumai te sinka ino, ijo; Solomon olayioni lino oitoreisho te siadi nanu, naa ketonie ninye olorika lai le nkitoo? Kainyoo naa pee etaa Adonija olaiguanani?’

¹⁴Ore eton irorie olaiguanani, najing'u sii nanu te siadi iyie naitisip irorei linono.”

¹⁵Neaku eshomo Batsheba enetii olaiguanani tiatua enkaji enye, netamorua olaiguanani oleng, ore Abishag ina e Shunam neisiaaita olaiguanani.

¹⁶Neirrugo Batsheba aisho olaiguanani enkanyit, nejoki olaiguanani, “Kainyoo iyieu?”

¹⁷Nejoki ninye, “Olkitok lai, inosie apa esinka ino olmumai, to Laitoriani Enkai ino, nijo, ‘Solomon olayioni lino oitoreisho te siadi nanu, naa ketonie ninye olorika lai le nkitoo.’

¹⁸Ore naa taata, Adonija ninye olaiguanani, hoo nimiyiolo ninye iyie olkitok lai olaiguanani.

¹⁹Etopolosa ninye ilmong'i o ntokitin naapir o nkerra kumok, neitoomono ninye ilayiok pooki lo laiguanani, Abiata ilo apolosani o Yoab olarikoni le njore, kake ore Solomon osinka lino eitu eitoomon.

²⁰Ore naa taata olkitok lai olaiguanani, iyie eing'orita inkonyek pooki oo ltung'ana loo Siraeli pee iliki ninche ololo atonie olorika le nkitoo lo lkitok lai olaiguanani te siadi ninye.

²¹Amu keidimayu naa teneye olkitok lai olaiganani naaikenari nanu o Solomon olayioni lai anaa ilaitarruorrok.”

²²Ore eton ninye eirorie olaiguanani, nejing'u Natan oloiboni le Nkai.

²³Nejoki isinkan lenyena, olaiguanani, “Nele Natan oloiboni le Nkai.” Ore pee ejing'u ninye alotu aitashe te dukuya olaiguanani, neirrugo ninye te dukuya olaiguanani, neitabaiki enkomom enye enkop.

²⁴Nejo Natan, “Olkitok lai olaiguanani, amaa, itejo iyie, ‘Adonija oitoreisho te siadi nanu, naa kelo atonie olorika lai le nkitoo?’

²⁵Amu eshomo ninye ena olong apolos ilmong'i o ntokitin naapir o nkerra kumok, neitoomono ilayiok pooki lo laiguanani, Yoab olarikoni le njore, o Abiatar olapolosani naa ng'ura edaa ninche neokisho te dukuya ninye, nejo ‘Tobikoi olaiguanani Adonija!’

²⁶Kake ore nanu o osinka lino o Sadok olapolosani o Benaia, olayioni le Yehoida, o sinka lino Solomon, neitu ninye eitoomon.

²⁷Ko lkitok lang olaiguanani oyaua ena bae? Neitu iyie iliki isinkan linono nchere kalo otonie olorika le nkitoo lo lkitok lai te siadi ninye?”

²⁸Neitoki olaiguanani Daudi awalu nejo, “Empotokoki Batsheba.” Neaku eewuo Batsheba enetii olaiguanani, neitashe te dukuya olaiguanani.

²⁹Nenya olaiguanani olmumai, nejo, “Ore anaa enaishu Olaitoriani, laa ninye laatokordua oltau lai te pooki mang'atinta,

³⁰anaa enainosa olmumai te iyie te nkarna o Laitoriani, Enkai e Israel, ajo Solomon olayioni lino oitoreisho te siadi nanu, naa ketonie ninye olorika lai le nkitoo te rishata ai; neijia ake sii aiko ena olong.”

³¹Neirrugo Batsheba aitabaiki enkomom enye enkop, neisho olaiguanani enkanyit, nejo, “Metobikoi olkitok lai olaiguanani Daudi ntarasi!”

³²Nejo olaiguanani Daudi, “Empotokoki Sadok olapolosani o Natan oloiboni le Nkai o Benaia olayioni le Yehoiada.” Neaku eetuo ninche dukuya olaiguanani.

³³Nejoki olaiguanani ninche, “Ewaita tenebo intae isinkan lo lkitok linyi, ninchosho Solomon olayioni lai metakedo enyumpu ai nintadou ninye te Gibon;

³⁴ninchosho Sadok olapolosani o Natan oloiboni le Nkai metubukoki ninye eilata aaput metaa olaiguanani le Israel; nintokiki aaosh emowuo, nijojo, tobikoi olaiguanani Solomon!

³⁵Nintokiki taa aailepu aasuju ninye, nelotu ninye atonie olorika lai le nkitoo, amu ninye oaku olaiguanani te rishata ai; nategelua nanu ninye meitoria Israel o Yuda.”

³⁶Newaliki Benaia olayioni le Yehoida olaiguanani ajo “Eesai! Meiruko Olaitoriani lai, Enkai anaa enatii Olaitoriani tenebo olkitok lai olaiguanani, metotiwuo neijia.

³⁷Ore anaa enatii Olaitoriani tenebo olkitok lai olaiguanani, metaa sii tenebo Solomon, neitaa kitok olorika lenye le nkitoo aitalang olorika le nkitoo lo lkitok lai Daudi!”

³⁸Neaku eshomo Sadok olapolosani o Natan oloiboni le Nkai o Benaia olayioni le Yehoida o lkeresi o lpelesi aaitaked Solomon enyumpu o laiguanani Daudi neyau ninye Gibon.

³⁹Ore teine neya Sadok olapolosani emouo e ilata to lng'obor nebukoki Solomon aput. Neitoki ninche aaosh esekekua, nejo iltung'ana pooki tobikoi olaiguanani Solomon.

⁴⁰Neilep iltung'ana pooki aasujaa ninye, ekutita ndulen, neng'ida te nchipai sapuk, ometaa keikirikirie indarat enye enkop.

⁴¹Nening Adonija o lomon pooki ootii tenebo ninye ina shipai o sirua. Ore pee ening Yoab oltoilo le ntarumpeta nejo, “Kainyoo ele odoo te nkanasa?”

⁴²Ore eton eirorita, nelotu Yonatan olayioni le Abiata; nejo Adonija, “Tijing'u, amu ira iyie oltung'ani le tipat oyau ilomon.”

⁴³Newaliki Yonatan Adonija ajoki, “A'a amu eitaa olkitok lang olaiguanani Daudi Solomon olaiguanani.

⁴⁴Neirriwayie olaiguanani tenebo ninye Sadok olapolosani, o Natan oloiboni le Nkai, o Benaia olayioni le Yehoida o Lkeresi o llpelesi, neishoo ninche ninye metakedo enyumpu o laiguanani.

⁴⁵Netubukokito Sadok olapolosani o Natan oloiboni le Nkai ninye eilata aaput aaitaa olaiguanani te Gihon, neilepa ninche aapuo teine eng'ida. Neaku enkanasa enkilepilep. Ena kilepilep ina nitoning'oitie.

⁴⁶Etonita taata Solomon to lorika le nkitoo.

⁴⁷Eetuo sii ilaisiaayiak lo laiguanani aaisho enashe olkitok lang Daudi ejo, ‘Eishoo Enkai ino enkarna e Solomon metoning'oyu alang enkarna ino, neitaa olorika lenye le nkitoo kitok alang olino.’ Neirrugo olaiguanani te ndapash.

⁴⁸Neitoki sii olaiguanani ajo, ‘Meisisi Olaitoriani Enkai e Israel, laa ninye oishoo obo le ishoi ai metotonie olorika lai le nkitoo ena olong, adolita too nkonyek aainei.’ ”

⁴⁹Neikirikira ilomon pooki le Adonija to lkirutoto, nedumunye ninche, nelo ake oltung'ani aim enkoitoi enye makewan.

⁵⁰Neureyu Adonija Solomon, nedumunye ninye, neibung imowuarak o lperere lo lasar.

⁵¹Nelikini Solomon aajoki, “Keure Adonija ninye amu eji eibung'ita ninye imowuarak o lperere lo lasar, nejoito, ‘Nchoo olaiguanani Solomon eng'as anya olmumai nchere mesesekuan ninye osinka lenye to lalem.’ ”

⁵²Nejo Solomon, “Teneitodolu ninye neitisip nchere oltung'ani le tipat, meiseyieki ninye olpapita hoo obo le ndukuya enye.”

⁵³Neaku eirriwayie olaiguanani Solomon olkilikuai meyauni Adonija aaitung'uaa olperere lo lasar. Nelotu ninye airrugokino Solomon aisho ninye enkanyit; nejoki Solomon ninye, “Shomo enkaji ino.”