Read Maasai Bible – Biblia Sinyati 1 Ilaiguanak 10 Bible Online

1 Ilaiguanak 10 - Maasai Bible – Biblia Sinyati bible

1 Ilaiguanak 10

¹Naa ore apa pee ening enkaiguanani e Sheba enkishooroto e Solomon tialo enkarna o Laitoriani, nelotu atem ninye too nkikilikuanat naagol.

²Nelotu apa ninye Yerusalem erikito iltung'ana kumok oleng, o ntamesin naanapita isonkoyoni, o saabu sapuk oleng o soito oogol enkinyiang'a. Ore ake pee elotu enetii Solomon, neliki ninye nena pooki naadamu naayieu neikilikuanu.

³Newal Solomon nkikilikuanat enyena pooki, meetae entoki neitu ewaliki olaiguanani ninye.

⁴Ore ake pee edol ina aiguanani e Sheba ina ng'eno nagut e Solomon pooki o ina aji natesheta,

⁵o endaa natii emisa enye o ltonie loo lkituaak lenyena o enkisiaayiare oo sinkan lenyena, nkilani enye o lanapak lenyena loo nkikompeni o lasarri lenyena oopejori ooishooyo ninye tiatua enkaji o Laitoriani, eitu eitoki aidim atejo ae.

⁶Nejoki ninye Solomon, “Ekesipa ilomon apa latoning'o nanu te nkop ai makewan, ooipirta mbaa inono o eng'eno ino.

⁷Kake eitu apa nanu anyorraa lelo omon o maeu adol too nkonyek aainei makewan, naa ng'ura, eitu apa aalikini nanu mbaa pooki; ore eng'eno ino o karsisisho ino kelusoo te nena natoning'o nanu.

⁸Kemunyak iltung'ana inono, nemunyak isinkan linono, ootii dukuya iyie anaake nening eng'eno ino.

⁹Meisisi Olaitoriani Enkai ino; amu kitishipakine ninye iyie, nikipik iyie olorika le nkitoo le Israel! Ore te nkaraki natonyorra Olaitoriani Israel ntarasi, kintaa ninye iyie olaiguanani, pee itum atudung'o enkiguana niaas isupati.”

¹⁰Neitoki ninye aisho Solomon ntalantani iip o tikitam e saabu o sonkoyoni kumok oleng o soito oogol enkinyiang'a. Eitu aekata eitokini aatum enkorropil naba anaa ina naishoo enkaiguanani e Sheba olaiguanani Solomon.

¹¹Ore nena melin e Hiram apa naayautua saabu te Efir neyau aaitung'uaa Ofir ilkeek kumok o soito oogol enkinyiang'a.

¹²Neitaa olaiguanani lelo keek ing'apeta e nkaji o Laitoriani, o ne nkaji o laiguanani neitobirie sii ilwululi loo usin o nkai oo sinkolioitin te nkaraki ilaranyak. Eitu aekata eitokini aayau lelo keek, anaa aadol ometabaiki ena olong.

¹³Neisho Solomon ina aiguanani e Sheba nena pooki naayieu ninye. Entoki ake ninye natoomonuo metii nena naaishooki ninye tialo karsisisho o laiguanani Solomon. Neaku etorrinye apa ninye nelo enkop enye, tenebo isinkan lenyena.

¹⁴Naa ore apa enkiroishi e saabu nayakaki Solomon to lari obo naa intalantani iip ile o ntomoni ile o ile e saabu,

¹⁵metii ina apa naing'uaa ilbiasharani o kodi oo lamirak o naaing'uaa ilaiguanak pooki le Arabia o lbalusuni leina kop.

¹⁶Neitobir olaiguanani Solomon ilong'oi iip are dapashi naaidong'uoki te saabu; ore ake nabo naa shekeli iip ile e saabu enkiroishi.

¹⁷Neitobiru ninye ilong'oi iip uni naaidong'uoki te saabu, nepik ake elong'o nabo nkiloi are e saabu. Nepik olaiguanani nena long'oi atua enkaji naipotoki aajo Entim e Lebanon.

¹⁸Neitayu sii olaiguanani olorika le nkitoo kitok too lala loo lkanchaoni, nemur ninye te saabu nasila.

¹⁹Keeta apa ilo orika le nkitoo nkedeta ile, ore tioriong olorika le nkitoo netii endukuya o lashe, ore ake enkalo nabo olorika netii ineeiteleikini inkaik oo lng'atunyo oaare ooitashe te mbata oo neiteleikini inkaik,

²⁰neitashe sii ilng'atunyo tomon oaare teine, netii ake obo enkalo nabo e nkedet. Eitu aekata etumi embae nanyaanyukie ena te nkitoria ake ninye pooki.

²¹Ore apa ntokitin pooki naaokishoreki o laiguanani naa ine saabu, ore imasaa pooki enkaji natii entim e Lebanon naa ine saabu nasila. Meetae ine nkosholai, meshilari apa nena aaitaa toki too nkolong'i e Solomon.

²²Amu keeta apa olaiguanani imelin e Tarshishi te naiposha tenebo imelin e Hiram. Ore ake te nkata nabo te rishata oo larin okuni nepuonu imelin kumok naaing'uaa Tarshishi enapita saabu, o enkosholai, o lala loo lkanchaoni, o lkuluoin, o motonyi sidain.

²³Kaae, nelusoo olaiguanani Solomon too laiguanak pooki le nkop, te karsisisho o te ng'eno.

²⁴Neing'oru enkop pooki enetii Solomon pee epuonu aaning eng'eno enye, natipika Enkai atua endukuya enye.

²⁵Neyau ake pooki tung'ani enkishooroto enye, ntokitin e nkosholai o ne saabu o lkarash o manemane o enkorropil o mbartan o nyumpui, neyau nkumok te pooki ari.

²⁶Neitoki Solomon aiturrur tenebo ingarrin oo mbartan o lakedok loo mbartan; eeta apa ninye ingarrin oo mbartan enkalifu nabo o iip ong'uan, o lakedok loo mbartan inkalifuni tomon oaare, apa ootipika ninye nena anas oo ngarrin oo mbartan tenebo sii olaiguanani te Yerusalem.

²⁷Neitaa olaiguanani enkosholai entoki nalelek tumoto te Yerusalem, neitotiu anaa isoito, ore iltarakua nebayu anaa ilkeek lo lpurkel.

²⁸Ore apa imbartan e Solomon naa Misiri eing'uaa o Kilikia.

²⁹Ore lelo ooinyiang'u ngarrin oo mbartan te Misiri naa shekeli iip uni e nkosholai, ore embarta naa shekeli iip o onom neaku ore tialo ilbiasharani lo laiguanani nemirakini mbartan ilaiguanak pooki loo Lhiti o laiguanak le Siria.