Read Maasai Bible – Biblia Sinyati 1 Ilaiguanak 12 Bible Online

1 Ilaiguanak 12 - Maasai Bible – Biblia Sinyati bible

1 Ilaiguanak 12

¹Nelo Rehoboam Shekem, eneshomo apa Isiraeli pooki aaitaayie ninye olaiguanani.

²Ore ake pee ening Yeroboam olayioni le Nebat ina, (Amu eton apa etii Misiri, ine apa neisikaka ailany olaiguanani Solomon) neitoki Yeroboam ashukunye te Misiri.

³Neirriwaa iloshon le moikuape olkilikuai aaipotu Rehoboam, ore Yeroboam o eumata oo Siraeli pooki nepuonu aajoki Rehoboam,

⁴“Eiroshiyie apa papaai lino enchata ang oo murto. Ore naa taata nteneneng'a ina kisiaayiare nagol e papaai lino, o ina shata nairoishi oo murto natii shumata iyiook, naa aikisiaai iyiook iyie.”

⁵Nejoki ninye ninche, “Enchom entung'uayioki too nkolong'i uni, nintokiki aashukunye enatii.” Nepuo iltung'ana.

⁶Neitoki olaiguanani Rehoboam aikilikuanishore ilpayiani kituaak apa laa ninche ooitashe te dukuya papaai lenye Solomon, apa eton eishu, nejoki, “Kaa kiutakiki matawaliki ele orere?”

⁷Nejoki ninche, “Tenaa iyaku iyie osinka le kulo tung'ana ena olong, nisiaai ninche, nirorie iyie ninche te supatisho tiniwaliki ninche, naa keaku ninche isinkan linono ntarasi.”

⁸Kake etanya ninye ina utaroto natuutakita lelo payiani kituaak, neing'oru eutaroto oo lbarnot le sirit enye, neitasheyie te dukuya ninye.

⁹Nejoki ninye ninche, “Kaa intae iututu pee kiwaliki ele orere laatiaakita nanu, ‘Nteneneng'a ina shata oo murto apa natipika papaai lino shumata iyiook?’ ”

¹⁰Nejoki lelo barnot le sirit enye, “Nji shomo tiaaki ele orere likijoki ninche, ‘Eiroshiyie apa papaai lino enchata ang oo murto, kake inteneneng'aki iyie iyiook’; nji iyie shomo tiaaki ninche, ‘Ore enkilinta ai naa eisapuk alang empolos e papaai.

¹¹Naa teneiteleikia papaai intae olchata oiroishi le murt, kaponaa nanu ilo shata linyi loo murto. Eitamio intae papaai too lishien[2], kaitame nanu intae too nkulupani.’ ”

¹²Neaku eewuo Yeroboam tenebo iltung'ana pooki enetii Rehoboam te nkolong e uni, anaa enatejo olaiguanani, nejoki olaiguanani ninche, “Enyaaki wootu enatii te nkolong e uni.”

¹³Newaliki olaiguanani iltung'ana te nkitarrikinoto, neany ina utaroto naishoo ilpayiani kituaak.

¹⁴Neirorie olorere anaa enatuutakitia ninye ilbarnot, nejoki, “Eiroshiyie apa papaai enchata inyi oo murto, naa kaponaa nanu ina shata inyi oo murto; eitamio apa intae papaai too lishien kake kaitame nanu intae too nkulupani.”

¹⁵Neaku eitu ening olaiguanani olorere, amu embae ena nayawua Olaitoriani pee etum aitabai ororei lenye, apa oiroro Olaitoriani aimunye Ahija le Shilon aliki Yeroboam olayioni le Nebat.

¹⁶Ore ake pee edol Isiraeli pooki aajo eitu ening olaiguanani ninche, newaliki olorere olaiguanani, aajoki, “Kaa rubata iyiook kiata te Daudi? Mikiata iyiook enjung'ore to layioni le Yese. Enchom ilng'oborri linyi intae Israel! Ng'ura naa taata enkaji ino makewan, Daudi.”

¹⁷Neaku eshomo Isiraeli ilng'oborri lenye. Kake eitoria apa Rehoboam iltung'ana loo Siraeli oomanya atua nkanas e Yuda.

¹⁸Neitoki olaiguanani Rehoboam airriwaa Adoram, laa ninye apa olaitasheikinoni le siaai oo nkaik. Nenang iltung'ana pooki loo Siraeli ninye too soito ometua. Neisarisaraki olaiguanani Rehoboam aked engari enye oo mbartan, neisikaki Yerusalem.

¹⁹Neaku etekepari apa Isiraeli aagilunore enkaji e Daudi ometabaiki ena olong.

²⁰Ore ake pee ening iltung'ana pooki loo Siraeli nchere etorrinyunye Yeroboam, neirriwaa olkilikuai aaipotu ninye meeu eumata, neitaa ninye olaiguanani te shumata Isiraeli pooki. Meetae hoo obo otusujayie enkaji e Daudi, meteleku ake olosho le Yuda.

²¹Ore ake pee elotu Rehoboam Yerusalem, neiturrurru enkaji e Yuda pooki o losho le Benchamen, iltung'ana inkalifuni iip nabo o ntomoni isiet, gelunot ooked ingarrin oo mbartan, pee earare enkaji e Israel, pee errinyoki enkitoria Rehoboam olayioni le Solomon.

²²Kake eewuo ororei lo Laitoriani enetii Shemaia, ilo tung'ani le Nkai, ejo

²³“Tiaaki Rehoboam olayioni le Solomon, olaiguanani le Yuda, o ltung'ana pooki le nkaji e Yuda o e ne Benchamen, o kulikae tung'ana pooki,

²⁴nji ejo Olaitoriani, milo iyie aarare ilalashera linono, lelo tung'ana le Israel. Torrinyoyu pooki ng'ae shomo enkang enye, amu ore ena bae naa nanu eing'uaa.” Neaku etoning'o ninche ororei lo Laitoriani, nerrinyo aapuo nkang'itie, te risioroto ororei lo Laitoriani.

²⁵Neitoki Yeroboam ashet Shekem teinakop oo ldoinyo e Efraim, nelo abik teine, neitoki alo teine nelo ashet Penuel.

²⁶Nejo Yeroboam to ltau lenye, “Kerrinyunye taata enkitoria alotu enkaji e Daudi,

²⁷teneilep kulo tung'ana aapuo aaitayu ilasarri te nkaji o Laitoriani te Yerusalem. Neitoki iltauja le kulo tung'ana aaibelekenyakino olkitok lenye, Rehoboam olaiguanani le Yuda, naar ninche nanu matua nerrinyokino Rehoboam olaiguanani le Yuda.”

²⁸Neaku eiguane olaiguanani, neitobir ilasho oaare le saabu. Nejoki olorere, “Ishomo intae Yerusalem enkata naado. Noona inkaitin inyi intae Israel, naa ninche apa naaitayutuo intae te nkop e Misiri.”

²⁹Neitasheyie ninye nabo te Betel nepik enkae Dan.

³⁰Neaku ina bae eng'oki, amu eshomo iltung'ana aayiaya nabo te Betel, nepuo aayiaya enkae te Dan.

³¹Eitobira sii apa inkajijik too wuejitin e shumata, negelu ilapolosak tiatua olorere pooki, leme iloo Lawi.

³²Negelu Yeroboam osirua te nkolong e tomon o imiet o lapa le isiet, anaa apa osirua oatae te Yuda, neitayu ninye ilasarri te nchumata olperere lo lasar, neaku etaasa ninye ina te Betel, apolosaki lelo asho ooitobira. Nepik ilapolosak Betel wuejitin e shumata neeitobira ninye.

³³Neilep ninye alo ilo perere lo lasar oitobira te Betel te nkolong e tomon o imiet, to lapa le isiet, teilo apa otegelua ninye to ltau lenye makewan; neitisiny ilo sirua te nkaraki iltung'ana loo Siraeli, neilep alo olperere lo lasar apej enkorropil.