Read Maasai Bible – Biblia Sinyati 1 Ilaiguanak 13 Bible Online

1 Ilaiguanak 13 - Maasai Bible – Biblia Sinyati bible

1 Ilaiguanak 13

¹Ore te nkintanapata o Laitoriani, nelotu oltung'ani le Nkai oing'uaa Yuda, Betel. Neitashe apa Yeroboam te mbata o lperere lo lasar apej enkorropil.

²Neishiraki ilo tung'ani le Nkai olperere lo lasar to rorei lo Laitoriani ejo, “Lo perere lo lasar, lo perere, nji ejo Olaitriani: ‘Keikini enkaji e Daudi enkayioni, naa keji enkarna enye Yosia, naa kepolos ninye te shumata iyie lelo apolosak loo wuejitin neeika, lelo oopej enkorropil te shumata iyie, naa kepuoi aapejoo iloik loo ltung'ana te shumata iyie.’ ”

³Neishoru ninye olmonekie teina olong ake, ejo, “Olmonekie ele oiroro Olaitoriani; ejo, ‘Ng'ura kegili ele perere lo lasar aasulaki enkop, ore nena kuruon naatii enchumata enye nebukokini enkop.’”

⁴Ore ake pee ening olaiguanani Yeroboam ina kiroroto o ltung'ani le Nkai, naishiraka ilo perere lo lasar te Betel, neitorioo enkaina enye teilo perere lo lasar ajo, “Embung'a ninye.” Ore ina aina enye duoo naitorioyie aimbung'ie ninye, netoyu, ometaa meekure errinyo.

⁵Nedanya sii olperere lo lasar neibukori nkuruon teilo perere lo lasar, te risioroto eilo monekie oishorua ilo tung'ani le Nkai to rorei lo Laitoriani.

⁶Nejoki olaiguanani ilo tung'ani le Nkai, “Toomonokoki taata to Laitoriani Enkai ino, pee etum enkaina ai anyaaki atisidana.” Neomon ilo tung'ani le Nkai Olaitoriani, neitoki enkaina olaiguanani aishiu, netiu anaa duoo.

⁷Neitoki olaiguanani ajoki ilo tung'ani le Nkai, “Wou maape ang pee ilo anya endaa, naaisho sii enkishooroto.”

⁸Nejoki ilo tung'ani le Nkai olaiguanani, “Tenikincho ninye olpisiai le nkaji ino, maairiamariyie nanu iyie. Nemanya nanu endaa aashu aok enkare tene wueji;

⁹amu ina apa aaitanapa ororei lo Laitoriani, ejo, ‘Minya endaa nimiok enkare, nimilo aim enkoitoi duoo niimua.’ ”

¹⁰Neaku eshomo ninye aim ae oitoi, neitu eibelekenya aim enkoitoi duoo naimua elotu Betel.

¹¹Netii apa oloiboni moruo Betel. Nepuonu ilayiok lenyena aaliki nena pooki naataasa oltung'ani le Nkai ina olong te Betel; o lelo rorei sii ootiaaka olaiguanani Yeroboam, neliki ninche papaai lenye.

¹²Nejoki papaai lenye ninche, “Kaa oitoi eima?” Neitodol ilayiok lenyena ninye ina oitoi naimua oltung'ani le Nkai oing'uaa Yuda.

¹³Nejoki ninye ilayiok lenyena, “Erotokoki osikiria,” Neirotoki ninche ninye osikiria, neked ninye.

¹⁴Nelo ninye asujaa ilo tung'ani le Nkai neinepu etonita te ntonata olchani, oji olmaloni; nejoki ninye, “Eiyie doi oltung'ani le Nkai oing'uaa Yuda?” Nejoki ninye, “Ee nanu.”

¹⁵Neitoki ajoki ninye, “Wou maape ang pee ilo anya endaa.”

¹⁶Nejo ninye, “Marrinyo nanu alo tenebo iyie, anaa alo ajing atua aji tenebo iyie; nemanya nanu endaa anaa aok enkare tenebo iyie tene wueji;

¹⁷amu aatiaka nanu ororei lo Laitoriani, ‘Minya endaa nimiok enkare teine, nimirrinyo aim enkoitoi duoo niimua.’ ”

¹⁸Nejoki ninye ilo oiboni le Nkai moruo, “Kara sii nanu oloiboni le Nkai anaa iyie, naairorie nanu olmalaika to rorei lo Laitoriani, ejo, ‘Torrinyu ninye meeu tenebo iyie enkaji ino pee etum ainosa endaa neok enkare.’ ”

¹⁹Kake eteleja apa ninye ninye. Neaku eshomo tenebo ninye nenya endaa te nkaji enye neok enkare.

²⁰Ore etonita ninche te misa, nelotu ororei lo Laitoriani enetii ilo oiboni apa otorrinyuo ninye ariku;

²¹neishiraki ninye ilo tung'ani le Nkai apa oing'uaa Yuda, ejo, “Nji ejo Olaitoriani, ‘Ore te nkaraki neitu imbung ororei lo Laitoriani, neitu imbung inkitanapat Olaitoriani Enkai, kake itorrinyunye,

²²ninya endaa niok enkare tene wueji, nikitiaaka apa ninye iyie; Minya endaa nimiok enkare. Mepuoi aanukaa osesen lino te nkurare oo loo papaai lino.’ ”

²³Ore ake pee eidip ainosa endaa neokisho neirotoki osikiria ilo oiboni duoo otorrinyuo ariku.

²⁴Ore eloito nenang'are olng'atuny ninye te nkoitoi near ninye metua. Nenang'akini osesen lenye te nkoitoi, neitashe osikiria te mbata enye; neitashe sii olng'atuny te mbata o sesen.

²⁵Ore egiroo iltung'ana nedol osesen otanang'akaki enkoitoi, neitashe olng'atuny te mbata. Nepuonu aaimaki teina anasa apa namanya ilo oiboni moruo.

²⁶Ore ake pee ening ilo oiboni apa otorrinyuo ninye te nkoitoi ina, nejo ninye, “Oltung'ani le Nkai ilo; leitu ening ororei lo Laitoriani; neaku eishooyie Olaitoriani meinosa olng'atuny, nenya olng'atuny ninye aar metua, te risioroto e ilo rorei oirorie ninye.”

²⁷Nejoki ninye ilayiok lenyena, “Erotokoki nanu esikiria” neaku eirotokoki ninye esikiria,

²⁸Nelo ninye neinepu ninye eirrag te nkoitoi, neitashe osikiria o lng'atuny te mbata ilo sesen Neitu enya olng'atuny ilo sesen neitu enya ilo sikiria.

²⁹Neya ilo oiboni moruo osesen le ilo tung'ani le Nkai neiteleiki osikiria, nerrinyu ayau enkanasa pee eishiraki, nenukaa.

³⁰Neirragie ilo sesen anukaa te nkurare enye makewan; neishiraki ninche ninye ejo,

³¹“Ee olalashe lai!” Ore ake pee eidip atunukai ninye, nejoki ilayiok lenyena, “Tenaye kenya, entunukayioki te nkurare natunukarieki oltung'ani le Nkai; erragie iloik laainei te mbata oo loik lenyena.

³²Amu ore ina kiroroto apa naishiraka to rorei lo Laitoriani olperere lo lasar te Betel, o nkajijik pooki oo wuejitin neeika naatii nkanas e Samaria, kesipa, keyookini aaitabaya.”

³³Ore te siadi ena eitu eibelekenya inkoitoi e Yeroboam torrok, kake enyaaka aitayu ilapolosak too wuejitin neeika tiatua olorere pooki; neaku ore pooki ng'ae oyieu, neitisiny metaa olapolosani too wuejitin neeika.

³⁴Neaku ena bae eng'oki te nkaji e Yeroboam o metaa eiwuang'ieki neidaikieki aaishie te nkop.