Read Maasai Bible – Biblia Sinyati 1 Ilaiguanak 15 Bible Online

1 Ilaiguanak 15 - Maasai Bible – Biblia Sinyati bible

1 Ilaiguanak 15

¹Ore apa to lari le tomon o isiet le nkitoria o layioni le Nebat, neiteru Abijan aitoreisho te Yuda.

²Neitoreisho ninye ilarin okuni te Yerusalem. Ore apa enkarna e ng'otonye naa keji Maaka entito e Abishalom.

³Neas ninye ing'ok pooki apa naataasa menye te dukuya ninye, nemeitoriori oltau lenye tialo Olaitoriani Enkai enye, anaa apa oltau le Daudi nkuyiaa lenye.

⁴Ore ake eyia te nkaraki Daudi, neisho ninye Olaitoriani Enkai enye oltaa te Yerusalem, aisho olayioni lenye metijing'a erishata enye, neitasheyie Yerusalem;

⁵te nkaraki apa nataasa Daudi mbaa supati too nkonyek o Laitoriani, neitu ninye eibelekenya te pooki toki naitanapa ninye Olaitoriani, too nkolong'i pooki e nkishui enye, meteleku ake te mbae naipirta Uria ilo le Hiti.

⁶Neeta apa Rehoboam o Yeroboam olarrabal too nkolong'i e nkishui enye pooki.

⁷Ore nkulie kiaasin e Abijam o nena pooki naataasa, neigeroki tiatua embuku oo ntepen oo laiguanak le Yuda. Neeta apa Abijan olarrabal o Yeroboam.

⁸Neirura Abijam neye anaa loo menye, nenukari ninye te nkanasa e Daudi, neitoreisho Asa olayioni lenye te rishata enye.

⁹Ore to lari le tikitam le nkitoria e Yeroboam olaiguanani loo Siraeli neiteru Asa aitoreisho te Yuda.

¹⁰Neitoreisho ilarin artam oobo te Yerusalem. Ore apa enkarna e ng'otonye naa keji Maaka entito e Abishalom.

¹¹Neas Asa mbaa sidain too nkonyek o Laitoriani anaa apa enataasa Daudi nkuyiaa lenye.

¹²Neiwuang'ie lelo lewa le nkisiaayiare e seremare enkiborra oo nkonyek apa naitobira loo menye.

¹³Eiwuang'ieki sii Maaka ng'otonye meitoki aaku enkaiguanani te nkaraki naata apa enkitanyaanyukoto olminong apa naitobirakaki Ashera, nesulaki Asa ina kitanyaanyukoto enkop nepejoo to erata le Kedron.

¹⁴Kake eitu apa eiwuang'ieki iwuejitin neeika. Ore ake eyia, keitoriori apa oltau le Asa tialo Olaitoriani katukul, inkolong'i pooki e nkishui enye.

¹⁵Neyau ninye atua enkaji o Laitoriani ntokitin apa naaitisinya menye o naaitisinya ninye makewan, enkosholai, o saabu o masaa.

¹⁶Netii apa olarrabal erishata e Asa o Baasha olaiguanani loo Siraeli too nkolong'i enye pooki.

¹⁷Eshomo Baasha olaiguanani loo Siraeli agilunore Yuda, neshet Rama, pee etum aibooi pooki ng'ae olotu enetii Asa olaiguanani le Yuda.

¹⁸Neyau Asa enkosholai pooki o ina saabu apa natelekua to lchumati le nkaji o Llaitoriani, o to lchumati le nkaji o Laiguanani, nepik inkaik oo sinkan lenyena. Neirriwaa olaiguanani Asa ninche meshomo enetii Benhadad olayioni le Tabrimon olayioni le Hesion, olaiguanani le Siria, laa Dameski apa namanya, nejoki,

¹⁹“Maibung'ata iyiook pokira anaa apa enatiu papaai o papaai lino: ng'ura aairriwaka nanu iyie enkishooroto e nkosholai o saabu. Shomo ntobira osotua lino o Baasha olaiguanani loo Siraeli, pee aatum atung'uai nanu.”

²⁰Nening Benhadad enatejo olaiguanani Asa, neirriwaa ilarikok lenyena le njore meshomo aagilunore nkanas oo Siraeli, nemir Iyon o Dan o Abel-bet-maaka o Kinerut pooki tenebo enkop pooki e Naftali.

²¹Ore ake pee ening olaiguanani Baasha ina, neitu eitoki ashet Rama, nelo ninye abik te Tirsa.

²²Neitoki olaiguanani Asa alimu enkitanapata, tiatua Yuda pooki, pee meing'uari ninye oltung'ani obo, pee epuo aaya lelo soito apa le Rama o mbaoi enyena, apa naa ninche eshetishore Baasha, nelo olaiguanani Asa ashetie Geba e Benchamen o Mispa.

²³Ore apa nkulie kiaasin e Asa, enkidimata enye pooki o nena pooki naataasa ninye o nkanas naatesheta ninye, neigero pooki tiatua embuku oo ntepen oo laiguanak loo Siraeli. Kake ore etamorua ninye netum emuoyian too nkejek enyena.

²⁴Neirura Asa neye anaa loo menye, nenukari ninye te nkurare oo loo menye te nkanasa e Daudi nkuyiaa lenye. Neitoreisho Yehoshafat olayioni lenye te rishata enye.

²⁵Neiteru Nadab olayioni le Yeroboam aitoreisho tiatua Isiraeli, to lari liaare le Asa ilo aiguanani le Yuda. Neitoreishe ninye te Israel ilarin oaare.

²⁶Neas ninye ntorrok te dukuya nkonyek Olaitoriani, nelo aibung olkuaak, le menye. Neas ing'ok, nerikoki Isiraeli metaasa ing'ok.

²⁷Ore Baasha olayioni le Ahija lo losho le Isaakar, nerresh ninye. Near Baasha ninye metua te Gibeton nara enoo Filistia, amu eirraga apa Nadab o Siraeli pooki aang'adu Gibeton.

²⁸Neaku etaara Baasha ninye metua to lari liokuni le nkitoria e Asa olaiguanani le Yuda, neitoreisho ninye te rishata e Nadab

²⁹re ake pee eaku olaiguanani nesesekuan enkaji e Yeroboam pooki, eitu ninye eing'uaa olaishirani te nkaji e Yeroboam. Eidakie pooki te risioroto o rorei lo Laitoriani apa oiroro aimunye osinka lenye oji Ahija le Shilo.

³⁰Naa te nkaraki nena ng'ok e Yeroboam apa naataasa, nerikoki Israel metaasa eng'oki, o te nkaraki ina naitagoro ninye Olaitoriani Enkai e Israel.

³¹Ore apa nkulie kiaasin e Nadab, o nena pooki naataasa, neigeroki tiatua embuku oo ntepen oo laiguanak loo Siraeli.

³²Neeta apa Asa olarrabal, o Baasha ilo aiguanani loo Siraeli too nkolong'i enye pooki.

³³Ore to lari liokuni le nkitoria e Asa olaiguanani le Yuda, neiteru Baasha olayioni le Ahija aitore Israel pooki te Tirsa, neitoreisho ilarin tikitam oong'uan.

³⁴Neas ninye intorrok too nkonyek o Laitoriani, neibung orrekie le Yeroboam teina ng'oki natorikoko Israeli metaasa.