Read Maasai Bible – Biblia Sinyati 1 Ilaiguanak 18 Bible Online

1 Ilaiguanak 18 - Maasai Bible – Biblia Sinyati bible

1 Ilaiguanak 18

¹Ore te siadi pee eishunye inkolong'i kumok, nelotu ororei lo Laitoriani enetii Eliya, to lari liokuni, ejo, “Shomo ntoduaai kewan te Ahab, amu kairriwaki nanu enchan enkop.”

²Kaae, nelo Eliya aitoduaaya kewan te Ahab. Ore apa ina kata netirrisha olameyu te Samaria.

³Neipotu Ahab Obadia laa ninye apa oitasheiki enkaji enye. Naa keyanyit apa Obadia Olaitoriani oleng.

⁴Naa ore ake pee earaa Yesebel iloibonok lo Laitoriani, neya Obadia iloibonok le Nkai iip nelo aisudoo moo onom te nkapune, neitoti ninche too mukateni o te nkare.

⁵Neipotu Ahab Obadia nejoki, “Shomo atua enkop pooki o nchorroi pooki oo nkariak o erat pooki, amu ebaiki nikitum nkujit nikincho mbartan o nyumpui, pee mitianya ake embata oo ng'uesi.”

⁶Neaku etooro apa ninche enkop pokira oaare, pee etum aashom. Nelo Ahab enkae alo nelo Obadia enkae alo openy.

⁷Ore eloito Obadia te nkoitoi, nenang'are Eliya ninye; neyiolou Obadia ninye, nebatata te nkomom abaiki enkop, nejo, “Keyie ele olkitok lai Eliya?”

⁸Newaliki Eliya ajoki, “Ee nanu. Shomo tiaaki olkitok lino, ‘Ng'ura ajo etii Eliya ene!’ ”

⁹Nejoki Obadia ninye, Kaa ng'oki ataasa nanu, eji metaa inchooyo osinka lino apik enkaina e Ahab, maataara nanu matua?

¹⁰Ore anaa enaishu Olaitoriani Enkai ino, meetae olorere aashu enkitoria neitu eirriwaa olkitok lai ilkiliku king'oru iyie, naa tenejo ninche, ‘Metii ninye ene,’ neinosie olmumai ina kitoria aashu ilo orere, nchere eitu ninche kitum iyie.

¹¹Eji ore taata nijo iyie, ‘Shomo tiaaki olkitok lino; Etii Eliya ene.’

¹²Naa tenaaorore nanu iyie nikiya iyie Enkiyang'et o Laitoriani ewueji nemayiolo, niaaku tenalo nanu ajoki Ahab ina, nikilau ninye, naar nanu matua, hoo nayanyita nanu osinka lino Olaitoriani ebaiki telelero ai.

¹³Keitu ining apa olkitok lai enataasa ina kata apa ear Yesebel iloibonok lo Laitoriani, naisudoo nanu iloibonok iip lo Laitoriani, moonom tiatua enkapune, naitoti nanu ninche too mukateni o te nkare?

¹⁴Eji nijo taata iyie, “Shomo tiaaki olkitok lino, etii Eliya ene.” Pee aar nanu matua.

¹⁵Nejo Eliya, “Ore anaa enaishu Olaitoriani loo lororani, laa te dukuya ninye nanu aitashe, kalo ake aitoduaaya kewan ai to laiguanani taata.”

¹⁶Kaae, nelo Obadia atumore Ahab, neliki ninye. Nelo Ahab atumore Eliya.

¹⁷Ore ake pee edol Ahab Eliya, nejoki ninye, “Kaa iyie doi ele, olaitanyamalani loo Siraeli?” Newaliki ninye ajoki,

¹⁸“Eitu nanu aitanyamal Israel kake iyie oitanyamala, o enkaji e papaai lino, te nkaraki nitalama nkitanapat o Laitoriani, nisujaa Baal.

¹⁹Ore naa taata shomo nturrurrokoki iltung'ana loo Siraeli to ldoinyo le Karmel. Toriku lelo oibonok pokira iip ong'uan o onom le Baal o lelo oibonok iip ong'uan le Ashera, oodaa te Misa e Yesebel.”

²⁰Neipotu Ahab iltung'ana pooki loo Siraeli, neiturrur iloibonok tenebo to ldoinyo le Karmel.

²¹Nelotu Eliya anyikaki iltung'ana pooki nejoki, “Ibukaashasha kenya o anu too ndamunot are? Tenaa Olaitoriani ninye Enkai, entusuj ninye; kake tenaa Baal nisujaa ninye.” Neitu ewaliki iltung'ana ororei hoo obo.

²²Neitoki Eliya ajoki iltung'ana, “Nanu ake openy taata otelekua too loibonok lo Laitoriani, kake ore iloibonok le Baal naa iip ong'uan o onom.

²³Nchoo meishori iyiook iloing'ok oaare naa nchoo ninche metegelaki ate obo, nedung'udung neiteleiki ilkeek, kake emipik enkima ine. Naa kaitobir sii nanu olikae oing'oni naiteleiki ilkeek, nemapik enkima ine.

²⁴Nimpotipoto enkarna e nkai inyi, naipot sii nanu enkarna Olaitoriani. Ore Enkai nawalu te nkima naa ninye Enkai.” Newalu iltung'ana pooki aajo, “Enkiroroto sidai.”

²⁵Neitoki Eliya ajoki lelo oibonok le Baal “Entegelaki ate oloing'oni obo ning'asing'asa aaitobir, amu intae ilkumok. Nimpotipoto enkarna e nkai inyi, kake emipik enkima.”

²⁶Neya ninche oloing'oni obo oishooki ninche, neitobir ninye, neipot enkarna e Baal ebaiki tadekenya ometaa dama, ejo, “Oo Baal tawaliki iyiook!” Kake eitu etumi oltoilo anaa oltung'ani otawala. Neipidipid ninche aaman ilo perere lo lasar apa oitobira.

²⁷Ore eipira enkolong neikordod Eliya ninche, ejo “Entabuaku oleng amu enkai ninye, ebaiki negira adamisho oleng, aashu enyamalita, aashu eshomo nkang'itie. Aashu ebaiki neirura naa keishiaakino neinyeyieki.”

²⁸Neishir ninche aabuaku, nedung'udung ate too lalema anaa enatiu olkerreti lenye, ometaba anaa nerukunye osarge too seseni lenye.

²⁹Ore pee elusoo enkipirrata e nkolong, nelimana ninche aaibonisho ometabau erishata naishoori olasar. Kake meetae oltoilo otoning'oki, metii ewalata, nemetii oltung'ani otishilayie.

³⁰Neitoki Eliya ajoki iltung'ana pooki, “Wootu entinyikakaki,” nepuonu iltung'ana pooki aanyikaki ninye. Neitobir ninye ilo perere lo lasar lo Laitoriani apa otigilaki.

³¹Neya Eliya isoito tomon oaare te risioroto e siana oo layiok le Yakobo, laa ninye apa eewuo ororei lo Laitoriani enetii, “Ejo keaku eikiji enkarna ino Isiraeli.”

³²Ore te lelo soito neshetu olperere lo lasar te nkarna Olaitoriani. Netur ninye engumoto aitaman emanaroto olperer lo lasar, oba te ndapasho anaa ilanterera oaare.

³³Nepik ilkeek aitobiraki. Nedung'udung ilo oing'oni aitaa ndung'udung'ot neiteleiki shumata lelo keek. Neitoki ninye ajo, “Emputa iltooi oong'uan enkare, nibukokiki olasar opejori, te nchumata oo lkeek.”

³⁴Neitoki ajo, “Engilie entubukoki” neigilie ninche eniare. Neitoki ajo, “Engilie ene uni;” neigilie ninche ene uni.

³⁵Neruko enkare teilo perere lo lasar, neiput ine negum nemanaa to lperere lo lasar.

³⁶Ore te nkata naishoori olasar le nkitukuo, nelotu oloiboni Eliya anyiku nejo, “Oi Olaitoriani, naa Ai e Abraham, o Isaak, o Israel, nchoo eyiolouni ena olong nchere iyie Enkai tiatua Isiraeli. Nara nanu osinka lino, naa te nkarna ino nanu ataasa kuna kitoduaat pooki.

³⁷Tawalikiaki nanu Olaitoriani, tawalikiaki pee eyiolou kulo tung'ana nchere, iyie Olaitoriani ora Enkai, naa iyie oibelekenya iltauja lenye.”

³⁸Nedou enkima o Laitoriani, nenya ilo asar o lkeek o soito o enterit neishu ina are apa natii ewueji negum nemanaa to lperere lo lasar.

³⁹Ore ake pee edol iltung'ana pooki ina, nebatata aaitabaiki inkomomi enye enkop; nejo, “Olaitoriani ninye Enkai, Olaitoriani ninye Enkai.”

⁴⁰Neitoki Eliya ajoki ninche, “Embung'a lelo oibonok le Baal; emincho ninye elo obo.” Neibung'i ninche, neyau Eliya ninche aitadou ayau olchorro le Kishon, near ninche metuata teine.

⁴¹Neitoki Eliya ajoki Ahab, “Ilepa shomo tadaayu niokisho; amu ening'o oltoilo le nchan eshaita.” Kaae nelo Ahab adaa neokisho.

⁴²Neilep Eliya alo enchumata oldoinyo le Karmel, neirrugo abaiki enkop, nepik enkomom enye erishata oo nkung enyena.

⁴³Nejoki ninye osinka lenye, “Ilepa taata shomo, ning'or enkalo e naiposha.” Neilep ninye alo neing'or, nejo, “Metii toki.”

⁴⁴Neitoki ajoki, “Nyaaki shomo katitin naapishana.” Ore te nkata e naapishana nejo ninye, “Atoduaa etii enkiti atampoi naikununo anaa enkaina oltung'ani nailepu tiatua enaiposha.” Neitoki Eliya ajoki, “Ilepu shomo tiaaki Ahab, ‘Ntobira engarri ino oo mbartan nidoyio alo, pee mikimbok ake enchan.’ ”

⁴⁵Ore te nkiti rishata neroku shumata too nkatampo o to siwuo, nelotu enchan kitok, neked Ahab engarri enye nelo Yesreel.

⁴⁶Netii apa enkaina Olaitoriani shumata Eliya, nerreten ninye empolos enye nekuet aituruk te Ahab nelo kishomi e Yesreel.