Read Maasai Bible – Biblia Sinyati 1 Ilaiguanak 19 Bible Online

1 Ilaiguanak 19 - Maasai Bible – Biblia Sinyati bible

1 Ilaiguanak 19

¹Neliki Ahab Yesebel nena pooki naataasa Eliya. Oina sii natara metuata iloibonok pooki nkitanyaanyukoto e nkai naji Baal to lalem.

²Neitoki Yesebel airriwaki Eliya olkilikuai, ejo, “Maaitaasa nanu inkaitin ina torrono teneitu nanu aitotiu enkishui ino anaa enkishui e lelo oibonok tena saa taisere.”

³Neureishoyu Eliya neinyototo aisik, nelo Beer-sheba e Yuda neing'uaa osinka lenye teine.

⁴Kake ore ninye makewan eshomo elototo enkolong nabo ti ong'ota. Nelo aton te ntonata olchani oata oloip. Neomonu pee eye, nejo, “Eiririkine Olaitoriani pee iwuang'ie enkishui ai, amu mara sii nanu supat alang iloo papa.”

⁵Neirrag ninye airura to loip lo lchani, nemaniki pee eiseyie olmalaika ninye nejoki, “Tudumunye inosa endaa.”

⁶Neing'orisho ninye, nedol etii embata e ndukuya enye emukate natapejoki too soito ooirowua, o esiang'au e nkare. Nedaa ninye neokisho, neitoki airrag.

⁷Neitoki olmalaika lo Laitoriani enkata e are, aiseyie ninye, nejoki, “Tudumunye inosa endaa, amu kegolu elototo te iyie.”

⁸Nedumunye Eliya nedaa neokisho, nelo te ngolon eina daa nainosa too nkolong'i artam, o nkewarietin artam, omeshomo Horeb ilo doinyo le Nkai.

⁹Nebau ninye enkapune neirrag ine, nelotu ororei lo Laitoriani enetii ninye, nejoki, “Kaa iasita tene, Eliya?”

¹⁰Nejo ninye, “Aata apa nanu olom to Laitoriani, Enkai oo lororani, amu etanyaita iltung'ana loo Siraeli olning'o lino, nesulaa ilpereren loo lasarri, near iloibonok linono metuata to lalem; metaa nanu ake, nanu ake openy otelekua; neing'oru ninche enkishui ai, pee eiwuang'ie.”

¹¹Neitoki ajoki, “Shomo ntasho te nchumata o ldoinyo te dukuya Olaitoriani.” Naa ng'ura eloito Olaitoriani agiroo, nekut olkutati kitok ogol lelo doinyo, nebel ndapidapo aitaa mbelibelat te dukuya Olaitoriani, kake metii Olaitoriani atua olkutati. Ore te siadi olkutati nelotu enkikirikirata enkop, kake metii Olaitoriani atua enkikirikirata e Nkop.

¹²Ore te siadi enkikirikirata enkop nelotu enkima, kake metii Olaitoriani atua enkima. Ore te siadi enkima nelotu oloti toilo obor.

¹³Ore ake pee ening Eliya ina, neimulumul enkomom enye to lkila nelo aitashe te nkutuk e nkapune. Nelotu oltoilo enetii ninye, nejoki, “Kaa iyie iasita tene, Eliya?”

¹⁴Nejo ninye, “Kaata apa nanu olom te nkaraki Olaitoriani Enkai oo lororani amu etanyaita iltung'ana loo Siraeli olning'o lino, neuroo ilpereren linono loo lasarri, near iloibonok linono metuata to lalem, netaa nanu ake openy otelekua, neing'oru ninche enkishui ai peyie eiwuang'ie.”

¹⁵Nejoki Olaitoriani ninye, “Torrinyoyu shomo te nkoitoi ino enkalo e ong'ata e Dameski; ore ake pee ibaya, nilo abukoki eilata Hasael, aput metaa olaiguanani le Siria.

¹⁶Niput Yehu olayioni le Nimshi metaa olaiguanani loo Siraeli. Ore Elisha olayioni le Shefat le Abel-mehola, nibukoki eilata aput metaa oloiboni le Nkai te rishata ino.

¹⁷Ore ilo oilanya olalem le Hasael nelo Yehu aar metua. Ore ilo oilany olalem le Yehu nelo Elisha aar metua.

¹⁸Ore ake eyia kaleku nanu iltung'ana inkalifuni naapishana tiatua Isiraeli, lelo pooki leitu egilaki kung neitu eirrugokino Baal, o pooki leitu eng'utut Baal.”

¹⁹Kaae, nelo Eliya teine, nelo atum Elisha olayioni le Shefat eturishore ilmong'i tomon oaare. Netii apa ninye tenebo ilo kiteng le tomon oaare. Negiroo Eliya ninye nenang'aki olkila lenye.

²⁰Neing'ua Elisha lelo mong'i nekuet asujaa Eliya, nejoki ninye, “Nchooki nanu mashomo ang'utut papaai o yieyioo aisho ole sere, pee aatum atusuja iyie.” Nejoki Eliya ninye, “Torrinyoyu shomo; amu kaa nanu aaitaasa iyie?”

²¹Nerrinyo Elisha aing'uaa Eliya, neitayu nena keek oo murto oo lmong'i neyieng lelo mong'i. Neyier inkiri enye tenebo nkeek oo murto oo lmong'i. Neisho iltung'ana meinosa, nenya ninche. Neitoki ninye adumunye alo asujaa Eliya nelo aisiaai ninye.