Read Maasai Bible – Biblia Sinyati 1 Ilaiguanak 4 Bible Online

1 Ilaiguanak 4 - Maasai Bible – Biblia Sinyati bible

1 Ilaiguanak 4

¹Olaiguanani Solomon apa oiguanaki enkop e Israel pooki,

²naa kulo apa iltung'ana lenyena kituaak: Asaria olayioni le Sadok apa olapolosani;

³Elihoref o Ahija ilayiok le Shisha ninche apa ilaigerok; Yehoshefat olayioni le Ahilud apa olashumani loo mbaa;

⁴Benaia olayioni le Yehoida apa olkitok le njore; naa Sadok o Abiatar ninche apa ilapolosak;

⁵Asaira olayioni le Natan apa oitasheiki lelo kituaak, Sabud olayioni le Natan ninye apa olapolosani naa olchore lo laiguanani;

⁶Ahishar ninye apa olaitasheikinoni le nkaji e nkitoo; naa Adomiram olayioni le Abna ninye apa olaitasheikinoni le siaai oo nkaik.

⁷Keeta apa Solomon iltung'ana tomon oaare kituaak te Israel pooki, laa ninche ooisho olaiguanani endaa o lmarei lenye pooki, ore ake oltung'ani neishoru endaa to lapa obo to lari.

⁸Kuna ninche inkarn enye, Benhuri teinakop oo ldoinyio le Efraim,

⁹o Ben-deker te nkop e Makas, o Shaalbim o Betshemesh o Elenbet-hanan,

¹⁰o Ben-hesed, te nkop e Arubot (enenye apa enkop e Soko o enkop pooki e Hefer)

¹¹Ben-abin apa te nkop pooki e Nafat-do (eyama apa ninye Tafat entito e Solomon),

¹²Baana olayioni le Ahilud te nkop e Taanak o Megido o Betshean pooki apa naa ninye natii embata e Saretan tiabori Yesreel. Neitoki adumunye teine ometabaiki Abel-mehola, ometabaiki enkae shoto e Yokmeam,

¹³Benkeber, apa te nkop e Ramot-gilead (keeta apa ninye nkang'itie e Yair olayioni le Manase apa naatii Gilead, neeta sii olkerenket le Argob, otii enkalo e Argob, tiatua enkop e Basham, nkanas ntomoni ile kituaak naasheta sunta o nchomito o suyai),

¹⁴Ahinadab olayioni le Ido apa te nkop e Mahanaim;

¹⁵Ahinaas te nkop e Naftali (eyama apa ninye Basemat entito e Solomon);

¹⁶Baana olayioni le Hushai, te nkop e Asher o te Bealot;

¹⁷Yehoshefat olayioni le Parua te nkop e Isaakar;

¹⁸Shimei olayioni le Ela te nkop e Benchamen;

¹⁹Geber olayioni le Uri te nkop e Gilead, teinakop e Sihon olaiguanani le Amori o Oog olaiguanani le Bashan. Netii apa oltung'ani obo kitok enkop e Yuda.

²⁰Ore apa iltung'ana le Yuda o Israel naa eikumok anaa osinyai le naiposha, nedaa apa ninche neokisho neshipayu.

²¹Eitoria apa Solomon nena kitoriat pooki ebaiki olkeju le Frati ometabaiki ina kop oo Filistia ometabaiki olpolosie le Misiri; neyau ninche kodi neisiaai Solomon too nkolong'i pooki e nkishui enye.

²²Ore apa endaa nayakini Solomon te nkolong nabo, naa mboreitin inkalifuni imiet e ntapa napuyiapui o mboreitin inkalifuni tomon e mpirbil e nkano

²³o lmong'i tomon oopir o nkishu o lokeri tikitam naapir o nkerra iip, ore tenebo nena ng'uesi naanyanyukie inkoiliin o ronkon o motonyi naapir.

²⁴Amu keeta apa ninye enkitoria te nkop pooki o loo ntoluo to lkeju le Frati ebaiki Tipsa ometabaiki Gasa, te shumata ilaiguanak pooki le Frati, neeta ninye eseriani too nchot pooki naamanita ninye.

²⁵Ore Yuda o Israel netoni te Seriani, ebaiki Dan o metabaiki Beer-sheba, eton ake oltung'ani tiabori osabibu lenye o tiabori olng'aboli lenye, too nkolong'i pooki e Solomon.

²⁶Keeta sii apa Solomon ilaleta inkalifuni artam loo mbartan o ngarrin oo mbartan o lakedok loo mbartan inkalifuni tomon oaare.

²⁷Ore apa lelo tung'ana kituaak neisho ninche Solomon endaa o pooki oopuonu emisa o laiguanani Solomon, oltung'ani ake neishooyo endaa to lapa lenye; eitu ninche eisho metong'oro hoo toki.

²⁸Eyawuaki sii shairi o lkujita loo mbartan aaitasioki te wueji neyieuni. Neyau ake oltung'ani te risioroto e nkitanapata naitanapaki.

²⁹Neisho Enkai Solomon eng'eno nagut o ening'unoto nemeimakinoyu, neiputaki eng'eno naba anaa osinyai le naiposha,

³⁰neaku ore eng'eno nagut e Solomon kelusoo te ng'eno oo ltung'ana pooki to loosaen, o ng'eno pooki e Misiri.

³¹Amu aing'en apa ninye alang iltung'ana pooki, ng'en alang Etan le Esrahiti o Heman o Kalkol o Darda lelo ayiok le Mahol, nelo olning'o lenye neibulaa lelo oreren pooki oo manita.

³²Eiroro sii ndung'eta e rashe nkalifuni uni, ore isinkolioitin lenyena naa enkalifu nabo o imiet.

³³Eimaka sii ilkeek, ebaiki lelo tarakua otii Lebanon ometabaiki ina hisopo nabulu too sunta neimaki sii ing'uesi o motonyi o ntokitin naaiserpepiari o sinkir.

³⁴Nepuonu iltung'ana ooing'uaa iloreren pooki aainining eng'eno nagut e Solomon, o looing'uaa ilaiguanak pooki le nkop, ootoning'oitie eng'eno nagut e Solomon.