Read Maasai Bible – Biblia Sinyati 1 Ilaiguanak 6 Bible Online

1 Ilaiguanak 6 - Maasai Bible – Biblia Sinyati bible

1 Ilaiguanak 6

¹Ore te rishata oo larin iip ong'uan o ntomoni isiet eidipa iltung'ana loo Siraeli aatupuku te nkop e Misiri, to lari liong'uan eitore Solomon Israel, to lapa oji ole Sif, aa ninye olapa liaare, neiteru ninye ashet enkaji o Laitoriani.

²Ore apa ina aji nateshetaka olaiguanani Solomon Olaitoriani naa ntemeta e nkaina ntomoni ile enkadoro, naa ntemeta e nkaina tikitam endapasho naa ntemeta e nkaina tomoni uni e nkadoro nailep.

³Naa ore olgoriet otii enkalo najing'ieki enkaji naa ntemat e nkaina tikitam, nerisioro endapasho e nkaji, naa ntemat tomon e nkaina eng'uton te dukuya ina aji.

⁴Nepik ninye ilusien naaitobiruaki te nkarriyiano

⁵Neitobir sii aitaman isunta eina aji inkajijik naakedo too nchot pooki.

⁶Ore enkaji eabori naa ntemat imiet e nkaina e ndapasho, ore enkaji e polos naa ntemat ile e nkaina endapasho, ore enkaji e uni te shumata naa ntemat e nkaina naapishana endapasho. Ore te manaroto eina aji neitodorropu isunta pee meibung ake nena rishinani isunta e ina aji.

⁷Ore apa pee esheti ina aji naa too soito ooitobiraki te wueji neguetishoreki, pee mening'i ake enyuntu anaa entolu anaa ae toki e sekenkei tiatua enkaji e Nkai, ina kata eshetitae.

⁸Ore enejing'ieki ilo gilata liabori naa enkalo e kopikop eina aji, naa nkedeta eimi pee epuoi olgilata le polos, nepuoyieki sii olgilata liokuni.

⁹Neaku etesheta Solomon ina aji neidip; nepik enkitoipet e shumata too mbaoi o ltarakuai.

¹⁰Neitobir ninye lelo gilat meishiaakinore ake olgilata intemeta imiet e nkaina enkadoro, neibung'ieki enkaji too mbaoi o ltarakuai.

¹¹Nelotu olkilikuai lo Laitoriani enetii Solomon,

¹²nejo, “Ore ena aji nishetita iyie, tenilo iyie too nkikoot aainei nimbung inkitanapat aainei pooki nirubare ninche, natum taa atuuno ilo rorei te iyie, apa lairorie Daudi papaai lino.

¹³Naa kabik nanu tiatua inkera e Israel nemaing'uaa nanu iltung'ana laainei Isiraeli.”

¹⁴Neaku etesheta Solomon ina aji, neidip ninye.

¹⁵Neikod isunta eina aji tiatua too mbaoi o ltarakuai, ore ebaiki oltiren le nkaji ometabaiki enkimulumulet e shumata, nepik nkeek; ore oltiren leina aji neimulumul too nkeek o ltepesi.

¹⁶Etesheta ninye oriong ina aji apik mbaoi o lerai erishata oo ntemat e nkaina tikitam; etesheta ebaiki oltiren ometabaiki enchumata e suntai, neshet ine aiko anaa atua ina aji e Nkai, anaa ewueji sinyati aisul.

¹⁷Ore ilo gilata le wueji sinyati oleng naa ntemat tomon o isiet e nkaina enkadoro.

¹⁸Ore iltarakua ootii atua ina aji negueti aikunu anaa imalasin o ntapuka naalaa, naa iltarakua ake pooki, medoli ninye osoit.

¹⁹Ore atua ina aji e Nkai, neitobir ninye olgilata liatua tukul, pee etum atipika ine osanduku lo sotua lo Laitoriani.

²⁰Ore apa ilo gilata liatua naa ntemat tikitam e nkaina enkadoro, naa ntemat e nkaina tikitam endapasho, naa ntemet e nkaina tikitam enkadoro nailep, nemura pooki wueji te saabu nasila, nepik olpisiai le saabu metaleng'o dukuya ilo gilata liatua, nemur ninye te saabu.

²¹Nemur Solomon atua ina aji te saabu nasila, nepik ninye olpisiai aitalang ine wueji sinyati, nemur te saabu.

²²Nemur ninye enkaji pooki te saabu ometaba anaa neidipayu enkaji pooki. Ore sii ilo perere lo lasar liatua ewueji sinyati nemur te saabu.

²³Ore tiatua ine wueji sinyati neitobir ninye ilkerubi oaare loo nkeek o loirien, ore ake obo, naa intemat tomon e nkaina te nkadoro.

²⁴Ntemat imiet e nkaina enkadoro e naipukoi o lkerubi obo. Naa ntemat imiet ebaiki enkiting'oto e naipukoi nabo o metabaiki enkae aipukoi.

²⁵Ore olikae kerubi naa ntemat tomon ake sii ninye. Entemata nabo lelo kerubi naa empukunoto nabo.

²⁶Ore enkadoro olkerubi obo naa ntemat tomon e nkaina, naa neijia ake sii etiu ilo likae.

²⁷Nepik Solomon lelo kerubi ewueji e atua eina aji, ore inaipuko e lelo kerubi nelaki aaisalaash ometaa kebaiki enaipukoi e obo e suntai nebaiki enaipukoi o likae esuntai; ore nkulie aipuko enye nebaikino te mpolos e nkaji.

²⁸Nemur ninye lelo kerubi te saabu.

²⁹Ore isunta eina aji neikodi aaguetaki ilkerubi oltuka o ntapuka naalaa, neikodi too lgilat o tioriong o too liatuani.

³⁰Ore oltiren le nkaji nemur te saabu tiatua o tioriong.

³¹Ore te wueji nejing'ieki ine wueji sinyati nepik nkikeneta o loirien, ore imolinkaishi neripi aaitobiraki, nemur ninye.

³²Neimulumul ninye aikod nena kikeneta e kutukaji pokira are oo loirienito too ntokitin naaguetuno anaa ilkerubi, o ltuka o ntapuka dapashi, nemur lelo kerubi te saabu o lelo tuka.

³³Neaku e itobira ninye teine nejing'ieki imolinkaishi e kutukaji o loirien, neisho metorisioto nkaloli pooki,

³⁴o nkikenata are e kutukaji oltepesi, ore imatuan are e nkikenet nabo naa keshukunoyu eikeni o eboli naa neijia eitiu enkae matua e nkikenet.

³⁵Ore nena kikeneta neikodi aapik olkerubi, o ltuka o ntapuka, nemur ninche te saabu, anaa ina natipikaka nena tokitin naaguetuno.

³⁶Neshetu ninye olodung'oro liatua too lkererin okuni loo soito ooguetuno o too ng'apeta oltarakuai.

³⁷Ore to lari liong'uan nepiki ina aji o Laitoriani olkitamanyunoto, to lapa le Sif.

³⁸Ore to lapa le tomon oobo, to lapa oji ole Buul, laa ninye olapa le imiet neidipayu ina aji too nkaloli pooki, terisioroto oo nkitobirat enyena pooki apa naaitobirakaki ninye. Ilarin oopishana etesheta Solomon ina aji.